Bied die goeie nuus met ’n gevoel van dringendheid aan
1 Ons toon ons innige waardering vir God se Koninkryksbeloftes deur heelhartig aan die Christelike bediening deel te neem. Ons moet met ’n gevoel van dringendheid aan hierdie werk deelneem. Waarom? Want die werkers is min, die einde van hierdie goddelose stelsel van dinge kom nader en die lewens van diegene in ons gebied is op die spel (Eseg. 3:19; Matt. 9:37, 38). So ’n gewigtige verantwoordelikheid vereis dat ons ons bes doen in die bediening. Hoe kan ons ’n gevoel van dringendheid toon met betrekking tot ons velddiensbedrywighede? Deur voor die tyd goeie aanbiedings voor te berei, deur ywerig na mense te soek waar hulle ook al gevind kan word, deur ’n akkurate rekord te hou van almal wat belangstelling toon, deur stiptelik na daardie belangstellendes terug te gaan en deur te onthou dat ons ons bediening ernstig moet opneem omdat lewens daarby betrokke is. Die volgende voorstelle sal moontlik nuttig wees terwyl ons voorberei om die goeie nuus gedurende Februarie met ’n gevoel van dringendheid aan te bied. Die aanbod sal die boek Openbaring—Sy groot klimaks is ophande! wees.
2 Jy sal dalk ’n gesprek kan begin deur kortliks ’n paar probleme te meld wat in die gemeenskap ondervind word, en dan kan jy sê:
◼ “Baie mense glo dat daar ’n God is, maar hulle wonder: ‘Watter soort toekoms wil hy vir ons hê?’ Hoe sou jy dit beantwoord? [Wag vir ’n antwoord.] Het jy geweet dat die Bybel God se wil vir die mensdom duidelik uiteensit, asook die stappe wat hy doen om dit te volbring?” Blaai na bladsy 301 in die Openbaring-boek. Lees Openbaring 21:1 in paragraaf 1 en lees dan die verduideliking wat daarvoor gegee word in die laaste helfte van paragraaf 2. Blaai na die prent op bladsy 302 om toe te lig wat dit vir ons toekoms beteken. Lees Openbaring 21:4 in paragraaf 6. Bied die boek teen ’n bydrae van R12,00 aan. Reël om op ’n geskikte tyd terug te gaan om die gesprek voort te sit.
3 Jy kan die vorige bespreking van Openbaring 21:1, 4 voortsit met hierdie kort aanbieding:
◼ “Met my laaste besoek het ons gepraat oor God se belofte om ’n nuwe aardse gemeenskap vir die mensdom voor te berei. [Vestig weer die aandag op die prent op bladsy 302 in die Openbaring-boek.] Sou jy graag wou sien dat jou gesin sulke toestande geniet? [Wag vir ’n antwoord.] Die vraag is: Hoe betroubaar is God se beloftes? Let asseblief op na wat hy self sê.” Lees Openbaring 21:5, 6a in paragraaf 8 op bladsy 303. Vra die gedrukte vraag vir paragraaf 9 op bladsy 303 en lees die antwoord, asook die laaste sin van die paragraaf. Meld die aanbod van ’n gratis Bybelstudie. Reël om dit later te demonstreer.
4 Aangesien baie mense bekommerd is oor die toenemende probleme waarvoor die mensdom te staan kom, kan jy met die eerste besoek iets sê soos:
◼ “Byna almal is bekommerd oor die probleme waarvoor ons in ons gemeenskap te staan kom. [Meld ’n paar.] Politici het belowe om permanente oplossings te bewerkstellig, en party het dit probeer doen. Wat dink jy veroorsaak dat toestande aanhou versleg? [Wag vir ’n antwoord.] Die Bybel gee ’n verduideliking waaroor die meeste mense nog nooit gedink het nie. Die boek Openbaring beskryf ’n oorlog wat in die hemel plaasgevind het. Let op die uitkoms daarvan, soos opgeteken in Openbaring 12:9.” Lees die vers en blaai dan na bladsy 182 in die Openbaring-boek. Gebruik die prent om Satan se betrokkenheid by die aarde se aangeleenthede te verduidelik. Bied die boek teen ’n bydrae van R12,00 aan. Tref reëlings om terug te gaan en te bespreek hoe God die mensdom se probleme gaan oplos.
5 As jy belowe het om terug te gaan om God se oplossing vir vandag se probleme te verduidelik, kan jy hierdie benadering probeer:
◼ “Ek het ’n spesiale poging aangewend om terug te kom sodat ons ons bespreking kan voortsit oor die werklike oplossing vir die probleme waarvoor die mensdom te staan kom. Met my laaste besoek het ons gesien dat die Bybel Satan die Duiwel identifiseer as die een wat die hele bewoonde aarde mislei. Dink jy dat daar ’n manier is waarop sy invloed verwyder kan word, aangesien hy ’n bomenslike geesskepsel is? [Wag vir ’n antwoord.] Let asseblief op na wat die Bybel sê.” Lees en verduidelik Openbaring 20:1-3. Gebruik die prent op bladsye 4-5 van die Kennis-boek om te toon wat die toestande sonder Satan se invloed sal wees. Bied ’n Bybelstudie aan en probeer dit onmiddellik begin.
6 Met soveel mense wat in die omgewing belangstel, kan jy ’n gesprek aanknoop deur iets te sê soos:
◼ “Ons het gevind dat byna almal besorg is oor die besoedeling van ons lug, water en voedsel. In party lande is die toestand van die omgewing reeds lewensgevaarlik. Wat dink jy gaan God hieromtrent doen, aangesien hy die Skepper van die aarde is? [Wag vir ’n antwoord.] Die Bybel sê dat God rekenskap gaan eis vir die manier waarop ons die planeet gebruik. [Lees Openbaring 11:18b.] Stel jou voor dat jy op ’n aarde lewe wat vry is van alle besoedeling!” Vestig die aandag op God se belofte van ’n paradys, soos aangedui in Openbaring 21:3, 4. Wys die prent op bladsy 302 in die Openbaring-boek. Bied die boek teen ’n bydrae van R12,00 aan en reël om terug te gaan.
7 Wanneer jy teruggaan na iemand wat belangstelling in die Paradysaarde getoon het, kan jy sê:
◼ “Met my laaste besoek het ons saamgestem dat God in die mensdom se aangeleenthede sal moet ingryp om die probleem van ’n besoedelde aarde op te los. Maar die vraag is: Wat moet ons doen om behoue te bly tot in die regverdige nuwe wêreld wat God tot stand gaan bring?” Lees Johannes 17:3. Nooi die huisbewoner om ons gratis Bybelstudiekursus te benut om hierdie spesiale kennis te verkry.
8 Wat ’n voorreg is dit tog om as hedendaagse werkers in die oes gebruik te word en om ’n lewensreddende predikingswerk te doen! Mag ons almal besig bly om die goeie nuus met ’n gevoel van dringendheid aan te bied, ‘in die wete dat ons arbeid nie tevergeefs is nie’.—1 Kor. 15:58.