Let streng op hoe julle julle tyd gebruik
1. Voor watter uitdaging kom alle mense vandag te staan?
1 In ons dag, met soveel toestelle wat tyd en arbeid bespaar, lyk dit vir baie of hulle meer dinge het om te doen en minder tyd om dit alles gedoen te kry. Vind jy dit moeilik om ’n goeie geestelike roetine te handhaaf? Wens jy dat jy meer tyd vir die bediening gehad het? Hoe kan ons ons tyd ten beste benut?—Ps. 90:12; Fil. 1:9-11.
2, 3. Watter uitdaging bied inligtingstegnologie, en hoe kan elkeen van ons ons persoonlike omstandighede ondersoek?
2 Identifiseer die dinge wat tyd verkwis: Ons moet almal van tyd tot tyd kyk na hoe ons ons tyd gebruik. Die Bybel vermaan ons: “Let . . . voortdurend streng op hoe julle wandel, dat dit nie as onwyses is nie, maar as wyses, terwyl julle die geleë tyd vir julleself uitkoop, omdat die dae boos is” (Ef. 5:15, 16). Dink byvoorbeeld aan die uitdagings wat vooruitgang in inligtingstegnologie bied. Hoewel die gebruik van rekenaars en ander elektroniese toestelle nuttig kan wees, kan dit ’n strik word as ons nie streng let op hoe ons ons tyd gebruik nie.—1 Kor. 7:29, 31.
3 Ons elkeen moet ons afvra: ‘Bestee ek elke dag tyd daaraan om e-posboodskappe te lees of te beantwoord wat eintlik net my tyd mors? Word my tyd dikwels in beslag geneem deur telefoongesprekke of SMS’e oor onbenullighede? (1 Tim. 5:13). Snuffel ek doelloos op die Internet rond of skakel ek voortdurend van een kanaal na ’n ander oor wanneer ek televisie kyk? Het ’n beheptheid met elektroniese speletjies inbreuk begin maak op my studie van God se Woord?’ Sulke bedrywighede kan ons op subtiele wyse van ons geestelikheid beroof.—Spr. 12:11.
4. Watter aanpassing het een jeugdige gemaak, en waarom?
4 Gebruik jou tyd wyslik: Elektroniese toestelle neem dikwels ons tyd sowel as ons aandag in beslag. ’n Jeugdige wat behep geraak het met rekenaarspeletjies, het erken: “Soms wanneer ek rekenaarspeletjies gespeel het voordat ek in die bediening uitgegaan of ’n Christelike vergadering bygewoon het, het ek dit baie moeilik gevind om te konsentreer. Ek het byna heeltyd gedink aan hoe ek ’n sekere probleem in ’n speletjie sal oplos wanneer ek by die huis kom. My persoonlike studie en daaglikse Bybellees het daaronder gely. Ek het my vreugde in God se diens begin verloor.” Hy het besef dat hy veranderinge moes aanbring en het al sy rekenaarspeletjies uitgewis. “Dit was baie moeilik”, sê hy. “Die speletjies het meer vir my beteken as wat ek gedink het. Maar dit het ook vir my gevoel of ek ’n groot oorwinning behaal het omdat ek geweet het dat dit vir my eie beswil is.”—Matt. 5:29, 30.
5. Hoe kan ons die tyd vir geestelike bedrywighede uitkoop, en hoe vind ons daarby baat deur dit te doen?
5 Dit sal dalk nodig wees om sulke stappe te doen as daar gebiede is waarin jy aanpassings moet maak. Kan jy elke dag ’n halfuur uitkoop van onbelangrike bedrywighede? Dit is omtrent hoeveel tyd jy elke dag nodig sal hê om die hele Bybel in ’n jaar deur te lees. Hoe geestelik verkwikkend sal dit tog wees! (Ps. 19:7-11; 119:97-100). Sit spesifieke tye opsy om die Bybel te lees, vir vergaderinge voor te berei en velddiens te doen (1 Kor. 15:58). As jy dit doen, sal dit jou help om dinge wat tyd verkwis, onder beheer te hou en ‘voort te gaan om te begryp wat die wil van Jehovah is’.—Ef. 5:17.