Getrouheid word beloon
1 In Hebreërs 11:6 word daar vir ons gesê dat God “die beloner word van dié wat hom ernstig soek”. Een manier waarop hy sy toegewyde knegte beloon wat ‘in ’n paar dinge getrou’ was, is deur ‘hulle oor baie dinge aan te stel’ (Matt. 25:23). Met ander woorde, Jehovah beloon dikwels goeie werk deur sy getroue getuies verdere diensvoorregte te gee.
2 As beloning vir die apostel Paulus se getrouheid het hy ’n bediening ontvang wat hom na die stede en dorpe van Europa en Klein-Asië geneem het (1 Tim. 1:12). Hoewel dit groot inspanning van Paulus geverg het om sy bediening ten volle uit te voer, het hy groot waarde geheg aan die voorreg wat hy ontvang het (Rom. 11:13; Kol. 1:25). Hy het sy hartgrondige waardering getoon deur ywerig te soek na geleenthede om te preek. Deur sy ywer het hy duidelik getoon dat hy sy geloof uitleef. Sy voorbeeld beweeg ons om ons diensvoorregte hoog op prys te stel.
3 Jehovah het ons ’n bediening gegee: Hoe toon ons dieselfde beskouing van hierdie diensvoorreg as wat Paulus getoon het? Ons soek na maniere waarop ons ons deelname aan die bediening kan vergroot. Ons maak van elke geleentheid gebruik om informeel sowel as van huis tot huis te getuig. Ons gaan terug na elke huis waar daar nie mense tuis was nie en doen herbesoeke by almal wat belangstel. En ons kom die afsprake na wat ons maak om tuisbybelstudies te hou.
4 Aangaande ons bediening het Paulus gemaan: “Bly dringend daarmee besig” (2 Tim. 4:2). Iets wat dringend is, vereis onmiddellike aandag. Voer ons ons bediening op ’n dringende wyse uit, en geniet dit voorkeur in ons lewe? Ons sal byvoorbeeld nie wil toelaat dat ons ontspanningsbedrywighede en ander persoonlike belange oor naweke inbreuk maak op die tyd wat ons aan die veldbediening behoort te bestee nie. Aangesien ons oortuig is dat die einde van hierdie stelsel vinnig nader kom, is ons ook oortuig dat die verkondiging van die goeie nuus van die Koninkryk die belangrikste werk is wat ons kan doen.
5 Ons getrouheid aan God word getoon deur ons betroubaarheid en ons lojaliteit teenoor hom en deur standvastig te wees in die werk wat hy ons toegewys het. Laat ons ons bediening ten volle uitvoer, sodat Jehovah ons getrouheid in ’n groot mate sal beloon.