Kennis wat van God af kom, beantwoord baie vrae
1 Voordat jy ’n juiste kennis van die waarheid verkry het, het jy waarskynlik baie vrae oor die lewe gehad wat jy nie kon beantwoord nie. Hoe bly was jy tog om Bybelse antwoorde op daardie vrae te vind! Nou is dit vir jou moontlik om ander te help om antwoorde op daardie selfde vrae te vind. (Vergelyk 2 Timoteus 2:2.) Jy kan aan hulle die kennis van God oordra wat tot die ewige lewe lei (Joh. 17:3). Maar hoe kan jy iemand help om die waarde van hierdie kennis te besef? Wel, dink aan die vrae wat die waarheid vir jou beantwoord het. Wat wil waarheidsoekers graag weet? As jy hieroor nadink, kan dit jou help om die boek Kennis wat tot die ewige lewe lei aan te bied. Die volgende wenke kan jou help wanneer jy vir getuieniswerk gedurende Junie voorberei.
2 Aangesien baie mense wonder waarom daar soveel lyding in die wêreld is, kan hierdie benadering ’n gunstige reaksie uitlok:
◼ “Wanneer daar ’n ramp is of wanneer misdaad en geweld toeneem, vra mense dikwels waarom sulke verskriklike dinge gebeur. Hoe sal jy antwoord?” Wag vir die persoon se antwoord en reageer daarop. Blaai dan na hoofstuk 8 in die Kennis-boek en vestig die aandag op wat in paragraaf 2 gesê word. Verduidelik dat hierdie boek die Bybel se verduideliking gee van waarom slegte dinge gebeur en sê: “Ek wil graag hierdie eksemplaar by jou laat teen ’n bydrae van R4,00.”
3 Wanneer jy teruggaan na iemand wat die “Kennis”-boek geneem het, kan jy sê:
◼ “Ek wil graag hoor tot watter gevolgtrekking jy gekom het oor waarom daar soveel lyding in die wêreld is. Stem jy saam met die Bybel se antwoord soos dit in die boek uiteengesit word?” Wag vir ’n antwoord. Lees paragraaf 17 op bladsy 76 in die Kennis-boek en bied aan om Romeine 9:14 uit die huisbewoner se Bybel te lees. Sê dan: “Die goeie nuus is dat God nie so onregverdig is dat hy pyn en lyding oor ons sal bring nie. Hy het belowe om vir ons ewige lewe in vrede en geluk te gee. Die eerste hoofstuk in hierdie boek het die titel ‘Jy kan ’n gelukkige toekoms hê!’ Ek wil graag vir jou verduidelik hoe dit vir jou en jou geliefdes moontlik kan wees.” Blaai na hoofstuk 1 en demonstreer ons studiemetode. Dek soveel van die hoofstuk as wat die omstandighede toelaat.
4 Dalk verkies jy om die inleiding te gebruik wat op bladsy 10 in die “Redenering”-boek verskyn onder die opskrif “Bejaardheid/Dood”:
◼ “Het u al ooit gewonder: ‘Is die dood die einde van alles? Of wag daar iets ná die dood?’ [Wag vir ’n antwoord.] Die Bybel klaar enige vraag wat ons oor die dood het op. [Lees Prediker 9:5, 10.] Dit toon ook dat daar ware hoop is vir mense met geloof. [Blaai na paragraaf 13 op bladsy 84 in die Kennis-boek; lees en verduidelik Jesus se woorde in Johannes 11:25.] Hierdie hele hoofstuk bespreek die antwoord op die vraag: Wat gebeur met ons afgestorwe dierbares? As jy dit graag wil lees, kan ek hierdie eksemplaar by jou laat teen ’n bydrae van R4,00.”
5 Wanneer jy die herbesoek doen, kan jy, nadat jy gegroet het, sê:
◼ “Ons het voorheen gesels oor wat gebeur wanneer iemand sterf. Baie mense glo dat enige lewe ná die dood óf in die hemel óf in die hel sal wees. Maar het jy al ooit die moontlikheid oorweeg dat die dooies weer hier op die aarde sal woon? [Wag vir ’n antwoord.] Volgens die Bybel sal diegene wat opgewek word onder die ootmoediges wees wat die aarde sal beërf. [Lees Psalm 37:11, 29 en bespreek dan paragraaf 20 op bladsy 88 in die Kennis-boek.] Daardie hoop het vertroosting gebied vir miljoene mense wat in vrees vir die dood gelewe het. Hierdie boek sal jou help om die saak beter te verstaan. Kan ek vir jou demonstreer hoe?”
6 As jy ’n eenvoudiger aanbieding verkies, kan jy hierdie een probeer:
◼ “Ek wil graag vir jou ’n prent wys in hierdie boek, Kennis wat tot die ewige lewe lei. Is dit nie ’n pragtige prent nie?” Maak die boek oop sodat die huisbewoner bladsye 4-5 kan sien. Wag vir ’n antwoord. Lees dan die woorde op bladsy 5. Sluit af deur te sê: “Jy kan hierdie boek kry om te lees teen ’n klein bydrae van R4,00.” Vind uit watter tyd geleë sal wees om terug te gaan en enige belangstelling wat getoon is verder te kweek.
7 Ons het die kennis wat van God af kom wat die lewe se belangrike vrae beantwoord. As jy goed voorberei, sal Jehovah jou pogings seën om hierdie lewegewende inligting te verkondig aan diegene wat na die waarheid soek.