’n Besoek wat ’n seën kan wees
1 Dit was met blydskap dat Saggeus Jesus as ’n gas in sy huis ontvang het. En wat ’n seën was daardie besoek tog nie!—Luk. 19:2-9.
2 As Hoof van die gemeente rig Jesus Christus vandag die ouer manne om ‘as herders toesig te hou oor die kudde van God’ (1 Pet. 5:2, 3; Joh. 21:15-17). Bo en behalwe dat die opsieners van die gemeente by vergaderinge onderrig en die leiding in die velddiens neem, voorsien hulle ook liefdevolle, persoonlike hulp aan individuele gemeentelede. Jy kan dus van tyd tot tyd daarna uitsien om persoonlike aandag van die ouer manne te ontvang—tuis, by die Koninkryksaal, terwyl julle saam velddiens doen of by ander geleenthede. Moet jy skrikkerig voel oor die ouer manne se besoek? Glad nie. Hulle besoek beteken nie dat jy op die een of ander manier te kort skiet nie. Wat is dan die doel van ’n herdersbesoek?
3 Paulus het gesê dat hy die broers wou besoek “om te sien hoe dit met hulle gaan” (Hand. 15:36). Ja, as liefdevolle herders stel die ouer manne werklik daarin belang om te sien hoe dit met jou gaan. Hulle wil geestelike hulp aanbied wat vir jou nuttig en opbouend kan wees. Ons liefdevolle Herder Jehovah wil graag hê dat elkeen van ons sulke persoonlike sorg moet ontvang.—Eseg. 34:11.
4 Verwelkom die ouer manne se besoek: Die doel van Paulus se besoek aan sy broers was om ‘hulle die een of ander geestelike gawe mee te deel sodat hulle standvastig gemaak kon word en dat daar ’n uitwisseling van aanmoediging kon wees’ (Rom. 1:11, 12). Ons almal het in hierdie moeilike laaste dae aanmoediging nodig en ons het hulp nodig om standvastig in die geloof te bly. Jou positiewe reaksie op ’n herdersbesoek sal ongetwyfeld tot ’n aangename uitwisseling van aanmoediging lei.
5 Waardeer die talle voordele wat uit die ouer manne se herderswerk spruit. As jy oor die een of ander saak of vraag besorg is, moet jy onthou dat die ouer manne in die gemeente daar is om te help. Moenie huiwer om enige saak wat jou geestelike welsyn kan raak met hulle te bespreek nie. Waardeer hierdie liefdevolle reëling deur Jehovah en verbly jou oor die seëninge wat so ’n besoek kan meebring.