Ons moet herhaaldelik teruggaan
1 Het jy die eerste keer toe iemand met jou oor die goeie nuus gepraat het gunstig daarop gereageer? Indien nie, is jy ongetwyfeld dankbaar dat Jehovah se Getuies jou herhaaldelik besoek het totdat jy die aanbod van ’n Bybelstudie aanvaar het. Dit is goed om dit in gedagte te hou wanneer jy oor en oor in julle gebied werk.
2 Mense se lewe verander voortdurend. Hulle kom voor nuwe probleme of situasies te staan, hoor van ontstellende gebeure in die gemeenskap of in die wêreld, ervaar finansiële terugslae of ondervind siekte of dood in die gesin. Sulke dinge kan maak dat hulle wil weet waarom daar soveel ellende is. Ons moet vasstel watter dinge mense verontrus en dan gereed wees om aan hulle ’n vertroostende boodskap oor te dra.
3 Dit is ’n reddingswerk: Dink aan reddingswerkers in ’n rampgebied. Al soek party in ’n gebied waar daar min oorlewendes gevind word, word hulle nie traag en hou hulle nie op omdat hulle medewerkers elders meer oorlewendes vind nie. Ons reddingspoging is nog nie afgelas nie. Daar word elke jaar honderdduisende gevind wat “die groot verdrukking” wil oorleef.—Op. 7:9, 14.
4 “Elkeen wat die naam van Jehovah aanroep, sal gered word” (Rom. 10:13-15). Hierdie woorde behoort elkeen van ons te laat besef hoe noodsaaklik dit is om in die predikingswerk te volhard. Sedert ons begin het om ons gebied te dek, het kinders grootgeword en is hulle nou oud genoeg om self ernstig na te dink oor hulle toekoms en die doel van die lewe. Ons weet nie wie uiteindelik sal luister nie (Pred. 11:6). Baie mense wat ons voorheen teëgestaan het, het die waarheid aangeneem. Dit is nie ons werk om mense te oordeel nie, maar ons moet aanhou om hulle die geleentheid te gee om te hoor en uit hierdie ou wêreld gered te word. Soos Jesus se vroeë dissipels moet ons “voortdurend” na mense toe gaan en hulle belangstelling in die Koninkryksboodskap aanwakker.—Matt. 10:6, 7.
5 Die feit dat ons nog die predikingswerk kan doen, is ’n blyk van Jehovah se barmhartigheid (2 Pet. 3:9). Terwyl ons ander toelaat om die boodskap herhaaldelik te hoor, vestig ons die aandag op God se liefde en loof ons hom sodoende.