‘Wees vrygewig, mededeelsaam’
1 Eeue gelede het die apostel Paulus Timoteus die opdrag gegee om medegelowiges aan te moedig “om goed te doen, om ryk te wees in voortreflike werke, om vrygewig te wees, mededeelsaam” (1 Tim. 6:18). Paulus het ook die Hebreeuse Christene daaraan herinner om nie te vergeet om “goed te doen en mededeelsaam te wees nie” (Heb. 13:16). Waarom het hy hierdie opdragte neergeskryf? Want hy het geweet dat daar “heerlikheid en eer en vrede [sal wees] vir elkeen wat bedryf wat goed is”.—Rom. 2:10.
2 As die Skepper is Jehovah God die Eienaar van alle dinge (Op. 4:11). Ons waardeer beslis wat hy ten behoewe van ons met sy besittings doen. Ondanks die ondankbare gesindheid van baie mense laat die Allerhoogste steeds almal baat vind by sy milddadige voorsienings om lewe te onderhou (Matt. 5:45). Hy het selfs sy dierbare Seun as ’n offerande gegee sodat ons die ewige lewe kan hê. Behoort die liefde wat aan ons betoon is ons nie te dring om dankbaarheid te toon deur vrygewig teenoor ons medemens te wees nie?—2 Kor. 5:14, 15.
3 Wat kan ons met ander deel? Dit is net reg dat ons enige bates wat ons het op ’n manier gebruik wat God behaag. Ons wil beslis materiële en geestelike steun aan die wêreldwye Koninkrykswerk gee. Die goeie nuus is natuurlik die waardevolste skat wat enigeen kan besit, want dit is “God se krag tot redding” (Rom. 1:16). As ons elke maand milddadig van ons tyd en middele gee om aan die predikings- en onderrigtingswerk deel te neem, sal ons hierdie geestelike skat met ander kan deel, wat tot hulle ewige lewe kan lei.
4 Jehovah is baie bly wanneer ons diegene help wat min het. Hy belowe om ons te seën en hy herinner ons ook: “Goed bring geen voordeel op die dag van die grimmigheid nie, maar geregtigheid red van die dood” (Spr. 11:4; 19:17). Om die Koninkrykswerk materieel te ondersteun en ’n volle deelname aan die verkondiging van die goeie nuus te hê, is wonderlike maniere om te toon dat ons werklik vrygewig en mededeelsaam is.