As ons oorvloedig saai, bring dit ryk seëninge mee
1 Ons almal sien uit na die vervulling van die wonderlike beloftes in God se Woord. Jehovah seën ons nou reeds op baie maniere wat ons lewe gelukkiger maak. Maar die mate waarin ons persoonlik daarby baat vind, hang baie af van hoeveel ons ons inspan. Soos die apostel Paulus dit gestel het: “Wie oorvloedig saai, sal ook oorvloedig maai” (2 Kor. 9:6). Kom ons kyk na twee gebiede waarop hierdie beginsel van toepassing is.
2 Ons eie bediening: As ons die goeie nuus aan mense verkondig wanneer ons ook al kan, word ons ryklik beloon (Spr. 3:27, 28). Dit is prysenswaardig dat baie oorvloedig saai deur ’n groter aandeel aan die bediening te hê, soos om aan die hulp- en gewone pionierdiens deel te neem. Ons almal kan oorvloedig saai deur getrou terug te gaan om alle belangstelling wat gevind is, verder te kweek en deur ’n Bybelstudie aan te bied wanneer die geleentheid hom ook al voordoen (Rom. 12:11). As ons ons op hierdie maniere inspan, lei dit tot opbouende ondervindinge en groter vreugde in ons bediening.
3 Deur Koninkryksbelange te ondersteun: Toe Paulus gemeld het dat ons ‘oorvloedig moet saai’, het hy dit in verband met materiële bydraes gesê (2 Kor. 9:6, 7, 11, 13). Vandag is daar baie wat ons fisies en materieel kan doen om Koninkryksbelange te ondersteun. Ons kan help om Koninkryksale en Byeenkomssale te bou. Ons kan ook ons hulp aanbied om hierdie sentrums vir ware aanbidding skoon te maak en in stand te hou. Daarbenewens kan ons geldelik bydra vir die plaaslike gemeente se uitgawes sowel as vir die wêreldwye Koninkrykspredikings- en dissipelmaakwerk. Hoe verheug is ons tog om Jehovah se oorvloedige seën op hierdie godgegewe werk te sien, terwyl ons almal ons deel doen!—Mal. 3:10; Luk. 6:38.
4 God se Woord spoor ons aan “om goed te doen, om ryk te wees in goeie werke, om vrygewig te wees, mededeelsaam”. Wanneer ons op hierdie aansporing ag gee, geniet ons nou ryk seëninge. Terselfdertyd is ons besig om “vir [ons] ’n goeie fondament vir die toekoms” en vir “die werklike lewe” wat voorlê, “veilig as ’n skat te bewaar”.—1 Tim. 6:18, 19.