‘Wees ryk in goeie werke’

¹ Gedurende die laaste jare van die apostel Paulus se ywerige bediening het hy ten nouste met Timoteus en Titus saamgewerk. Vir elkeen van hulle het hy soortgelyke woorde van bemoediging geskryf. Hy het vir Titus gesê dat “dié wat God geglo het, hulle verstand daarop gerig [moet] hou om met goeie werke vol te hou” (Tit. 3:8). Hy het vir Timoteus gesê dat diegene wat hulle hoop op God vestig, “ryk [moet] wees in goeie werke” (1 Tim. 6:17, 18). Dit is uitstekende raad vir ons almal! Maar wat sal ons motiveer om goeie werke in ons lewe te verrig? En watter spesifieke werke kan ons verrig in die dae wat voorlê?

² Ons geloof in Jehovah en ons liefde vir hom asook die wonderlike hoop wat hy ons gegee het, motiveer ons om ryk te wees in die regte werke (1 Tim. 6:19; Tit. 2:11). Veral gedurende hierdie tyd van die jaar word ons daaraan herinner dat Jehovah sy Seun aarde toe gestuur het sodat Jesus sy Vader kon regverdig en dit vir alle verdienstelike mense moontlik kon maak om die lewe te kry (Matt. 20:28; Joh. 3:16). Dit sal baie duidelik gemaak word by die herdenking van Christus se dood op 28 Maart. Motiveer ons hoop op die ewige lewe ons nie om alles in ons vermoë te doen om “ryk te wees in goeie werke” nie? Natuurlik! Watter werke kan ons nou verrig?

³ Goeie werke wat ons in Maart en daarna kan doen: Ons gaan beslis die Gedenkmaal bywoon—die belangrikste gebeurtenis van die jaar vir Jehovah se Getuies regoor die wêreld (Luk. 22:19). Maar ons wil die vreugde van daardie geleentheid met soveel mense moontlik deel. Kyk na die diensrapport in die 2002-jaarboek, en jy sal sien dat die Gedenkmaalopkoms verlede jaar in baie wêrelddele drie, vier, vyf of meer keer die aantal verkondigers was. Dit het ongetwyfeld ywerige inspanning geverg van almal in die gemeentes om Gedenkmaaluitnodigings regdeur hulle gebied te versprei. Ons wil derhalwe van nou tot 28 Maart soveel tyd moontlik daaraan bestee om mense na die Gedenkmaal te nooi en hulle te help om van die hoop op redding te leer.

⁴ Gedurende April het ons nog goeie weer. Hoe kan ons goed hiervan gebruik maak om “ryk te wees in goeie werke”? Deur voort te gaan om die goeie nuus entoesiasties te verkondig en “ywerig vir goeie werke” te wees (Tit. 2:14; Matt. 24:14). As jy nie in Maart aan die hulppionierdiens kan deelneem nie, wat dan van April en/of Mei? As jy in Maart pionier, kan jy daarmee voortgaan?

⁵ Party wat sekulêr werk, vind dat hulle op pad werk toe ’n uur of wat in velddiens kan deurbring deur straatwerk te doen of mense te besoek wat by sakeondernemings werk wat vroeg in die oggend oopmaak. Ander gebruik ’n deel van hulle etensuur om te getuig. Party het gevind dat hulle in daardie tyd ’n Bybelstudie met ’n medewerker kan hou. Baie susters wat huisvrouens is, kon tyd vir die veldbediening opsy sit terwyl hulle kinders by die skool is. Deur party dae ’n bietjie vroeër op te staan om hulle huiswerk te doen, het hulle gedurende die dag meer tyd vir die predikings- en onderrigtingswerk.—Ef. 5:15, 16.

⁶ Selfs al kan jy nie aan die hulppionierdiens deelneem nie, kan jy moontlik ’n persoonlike rooster uitwerk om ’n groter aandeel aan die bediening te hê en alles in jou vermoë doen “om goed te doen, om ryk te wees in goeie werke, om vrygewig te wees, mededeelsaam” deur ander van die waarheid te vertel.—1 Tim. 6:18.

⁷ Onthou die goeie werk om dissipels te maak: Daar is elke jaar belangstellendes wat na die Gedenkmaal toe kom. Sal dit moontlik wees vir party in die gemeente om aandag te skenk aan diegene wat dit bywoon, maar wat tans nie studeer nie? Kan herbesoeke by hulle gedoen word met die doel om hulle te help om geestelik te vorder? Van dié wat die Gedenkmaal bywoon, is dalk familielede van Getuies. Ander is moontlik individue wat in die verlede gestudeer het en wat net ’n bietjie aanmoediging nodig het om weer te begin studeer en vergaderinge gereeld by te woon. Watter vreugde sal dit ons tog verskaf om te sien hoe hulle saam met ons bedrywige knegte van Jehovah word!

⁸ As ons gedurende Maart en daarna ’n groter aandeel aan die bediening het, gaan ons heel waarskynlik meer belangstellendes vind na wie ons moet teruggaan. Probeer ’n vraag by hulle laat. Belowe dan om die antwoord gedurende die volgende besoek te bespreek. Wanneer ons dit doen, sal die weg gebaan wees vir ’n herbesoek. Hoe gouer ons die herbesoek kan doen, hoe beter. As ons nie ’n studie gedurende die eerste besoek kon begin nie, wil ons dit met die volgende besoek probeer doen, indien dit enigsins moontlik is.

⁹ Wanneer ons straatwerk doen, moet ons daarop ingestel wees om gesprekke met mense te probeer aanknoop. Baie verkondigers het al name, adresse en telefoonnommers gekry by belangstellendes wat hulle in straatwerk ontmoet het. As die persoon met wie jy gepraat het, nie in julle gebied woon nie, moet jy die “Volg asseblief op”-vorm (S-43) by die Koninkryksaal kry, dit invul en vir die gemeentelike sekretaris gee, wat dit na die gemeente sal stuur in wie se gebied die persoon woon. As die sekretaris dit nie kan doen nie, sal hy dit na die takkantoor toe stuur om behartig te word. Op hierdie manier kan die belangstelling gekweek word.

¹⁰ As jy ’n telefoonnommer kry, maar nie ’n adres nie, kan jy ’n herbesoek doen deur die persoon te bel. Besluit vooraf wat jy wil bespreek. Hou jou Redenering-boek byderhand sodat jy vinnig daarna kan verwys. Party behaal baie sukses deur met mense oor die telefoon te studeer, insluitende diegene wat hulle nie maklik tuis kon vind nie. ’n Suster het die telefoonnommers begin vra van belangstellende vroue wat sy in die deur-tot-deur-bediening ontmoet het, en gevolglik kon sy twee Bybelstudies begin.

¹¹ Werk saam met die ouer manne om onbedrywiges te help: Die ouer manne stel baie daarin belang om liefdevolle aandag aan hierdie persone te skenk. ’n Hele paar van hulle het op eie inisiatief reeds weer gemeentelike vergaderinge begin bywoon. Hulle besef hoe belangrik dit is om noue omgang met Jehovah se organisasie te hê ten einde die geestelike veiligheid te hê wat in Psalm 91 beskryf word. Party van hulle is nou gereed om weer aan velddiens te begin deelneem. As ander wat onbedrywig is, hierdie maand die Gedenkmaal bywoon, sal hulle dit dalk verwelkom om ’n persoonlike Bybelstudie te hê. As dit die geval is, sal die ouer manne reël dat iemand met diegene studeer wat hulp wil hê. As jy gevra word om op hierdie manier te help, sal jou samewerking grootliks waardeer word.—Rom. 15:1, 2.

¹² ‘Hou vol met goeie werke’: Baie wat ’n maand of langer aan die hulppionierdiens deelgeneem het, het gevind dat hulle velddiensbedrywighede in die maande daarna toegeneem het. Hulle het belangstellendes ontmoet na wie hulle graag wou teruggaan. Dit het hulle gemotiveer om meer dikwels velddiens te probeer doen sodat hulle weer met die belangstellendes in aanraking kon kom. Party het studies begin, en dit het hulle gehelp om ’n selfs groter aandeel aan die bediening te hê.

¹³ Nog ander het dit so geniet om meer in die predikings- en dissipelmaakwerk te doen dat hulle beweeg is om hulle prioriteite te ontleed. Gevolglik kon party minder sekulêre werk doen en gereelde hulppioniers word. Ander kon die gewone pionierdiens betree. Hulle kon hulle hoop in groter mate op God vestig en nie op die dinge wat die wêreld bied nie. Hulle het gevind dat dit ryk seëninge van Jehovah meebring en hulle hoop versterk om “die werklike lewe” te geniet deur ‘vrygewig te wees, asook mededeelsaam’ (1 Tim. 6:18, 19). Namate meer aan die pionierdiens begin deelneem, vind die hele gemeente natuurlik daarby baat. Pioniers is geneig om oor hulle ondervindinge te praat en ander te nooi om saam met hulle aan die bediening deel te neem, en dit dra by tot ’n meer geestelike atmosfeer in die gemeente.

¹⁴ Mag ons almal ‘ryk wees in goeie werke’ gedurende hierdie Gedenkmaalseisoen en daarna deur meer in die Christelike bediening te doen. Laat ons ons waardering toon vir wat Jehovah gedoen het deur ons die hoop te gee om vir ewig op ’n regverdige nuwe aarde te lewe.—2 Pet. 3:13.