Moenie “waardelose dinge” najaag nie
1 Vandag is e-pos ’n gewilde kommunikasiemiddel. Dit is dalk gepas dat familie en vriende hierdie middel gebruik om persoonlike ondervindinge en gedagtes te deel. Maar watter “waardelose dinge” kan gepaardgaan met die onbeperkte gebruik van e-pos?—Spr. 12:11.
2 Waarskuwings in verband met e-pos: Sommige meen dat hulle meer in voeling is met Jehovah se organisasie wanneer hulle sogenaamde nuwe inligting deur middel van e-pos ontvang. Dit kan ondervindinge insluit, asook aantekeninge oor gebeure by Bethel, verslae oor rampe of vervolging en selfs vertroulike inligting wat by Koninkryksbedieningskole vrygestel is. Dit lyk of ander alte gretig is om sulke boodskappe te stuur, omdat hulle graag die eerstes wil wees wat die inligting aan hulle vriende oordra.
3 Dit het al gebeur dat inligting en ondervindinge verdraai of oordryf word. Of dalk het party, omdat hulle die inligting sensasioneel probeer maak het, ’n verkeerde indruk geskep. Diegene wat haastig is om sulke sake bekend te maak, beskik dikwels nie oor al die feite nie (Spr. 29:20). In sommige gevalle word die storie, al is dit ongeloofwaardig, as ’n sappige brokkie aangestuur. Sulke onjuiste of misleidende berigte kom op “valse stories” neer, wat nie ware godvrugtige toegewydheid bevorder nie.—1 Tim. 4:6, 7.
4 As jy inligting aanstuur en dit later blyk dat dit nie waar is nie, dra jy ’n mate van verantwoordelikheid vir die hartseer of verwarring wat dit kan veroorsaak. Toe Dawid ’n berig ontvang het waarin daar oordryf is dat al sy seuns doodgemaak is, het hy uit droefheid “sy klere geskeur”. Maar in der waarheid het net een van sy seuns gesterf. Dit was alreeds erg genoeg, maar hierdie oordrywing het dit vir Dawid nog moeiliker gemaak (2 Sam. 13:30-33). Ons wil sekerlik niks doen wat enige van ons broers sal mislei of ontmoedig nie.
5 God se aangestelde kanaal: Hou in gedagte dat ons hemelse Vader ’n aangestelde kommunikasiekanaal het, “die getroue en verstandige slaaf”. Hierdie “slaaf” het die verantwoordelikheid om te bepaal watter inligting aan die huisgenote van die geloof beskikbaar gestel moet word, asook “die regte tyd” waarop dit gedoen moet word. Hierdie geestelike voedsel word slegs deur die teokratiese organisasie voorsien. Ons moet altyd op God se aangestelde kanaal staatmaak vir betroubare inligting, en nie op ’n netwerk van Internetgebruikers nie.—Matt. 24:45.
6 Webwerwe op die Internet: Ons het ’n amptelike webwerf op die Internet: www.watchtower.org. Dit voorsien voldoende inligting aan die publiek. Dit is nie nodig dat enige individu, komitee of gemeente ’n webblad oor Jehovah se Getuies skep nie. Party het die inhoud van ons publikasies met al die tekste en volledige verwysings op die Internet gesit en het selfs afskrifte van byeenkomsmateriaal teen ’n bydrae aangebied. Of wins gemaak word of nie, dit is ’n skending van kopieregwette om publikasies van Jehovah se Getuies in ’n elektroniese dokument te reproduseer en te versprei. Hoewel party dit as ’n diens aan die broers beskou, word dit nie goedgekeur nie en moet dit gestaak word.
7 As ons goeie oordeel aan die dag lê en gesonde verstand gebruik wanneer ons van elektroniese kommunikasiemiddele gebruik maak, sal dit verseker dat ons verstande met “kosbare en lieflike dinge van waarde” gevul is.—Spr. 24:4.