Wees heilig in julle hele gedrag
1. Waarom is dit belangrik om in ons hele gedrag heilig te wees?
1 As knegte van die heilige God, Jehovah, streef ons daarna om in ons hele gedrag heilig te wees (1 Pet. 1:15, 16). Dit beteken dat ons Jehovah se standaarde in alle aspekte van ons lewe probeer handhaaf. Die streekbyeenkoms sal ons vanjaar ’n besondere geleentheid bied om heilige gedrag te openbaar.
2. Hoe kan ons goeie gedrag by ons verblyfplek openbaar?
2 Huisvesting: Die plaaslike huisvestingsafdeling het baie tyd daaraan bestee om gepaste verblyf vir die besoekende byeenkomsgangers te reël. Moet asseblief nie meer huisvesting bespreek as wat jy nodig het nie, hetsy jy in ’n hotel, gastehuis, karavaanpark of privaat woning tuisgaan. Indien dit vereis word, moet die verlangde deposito vooruitbetaal word. By party hotelle en gastehuise is aankoms- en vertrektye baie besig, en daarom word dit baie waardeer as ons die vrugte van die gees openbaar. As jy jou verblyf moet kanselleer, moet jy dit onmiddellik doen. Onthou om ’n fooitjie te gee as jy goeie diens ontvang.
3. Hoe kan die gedrag van jonger Getuies ander beïndruk?
3 Ons goeie maniere kan ’n kragtige getuienis gee. Verlede jaar het ’n jong Getuie ’n hotelontvangsklerk beleef om skryfbehoeftes gevra en haar toe bedank. Dit het die klerk beïndruk, en iemand het haar hoor sê: “Jy sien net nie meer jongmense met sulke goeie maniere nie.” Maar in ’n paar gevalle is daar gesien dat kinders sonder toesig swem, in hysers speel, hard praat en in die gange hardloop. Kinders moenie aan hulleself oorgelaat word nie, maar ouers moet oor hulle toesig hou en seker maak dat hulle gedrag lof aan Jehovah bring.—Spr. 29:15.
4. Hoe kan ons bedagsaam teenoor ander wees wanneer ons uiteet?
4 In restaurante: ’n Kelner in ’n restaurant naby ’n streekbyeenkoms het gesê: “Getuies is anders. Hulle toon respek vir ander.” Goeie gedrag sluit in dat ons ander wat besig is om te eet, nie steur deur hard te praat en te lag nie. Ons moet ook in gedagte hou dat dit op baie plekke gebruiklik is om ’n fooitjie te gee na gelang van die diens. Selfs wanneer ons eet en drink, wil ons alles tot heerlikheid van God doen.—1 Kor. 10:31.
5. Wat sluit goeie gedrag by die byeenkomsterrein in?
5 By die byeenkoms: Ons goeie gedrag moet veral by die byeenkoms duidelik gesien kan word. Gee die saalwagters en die broers wat met die parkering help asseblief jou samewerking (Heb. 13:17). Gesinne moet bymekaar sit en liewer nie hulle kinders, met inbegrip van tieners, by groepe ander jongmense laat sit nie. Geen opneemtoerusting mag aan die byeenkomsterrein se elektriese of klankstelsels gekoppel word nie, en sulke toerusting mag net gebruik word op ’n manier wat ander nie steur nie. As jy van plan is om foto’s te neem, moet jy nie gedurende die sessies ’n flits gebruik nie. Roepradio’s en selfone moet gestel word sodat dit ander nie steur nie. As jy ’n ongeluk op die byeenkomsterrein sien, moet jy ’n saalwagter of die Noodhulpafdeling asseblief daarvan in kennis stel.
6. Hoe word God deur ons gedrag by byeenkomste verheerlik?
6 Ons gedrag maak ons afgeskeie van ander en verheerlik ons God (1 Pet. 2:12). By die byeenkoms sal die gedrag van Jehovah se Getuies deur baie mense gesien word. Wees dus vasbeslote om in jou hele gedrag heilig te wees.
[Venster op bladsy 9]
Openbaar heilige gedrag
◼ Volg al die hotelreëls
◼ Hou goed toesig oor kinders
◼ Wees bedagsaam teenoor ander