Vraebus

◼ Is dit gepas dat een van Jehovah se Getuies behandeling en sorg ontvang by ’n hospitaal of verpleeginrigting wat deur ’n godsdiensorganisasie bestuur word?

Verskeie godsdiensorganisasies bestuur hospitale of verpleeginrigtings wat mediese behandeling of langtermynsorg voorsien. Oor die algemeen word sulke fasiliteite nie gestig met die spesifieke doel om Babilon die Grote te bevorder nie (Op. 18:2, 4). Dit is dalk oorspronklik op die been gebring om ’n bron van inkomste vir die godsdiensorganisasie te wees. Vandag is party hospitale slegs in naam godsdienstig, terwyl ander nog steeds geestelikes as deel van hulle personeel het.

As een van Jehovah se Getuies in ’n hospitaal of verpleeginrigting versorg moet word, moet hy self besluit of hy na ’n fasiliteit sal gaan wat moontlik verbintenisse met ’n godsdiensorganisasie het. Die gewete van een persoon sal hom dalk toelaat om dit te doen, maar die gewete van ’n ander dalk nie (1 Tim. 1:5). Daar is sekere omstandighede wat ’n invloed op ’n mens se besluit kan hê, en dit sal goed wees om dit te oorweeg.

Byvoorbeeld, ’n hospitaal of verpleeginrigting met ’n godsdienstige naam is dalk die enigste een in die omgewing. Of as daar ’n ander fasiliteit daar naby is, is die een wat moontlik godsdiensverbintenisse het, dalk daarvoor bekend dat dit beter diens lewer. So ’n hospitaal met ’n godsdienstige naam is dalk die enigste een wat toegerus is om die spesifieke behandeling te voorsien wat nodig is, of dit is dalk die enigste hospitaal waar jou dokter of chirurg na pasiënte kan omsien. Nog iets om in gedagte te hou, is dat hospitale met godsdiensverbintenisse soms jou Christelike beskouing van die gebruik van bloed sal respekteer, terwyl party privaat- of staatshospitale dit dalk nie sal doen nie. Dit is dus ’n paar faktore wat jy in ag moet neem wanneer jy besluit watter fasiliteit jy gaan gebruik.

As jy besluit om ’n hospitaal of verpleeginrigting te gebruik wat godsdiensverbintenisse het, beskou jy dit dalk as blote betaling vir dienste wat gelewer is. Jy kan dit beskou asof die godsdiensorganisasie ’n sekere besigheid bedryf, en deur ’n diens by so ’n besigheid te koop, sou jy nie ’n direkte, vrywillige bydrae maak tot die ondersteuning van valse godsdiens nie. Jy sou eenvoudig betaal vir ’n produk of ’n diens.

As ’n Christen moet jy natuurlik onder sulke omstandighede absoluut seker maak dat jy nie aan enige daad van valse aanbidding deelneem nie. Jy sou ook nie gewone godsdienstitels, soos “Vader” of “Suster”, gebruik teenoor mense wat by die fasiliteit werk of dit besoek nie (Matt. 23:9). Jy sal moet sorg dat dit slegs ’n besigheidsreëling is waarin jy behandeling en diens ontvang, en niks meer nie.

Wanneer jy in die hospitaal opgeneem word, kan jy aandui dat jy een van Jehovah se Getuies is en dat jy graag besoek wil word deur die plaaslike ouer manne. Dit sal verseker dat jy tydens jou verblyf in die hospitaal behoorlike geestelike ondersteuning kry.—1 Tess. 5:14.

Gelowige gesinslede, plaaslike ouer manne en ander in die gemeente moet op ’n verantwoordelike wyse omsien na die geestelike behoeftes van bejaarde broers en susters wat in ouetehuise woon, veral wanneer dit deur ’n godsdiensorganisasie bestuur word. Pligsgetrouheid in hierdie opsig sal vir sulke ouer broers en susters baie bemoedigend wees en sal keer dat hulle onverhoeds betrek word by dienste, vierings of ander soortgelyke aktiwiteite wat by sulke fasiliteite gehou word.

Met hierdie punte in gedagte moet elkeen al die betrokke faktore oorweeg en dan sy eie besluit neem aangaande watter hospitaal, verpleeginrigting of ouetehuis hy sal gebruik.—Gal. 6:5.