Hou diegene in ouetehuise in gedagte
1. Waarom moet ons diegene wat in ouetehuise woon, met die goeie nuus probeer bereik?
1 Baie mense het te kampe met die verswakkende gevolge van veroudering (Pred. 12:1-7). Party bejaardes woon in ouetehuise, en daarom is dit nie altyd vir ons moontlik om hulle deur middel van die huis-tot-huis-bediening te bereik nie. Dit is selfs die geval in lande waar bejaarde ouers gewoonlik by hulle kinders of ander familielede woon. Hoewel bejaardes en ander wat in ouetehuise woon, dalk beperk is ten opsigte van hulle beweeglikheid en geheue, is dit nogtans vir hulle moontlik om van Jehovah leer, hom te waardeer en hom lief te kry. Hoe kan ons die goeie nuus oor “die gelukkige hoop” aan hulle bekend maak?—Tit. 2:13.
2. Hoe kan ons ’n lys opstel van verpleeginrigtings wat ons kan besoek?
2 Waar om te begin: Gewoonlik kan ’n lys van verpleeginrigtings opgestel word deur in die plaaslike telefoongids te soek. Kyk onder afdelings soos “ouetehuise”, “verpleeginrigtings” en “aftreeoorde”. Die diensopsiener kan die leiding daarin neem om te reël dat bekwame verkondigers elke fasiliteit besoek. Met goeie beplanning en vertroue in Jehovah is dit dikwels moontlik om ’n Bybelstudiegroep te begin.—Spr. 21:5; 1 Joh. 5:14, 15.
3, 4. (a) Wie moet ons nader om ’n groepstudie te reël? (b) Hoe kan ons verduidelik hoe die studiereëling werk?
3 Die manier waarop die studie gereël word, word bepaal deur die soort fasiliteit. By groot fasiliteite met baie inwoners en personeellede is dit die beste om na die ontvangs te gaan en te vra om met die bestuur te praat. By party klein verpleeginrigtings vir bejaardes—huise met min inwoners en twee of drie versorgers—is dit dalk die beste om ’n tyd af te spreek om direk met die eienaar van die huis te praat.
4 Hoe dit ook al sy, verduidelik dat jy jou tyd aanbied om mense aan te moedig wat daarvan hou om te lees en Bybelverslae te bespreek. Vra of enige van die inwoners dalk daarin sal belangstel om een keer per week vir ongeveer 30 minute aan ’n groepbespreking van die Bybel deel te neem. ’n Verskeidenheid publikasies kan gebruik word, maar baie vind dat My boek met Bybelverhale en Die grootste mens wat nog geleef het by mense byval vind. Jy sal die publikasies dalk vir die bestuur wil wys. Die dag, tyd en vergaderplek kan met hom of haar gereël word en sal gewoonlik op ’n rooster van die ouetehuis se aktiwiteite verskyn. Moenie skaam wees om jou as een van Jehovah se Getuies te identifiseer nie. Help die bestuur nietemin om te verstaan dat jy nie kom om ’n kerkdiens te hou nie, maar eerder om Bybelonderrig te bevorder.
5. Watter praktiese wenke sal die studie aangenaam en leersaam maak?
5 Hoe om die studie te hou: Hoe jy die studie hou, hang af van die omstandighede en omgewing by die fasiliteit, en daarom moet jy aanpasbaar wees en onderskeidingsvermoë aan die dag lê. Die studiehouer moet ’n hele paar eksemplare van die publikasie wat bespreek word, saamneem en moet dit ná die studie weer insamel. Dit sal dalk nodig wees om ’n paar eksemplare van die grootdrukuitgawe saam te neem. Die studie kan gehou word soos ons dit gewoonlik doen deur die paragrawe te lees, vrae te vra en die studente te laat antwoord. Dié wat gewillig is en dit kan doen, kan gevra word om die paragrawe of Bybelgedeeltes te lees. Probeer om almal by die studie te betrek en wees positief en vriendelik. Met die bestuur se toestemming kan jy van tyd tot tyd een van die organisasie se video’s wys wat geloof in die Bybel opbou of lesse uit ’n spesifieke Bybelverslag beklemtoon. Dit sal dalk moontlik wees om die studie met ’n eenvoudige gebed te open en af te sluit. Party verkondigers sing selfs Koninkryksliedere.
6. Hoe kan ons dit hanteer as iemand nie saamstem met iets wat gedurende die studie gelees of gesê is nie?
6 Sê nou iemand stem nie saam met iets wat gedurende die studie gelees of gesê is nie? Gebruik onderskeidingsvermoë wanneer jy antwoord (Kol. 4:6). Dalk kan jy ’n kort Bybelteks lees wat sy vraag sal beantwoord. As dit nie prakties is nie, sal dit die beste wees om kennis te neem van sy kommentaar en aan te bied om die saak ná die studie met hom te bespreek.
7. Wat kan jy doen as ’n inwoner ’n vraag het of buitengewone belangstelling toon?
7 Soms sal ’n inwoner dalk ’n vraag vra of ’n begeerte uitspreek om meer te leer. Een suster gebruik hierdie benadering: “Dis ’n baie goeie vraag. Maar aangesien dit iets is waaroor jý meer wil weet, kom ons wag totdat ons klaar gelees het. Dan kan ek en jy dit bespreek.” Dit is dikwels moontlik om te reël om op ’n ander tyd en plek ’n persoonlike Bybelstudie met belangstellendes te hou.
8. Hoe moet groepstudies en enige persoonlike Bybelstudies wat daaruit voortspruit, gerapporteer word?
8 Dit is gewoonlik die beste dat dieselfde Getuies elke keer die groepstudie by die fasiliteit hou. Al die verkondigers wat hieraan deelneem, kan die tyd rapporteer. Wanneer die studie gereeld gehou word, kan die verkondiger wat die leiding neem, een herbesoek rapporteer vir elke keer dat die groepstudie gehou word en elke maand een Bybelstudie rapporteer. Bybelstudies wat begin word met individuele inwoners wat kan verstaan en leer, kan op die gewone manier gerapporteer word.
9, 10. Watter eienskappe moet verkondigers aan die dag lê wat aan hierdie werk deelneem? Verduidelik.
9 Hou dit gereeld: Dit is die beste om die groepstudie op ’n spesifieke dag en tyd te hou. Die inwoners en personeel sal verwag dat die studie gereeld gehou word en dat dit stiptelik begin en afgesluit word (Matt. 5:37). Daarom is toewyding, vlytigheid en organisering nodig. Die ondervinding het geleer dat dit die beste is as twee bekwame verkondigers saamwerk om die groepstudie te hou (Pred. 4:9, 10). In groot fasiliteite sal meer verkondigers dalk nodig wees.
10 Vriendelikheid en persoonlike belangstelling is ook belangrik (Fil. 2:4). Tydens die eerste besoek moet jy die tyd neem om elke inwoner wat die studie bywoon, te ontmoet. Maak ’n aantekening van hulle name of probeer om dit voor die volgende studie te memoriseer. Maar party bejaardes neem aanstoot wanneer iemand wat hulle nie ken nie, hulle op hulle eerste naam noem. Geduld en medelye sal almal laat voel dat hulle welkom is en waardeer word.
11. Hoe kan dié wat die groepstudie hou, aan die personeellede en die inwoners se familielede respek betoon?
11 Dit is ook belangrik om respekvol en vriendelik te wees teenoor die personeellede en die inwoners se familielede. Wanneer vaste reëlings vir die studie getref is, sal dit wys wees om nie die tyd en formaat van die studie te verander sonder om dit eers met die bestuur te bespreek nie. Vra die bestuur van tyd tot tyd vir hulle mening oor hoe die studie vaar. Wanneer familielede gedurende die studie besoek aflê, moet jy die inisiatief neem om hulle te ontmoet. Verduidelik die doel van die Bybelstudie aan hulle. Verseker hulle van jou opregte belangstelling in hulle familielid. Nooi hulle om die studie by te woon en na die bespreking te luister.
12, 13. Vertel ondervindinge wat toelig watter voordele dit inhou om in ouetehuise te getuig.
12 Resultate: Volgens reisende opsieners en gemeentes lewer hierdie aspek van die bediening aanmoedigende resultate op. In een geval het ongeveer 20 inwoners die eerste bespreking bygewoon. Dit het ses individuele Bybelstudies tot gevolg gehad. Een persoon is uiteindelik gedoop. In ’n ander geval is ’n 85-jarige vrou beweeg om met die plaaslike gemeente te assosieer en het sy haar begeerte uitgespreek om gedoop te word. Toe een fasiliteit besluit het om sy aktiwiteite saam te smelt—wat sou beteken dat die groepstudie sou ophou—het die inwoners by die bestuur gaan kla! Uiteindelik is die studie voortgesit, en daarna het tussen 25 en 30 mense dit bygewoon.
13 Die liefde wat ons aan diegene in ouetehuise betoon, maak nie net op hulle ’n diep indruk nie. Dit is byvoorbeeld nie ongewoon dat personeellede die studie bywoon en selfs daaraan deelneem nie. Die pogings wat ons aanwend om persoonlike belangstelling te toon in diegene wat in ouetehuise woon, lewer ook in die gemeenskap ’n goeie getuienis (1 Pet. 2:12). Nadat die doel van die studie aan een bestuurslid verduidelik is, het hy gesê: “Hoekom kom julle nou eers? Wanneer kan julle begin?” ’n Ander bestuurslid het geskryf: “Ek sal hierdie groepstudie heelhartig aan enige . . . verpleeginrigting aanbeveel. Jehovah se Getuies voorsien hierdie gratis diens as deel van hulle bediening in die gemeenskap.” ’n Ouetehuis in Hawaii het ’n Toekenning vir Vrywillige Diens aan Jehovah se Getuies gegee waarin hulle as ’n “kosbare skat” vir die mense in daardie fasiliteit beskryf word.
14. Waarom is dit vir ons belangrik om diegene wat in ouetehuise woon, te bereik?
14 Bejaardes word deur Jehovah genooi om hom te loof (Ps. 148:12, 13). Hierdie uitnodiging word ook gerig aan diegene in ouetehuise. Is daar ouetehuise in julle gebied waar bejaardes daarby kan baat vind om die goeie nuus te hoor? Met behulp van die plaaslike ouer manne en die bestuur van die ouetehuise sal ons moontlik ’n goeie getuienis aan hulle kan gee. Wanneer ons bejaardes in gedagte hou, volg ons Jehovah na.—Ps. 71:9, 18.