‘Getuig deeglik’—In veiligheidskomplekse en woonstelgeboue
1. Wat behels dit om “deeglik van die goeie nuus . . . te getuig”?
1 Soos die apostel Paulus, is dit ons begeerte om “deeglik van die goeie nuus . . . te getuig” (Hand. 20:24). Ons probeer dus om soveel mense moontlik in ons gebied met die Koninkryksboodskap te bereik. Dit sluit die groot aantal mense in wat in veiligheidskomplekse, woonstelgeboue en afgesperde woongebiede woon. Dit kan soms ’n uitdaging wees om toegang te verkry tot dié wat in sulke plekke woon. Maar aangesien veiligheidskomplekse en woonstelgeboue ’n hoë konsentrasie van mense het, bied dit ons baie geleenthede om die goeie nuus te verkondig.
2. Waarom is takt en goeie oordeel nodig wanneer ons in veiligheidskomplekse en woonstelgeboue getuig?
2 Weens die bedreiging van misdaad en geweld word al hoe meer woonstelgeboue gesluit en deur veiligheidswagte bewaak of met waarnemingskameras toegerus (2 Tim. 3:1, 2). Die bestuur het dalk ’n beleid dat ongenooide persone nie op die perseel toegelaat mag word nie. ’n Opsigter of bestuurder sal dalk geneig wees om ons te vra om die perseel te verlaat, veral as een van die inwoners kla. Dit is dus belangrik dat ons taktvol optree en goeie oordeel aan die dag lê.
3. Wanneer is die beste tyd om in woonstelgeboue te gaan werk, en waarom?
3 Wanneer om daar te werk: Soos met ander soorte gebied, word die beste resultate verkry wanneer die inwoners waarskynlik tuis is. Ons wek dalk agterdog as ons daar is terwyl die meeste mense nie tuis is nie. Baie verkondigers het mense vroegaand tuis gevind sowel as gedurende Saterdag- en Sondagmiddae. As ons te vroeg in hierdie komplekse en woonstelgeboue werk, veral oor die naweke, sal mense dalk by die bestuur gaan kla.
4, 5. Hoe kan ons toegang verkry tot party veiligheidskomplekse of woonstelgeboue waarvan die ingang gesluit is?
4 Hoe om daar in te kom: Verkondigers moenie met die opsigter of enige ander personeel in aanraking kom voordat hulle begin velddiens doen nie. As die gebou gesluit is en daar ’n interkom by die ingang is, kan ons dit gebruik om iemand te vind wat sal instem om ons te laat inkom sodat ons met hom kan praat. Afhangende van die soort veiligheidskompleks of woonstelgebou kan ons ander deur-tot-deur-besoeke in die gebou of kompleks doen nadat ons met die persoon gepraat het wat ons laat inkom het. Maar in ander gevalle sal dit verstandig wees om uit die gebou of kompleks te gaan en die interkom te gebruik om met die volgende inwoner kontak te maak. Ons moet goeie oordeel aan die dag lê wanneer ons besluit hoeveel inwoners ons by dieselfde geleentheid op hierdie manier wil kontak.
5 Party inwoners verkies dalk dat jy vir hulle oor die interkom sê wat die rede vir jou besoek is. Indien wel, moet jy jou vriendelik voorstel. Gebruik die persoon se naam as dit op die interkom aangegee word. Meld kortliks jou onderwerp. Party het sukses behaal deur ’n inleiding direk uit die Redenering-boek te lees.
6. Wat moet ons doen wanneer ons in geboue werk waar daar ’n deurwagter of veiligheidswag is?
6 As die gebou ’n deurwagter of veiligheidswag het wat ons nie toelaat om daar te werk nie, kan ons vir hom probeer getuig. Baie deurwagters en veiligheidswagte hou daarvan om ons lektuur te lees. Ons kan selfs ’n Bybelstudie begin en dit in die voorportaal hou. As die deurwagter ons toelaat om ’n spesifieke inwoner te besoek wat belangstelling toon, is dit gewoonlik raadsaam om ons nie die vryheid te veroorloof om aan ander deure in die gebou te klop nie.
7. Wat moet ons in gedagte hou in verband met ons velddienssak?
7 Voorkoms en gedrag: Groot velddienssakke vol lektuur kan baie aandag trek. Om hierdie rede kan ons ’n sak gebruik wat minder opsigtelik is of selfs sonder ’n sak werk. Party verkondigers sit die lektuur wat hulle wil aanbied in ’n dun portefeulje en dra hulle Bybel in hulle hand of baadjiesak.
8. Hoe moet die groep georganiseer word wanneer hulle in woonstelgeboue getuig?
8 Dit sal goed wees om nie in groot groepe bymekaar te kom nie, veral nie in voorportale of parkeerterreine nie, omdat dit onnodig aandag sal trek. Gepaste voorsorgmaatreëls moet getref word wanneer ons in woonstelgeboue getuig wat in ’n gebied met ’n hoë misdaadsyfer is (Spr. 22:3). Twee of drie pare verkondigers kan byvoorbeeld op dieselfde vloer binne hoorafstand van mekaar werk en dalk beurte maak om aan ’n deur te klop terwyl die ander vir hulle wag.
9. Hoe kan ons bedagsaam wees, en waarom is dit belangrik?
9 Wanneer jy by ’n woonstelgebou ingaan, moet jy jou voete afvee en seker maak dat die deur agter jou toegemaak is. Deur sulke bedagsaamheid te toon, gee ons die inwoners minder rede om te kla. Wanneer jy binne is, moet jy reguit na die hysbak gaan of na die vloer waarop julle beplan om te werk eerder as om in die ingang rond te staan. Dit sal keer dat enigiemand wat julle sien, agterdogtig word.
10. Hoe kan ons voorkom dat ons onnodige geraas in die gange maak?
10 In baie geboue kan geraas in die gange maklik in die woonstelle gehoor word. Moet dus nie harder praat as wat nodig is om maklik deur die inwoner gehoor te word nie. Wanneer jy met ander verkondigers praat, moet jy nie te hard praat nie maar op ’n kalm, natuurlike manier sodat jy nie agterdog wek nie. Om te voorkom dat die inwoners onnodig gesteur word, klop party verkondigers nie aan een deur na die ander nie, maar eerder om die beurt aan ’n deur aan die een punt van die gang en dan aan ’n deur aan die ander punt, totdat hulle al die deure op die vloer besoek het. En as ’n mens hard of gebiedend aan die deur klop, kan dit dié wat binne is, laat skrik.
11. Watter wenke kan nuttig wees wanneer ons aan ’n deur met ’n loergaatjie klop?
11 As die deur ’n loergaatjie het, moet jy so staan dat enigiemand wat daardeur kyk, jou en jou metgesel kan sien. Kyk reguit na die loergaatjie, en as jy kan sien dat iemand daardeur kyk, kan jy hom hartlik groet en met jou aanbieding begin. As die persoon vra: ‘Wie is dit?’ sal dit dalk goed wees om jou naam te verstrek sowel as die naam van die een wat saam met jou is. Die inwoner sal dan miskien meer gerus voel en die deur oopmaak. Indien nie, kan jy nog steeds jou aanbieding deur die deur doen.
12. Hoe kan ons probleme vermy wanneer ons lektuur by nietuise laat?
12 Wanneer mense nie tuis is nie: Opsigters kla dikwels dat hulle lektuur in die gange of op die terrein moet optel. Lektuur wat buite die deur gelaat word, kan maklik op die grond val en rommel word. Enige lektuur wat by nietuise gelaat word, moet dus op ’n heeltemal onopsigtelike plek gesit word.
13. Wat moet ons doen as ons ’n ontstoke inwoner teëkom?
13 Ontstoke inwoners: As ons ’n ontstoke inwoner teëkom wat dalk die opsigter wil roep, is dit goed om daardie spesifieke vloer te verlaat en by ’n ander geleentheid terug te keer. In ander gevalle sal dit verstandig wees om die gebou heeltemal te verlaat sodat ons ’n moontlike konfrontasie met die opsigter kan vermy. Al versoek die inwoner nie uitdruklik dat ons hom nie in die toekoms moet besoek nie, sal dit beter wees om ’n nota van die woonstelnommer te maak, aan te dui dat hy nie besoek moet word nie en die nota dan by die gebiedskaart in te sluit. Soos ons gewoonlik in sulke gevalle doen, moet hierdie adresse van tyd tot tyd besoek word om uit te vind of die inwoner nog dieselfde voel.
14, 15. Wat moet ons doen as ’n verteenwoordiger van die woonstelgebou ons vra om die perseel te verlaat?
14 As jy gevra word om die perseel te verlaat: As jy in ’n gebou werk en deur die opsigter, veiligheidspersoneel, instandhoudingspersoneel of enige ander verteenwoordiger van die woonstelgebou gevra word om die perseel te verlaat, is dit verstandig om dadelik daarop ag te slaan. Waar ook al moontlik wil ons konfrontasie vermy wat daartoe kan lei dat mense dreig om regstappe te doen of die polisie bel. In die meeste gevalle is die personeel nie bevooroordeeld teen Jehovah se Getuies nie—hulle doen eenvoudig hulle werk.
15 Jy sal dalk soms, wanneer ’n verteenwoordiger van die gebou jou vra om die perseel te verlaat, op ’n vriendelike en taktvolle manier kan verduidelik waarom jy daar is (1 Pet. 3:15). Ons besef dat hy die verantwoordelikheid het om die inwoners gelukkig te hou en die veiligheid van die gebou te verseker. Dalk sal hy jou toelaat om in die gebou te bly. Maar indien nie, moet jy die perseel verlaat sonder om te argumenteer. As omstandighede dit toelaat, kan jy toestemming vra om lektuur gereeld in die voorportaal of wassery te laat (Kol. 4:6). Die diensopsiener moet op hoogte gehou word van sulke gevalle.
16. Wat moet ons doen as daar nog steeds probleme is wanneer ons probeer om in ’n woonstelgebou of kompleks te werk?
16 Verkondigers kan, ná ’n redelike tydperk, weer probeer om in die gebou te werk sonder om onnodig aandag te trek. Maar as daar nog steeds probleme is, moet die ouer manne met die takkantoor in verbinding tree eerder as om dit aan die verkondigers oor te laat om die probleem op te los. As verkondigers nie in die woonstelgeboue of veiligheidskomplekse kan werk nie, kan hulle op ander maniere met die inwoners in aanraking probeer kom, soos byvoorbeeld deur telefoongetuieniswerk te doen of briewe te skryf. Party verkondigers doen straatgetuieniswerk voor of naby die woonstelgebou gedurende die oggend- en aandure wanneer mense gewoonlik werk toe gaan of huis toe kom.
17. Waarom is dit belangrik dat ons in veiligheidskomplekse, woonstelgeboue en afgesperde woongebiede getuig?
17 Die einde van hierdie bose stelsel is naby. Net dié wat die naam van Jehovah aanroep, sal gered word. “Maar hoe sal hulle hom aanroep in wie hulle nie geloof gestel het nie? En hoe sal hulle geloof stel in hom van wie hulle nie gehoor het nie?” (Rom. 10:13, 14). Baie wat “die regte gesindheid vir die ewige lewe” het, woon in veiligheidskomplekse, woonstelgeboue en afgesperde woongebiede (Hand. 13:48). As ons taktvol is en goeie oordeel aan die dag lê, kan ons hulle met die goeie nuus bereik.