Vraebus

◼ Hoe kan ons seker maak dat ons tydens gemeentelike vergaderinge by die tydreëling bly?

Die tyd gaan gou verby wanneer ons oor opbouende dinge met ons vriende gesels. Dit kan dus ’n uitdaging wees om vergaderingdele binne die toegewese tyd af te handel. Wat kan ons help?

Begin op tyd. Wanneer die hele gemeente bymekaarkom, sal dit dalk nuttig wees om die gehoor ’n minuut of twee voor die program begin, te nooi om hulle sitplekke in te neem sodat die vergadering op die aangewese tyd en op ’n ordelike wyse kan begin (Pred. 3:1). Vergaderinge wat uit kleiner groepe bestaan, soos velddiensvergaderinge, moenie ter wille van laatkommers vertraag word nie.

Berei deeglik voor. Voorbereiding is belangrik as ’n mens by die tydreëling wil bly. Hou die doel van die toewysing duidelik in gedagte. Identifiseer die hoofpunte en laat dit uitstaan. Moenie deur onbelangrike besonderhede afgelei word nie. Hou die aanbieding eenvoudig. As die deel demonstrasies of onderhoude insluit, moet dit voor die tyd geoefen word. Kyk, indien moontlik, hoe lank jou deel is terwyl jy dit hardop oefen.

Verdeel jou materiaal. Hetsy jou toewysing ’n toespraak of ’n gehoorbespreking is, jy sal dit dalk nuttig vind om die materiaal op te deel. Besluit hoeveel tyd jy aan elke deel wil wy, en dui dit in die kantruimte van jou aantekeninge aan. Let dan op jou tydreëling gedurende die aanbieding. Tydens ’n gehoorbespreking moet jy die slaggat vermy om in die inleiding soveel mense te vra om kommentaar te lewer dat jy later deur belangriker materiaal moet jaag. Wagtoring-studiehouers moet genoeg tyd toelaat om die hersieningsvenster aan die einde te bespreek. Hulle moet ook versigtig wees om nie die tyd te gebruik wat vir die lied en slotgebed bedoel is nie.

Eindig op tyd. As ’n vergadering, soos die Diensvergadering, uit verskeie dele bestaan, moet elke spreker bewus wees van wanneer sy deel moet begin en eindig. Wat kan gedoen word as programdele oortyd gaan? Een of meer van die broers kan dalk vir die verlore tyd vergoed deur net die hoofpunte te beklemtoon en van die minder belangrike punte uit te laat. Die vermoë om dit te doen, is ’n kenmerk van ’n vaardige onderrigter.

Ons kan die broer wat die vergadering lei, se taak vergemaklik deur ons antwoorde kort en saaklik te hou. Ons almal kan dus bydra tot vergaderinge wat “welvoeglik en volgens reëling” geskied.—1 Kor. 14:40.