Augustus—’n Geskiedkundige maand van bedrywigheid!

1. Watter spesiale kampanje sal wêreldwyd gehou word met die oog op die 100ste herdenking van die Koninkryk?

¹ Die 100ste herdenking van die geboorte van God se Koninkryk kom nader. Hoe gepas is dit tog dat ons Jehovah deur middel van ’n spesiale kampanje eer! Gedurende Augustus sal ons deelneem aan ’n wêreldwye verspreiding van die nuwe traktaat Waar kan ons antwoorde op die belangrikste vrae in die lewe vind? Hierdie traktaat spoor lesers aan om hulle tot die Bybel te wend vir die antwoorde en verduidelik hoe jw.org/af hulle kan help.

2. Hoe kan ons Jehovah gedurende Augustus saam met talle ander loof?

² Tot lof van Jehovah: Om verkondigers te help om hulle bediening uit te brei, word daar ’n spesiale vergunning gemaak vir enigeen wat graag gedurende die maand Augustus hulppionierdiens wil doen. Gedurende hierdie maand kan gedoopte verkondigers hulppionierdiens doen deur ’n uurvereiste van 30 uur te bereik. Aangesien Augustus vyf Vrydae, Saterdae en Sondae het, sal baie verkondigers wat gedurende die week sekulêre werk doen of skool toe gaan, hulppionierdiens kan doen. Praat dadelik met die koördineerder van die liggaam van ouer manne as jou progressiewe Bybelstudent of jou kind graag ’n verkondiger wil word. Hoe aanmoedigend sal dit tog vir hulle wees om gedurende hierdie geskiedkundige maand as verkondigers by ons aan te sluit! Hoewel baie gewone pioniers op vakansie gaan gedurende Augustus, nadat hulle aan hulle jaarlikse uurvereiste voldoen het, sal dit dalk vir hulle moontlik wees om hulle rooster aan te pas om ’n volle aandeel aan hierdie spesiale kampanje te hê. Dit is nou die tyd vir gesinne om te bespreek hoe hulle gedurende Augustus saam met talle ander ‘Jehovah sal loof’.—Esra 3:11; Spr. 15:22.

3. Wat is ons hoop in verband met hierdie spesiale kampanje?

³ Hoewel ons in die verlede aan soortgelyke kampanjes deelgeneem het, hoop ons dat hierdie een geskiedkundig sal wees. Kan ons in Augustus nuwe hoogtepunte in die aantal ure, verkondigers en hulppioniers bereik? Mag Jehovah die pogings van sy volk om die grootste getuienis tot nog toe te lewer gedurende die maand Augustus, die einde van die 2014 diensjaar, wêreldwyd seën!—Matt. 24:14.