Hoe om vrede te vind ten spyte van oorlog en gewelddadige konflik
Gary, wat voorheen in die weermag was, sê: “Voordat ek die Bybel studeer het, het ek geen idee gehad hoekom daar so baie wreedheid, ongeregtigheid en moeilikheid in die wêreld is nie. Maar nou het ek innerlike vrede. Ek weet dat Jehovah God die wêreld ’n veilige plek sal maak.”
Gary is nie die enigste een wat so voel nie. Kyk hoe die Bybel ander gehelp het.
DIE BYBEL SÊ: “U, o Jehovah, is goed en vergewe vryelik.” – Psalm 86:5.
HOE DIT HELP: “Hierdie vers verseker my dat Jehovah genadig is. Ek weet dat hy bereid is om my te vergewe vir alles wat ek in die verlede gedoen het toe ek in die oorlog geveg het.” – Wilmar, Colombia.
DIE BYBEL SÊ: “Ek skep nuwe hemele en ’n nuwe aarde en daar sal nie aan die vorige dinge gedink word nie en dit sal ook nie in die hart opkom nie.” – Jesaja 65:17.
HOE DIT HELP: “Ek ly aan posttraumatiese stresversteuring en depressie as gevolg van my ondervindinge in die weermag. Maar hierdie teks herinner my daaraan dat Jehovah binnekort my heeltemal sal laat vergeet van al hierdie slegte herinneringe wat ek het. Hulle sal nie meer in my verstand of hart wees nie. Dit is ’n wonderlike geskenk!” – Zafirah, Verenigde State.
DIE BYBEL SÊ: “Die regverdige sal in sy dae floreer, en daar sal ’n oorvloed van vrede wees totdat die maan nie meer daar is nie.” – Psalm 72:7.
HOE DIT HELP: “Ek dink dikwels oor hierdie woorde. Binnekort sal die nagmerrie van oorlog verby wees, en ons sal nie meer oor die veiligheid van ons geliefdes bekommerd hoef te wees nie.” – Oleksandra, Oekraïne.
DIE BYBEL SÊ: “Julle dooies sal lewe. . . . Word wakker en roep vreugdevol uit, julle wat in die stof woon!” – Jesaja 26:19.
HOE DIT HELP: “Byna al my familielede is doodgemaak gedurende die volksmoord teen die Tutsi’s. Maar hierdie vers verseker my dat ek hulle weer sal sien. Ek sien uit daarna om hulle gelukkige stemme te hoor wanneer hulle opgewek word!” – Marie, Rwanda.
DIE BYBEL SÊ: “Nog net ’n klein rukkie en die goddeloses sal nie meer bestaan nie. . . . Maar die nederiges sal die aarde besit, en hulle sal groot vreugde vind in die oorvloed van vrede.” – Psalm 37:10, 11.
HOE DIT HELP: “Al het die oorlog geëindig, is daar nog steeds ongeregtighede en goddelose mense. Hierdie verse het my baie gehelp. Jehovah sien alles en verstaan my situasie. Hy belowe dat alle swaarkry binnekort tot ’n einde sal kom en dat ons daarvan sal vergeet.” – Daler, Tadjikistan.
Die persone wat in hierdie tydskrif aangehaal word, is onder die miljoene Getuies van Jehovah wat deur die Bybel gehelp is om vrede te vind. Hulle het geleer hoe om haat wat gebaseer is op ras, nasionaliteit en stam te oorkom, asook persoonlike haat (Efesiërs 4:31, 32). Jehovah se Getuies is polities neutraal en weier om aan geweld deel te neem. – Johannes 18:36.
Jehovah se Getuies kry ook ondersteuning van hulle liefdevolle wêreldwye broederskap (Johannes 13:35). Byvoorbeeld, Oleksandra, wat vroeër aangehaal is, moes saam met haar suster na ’n ander land toe vlug as gevolg van oorlog. Sy sê: “Toe ons die grens oorgesteek het, het ons onmiddellik plaaslike Getuies gesien wat daar was om ons te verwelkom. Hulle ondersteuning het ons gehelp om aan te pas om as vlugtelinge in ’n nuwe land te bly.”
Ons nooi jou vriendelik uit om by ons aan te sluit vir ons vergaderinge waar ons oor die Bybel se vreedsame boodskap leer en hoe om dit toe te pas. Besoek jw.org om ’n plek naby jou te kry of vra vir ’n gratis Bybelstudieprogram met een van Jehovah se Getuies, deur die publikasie Geniet die lewe vir ewig! te gebruik.