“In ’n triomftog”
’N TRIOMFTOG was ’n aanskoulike viering van die oorwinning oor ’n vyand. Een van die grootste eerbetonings wat die Romeinse Senaat ’n seëvierende generaal kon gee, was om hom toe te laat om sy oorwinning met so ’n formele, duur optog te vier. Die apostel Paulus meld die triomftog twee maal in sy geskrifte. Maar voor ons na sy woorde kyk, kom ons probeer ons eers so ’n optog voorstel. Stel jou voor hoe skares langs die strate staan terwyl die optog stadig langs die Via Triumphalis beweeg, al met die kronkelende pad teen die heuwel op na die tempel van Jupiter bo-op die Kapitolynse heuwel in Rome.
“Daar was oral tussen die tempels en langs die strate welriekende geure van brandende speserye wat die lug met hulle parfuum gevul het”, het geleerde James M. Freeman geskryf. “In die optog was die senaat en die vernaamste burgers van die staat, wat die oorwinnaar sodoende met hulle teenwoordigheid vereer het. Die rykste oorlogsbuit, soos goud, silwer, allerhande wapens, vaandels, seldsame en duur kunswerke en alles wat die oorwinnaar of die oorwonnene as kosbaar beskou het, is gedra dat die hele stad dit kon sien. Die krygsgevangenes is ook gedwing om deel van die optog te wees. Die generaal ter ere van wie die triomftog verklaar is, het in ’n spesiale strydwa gery wat deur vier perde getrek is. Sy kleed is met goud geborduur en sy tuniek met blomme. In sy regterhand was ’n louriertak en in sy linkerhand ’n septer, terwyl daar op sy kop ’n krans van Delfiese lourierblare was. Onder die geskreeu van die soldate en die applous van die mense is die oorwinnaar deur die strate na die tempel van Jupiter gedra, waar offers gebring is en waarna daar ’n openbare fees in die tempel was.”
Paulus het die triomftog as ’n illustrasie gebruik toe hy, in 55 van ons Gewone Jaartelling, sy tweede brief aan Christene in Korinthe geskryf het. Hy het gesê: “God sy dank wat ons altyd in ’n triomftog meevoer in die geselskap van die Christus en die geur van die kennis van hom deur bemiddeling van ons in elke plek waarneembaar maak! Want vir God is ons ’n welriekende geur van Christus onder dié wat gered word en onder dié wat vergaan; vir die laaste ’n geur van die dood tot die dood, maar vir die eerste ’n geur van die lewe tot die lewe.”—2 Korinthiërs 2:14-16, NW.
Hier word Paulus en ander gesalfde Christene voorgestel as toegewyde onderdane van God “in die geselskap van die Christus”. Hulle word voorgestel as seuns, offisiere en soldate wat in Jehovah se optog loop en wat deur hom gelei word in ’n triomftog langs ’n geparfumeerde roete. (Sien Die Wagtoring, 15 Julie 1990, bladsye 10-15.) Hierdie figuurlike gebruik van so ’n optog toon ook dat diegene wat die goeie nuus van God se Koninkryk verwerp net die dood as vooruitsig het. Maar hoe anders is dit tog vir Jesus se gesalfde volgelinge! Hulle het die hoop op redding tot onsterflike hemelse lewe saam met Christus. En wat van hulle lojale metgeselle, wat ook aan God toegewy is? Hulle het die vreugdevolle hoop op die lewe in ’n aardse paradys, waar God “al die trane van hulle oë [sal] afvee, en daar sal geen dood meer wees nie; ook droefheid en geween en moeite sal daar nie meer wees nie” (Openbaring 21:1-4; Lukas 23:43, NW). Is jy onder hierdie vreugdevolle skare?
’n Ander prentjie word in Kolossense 2:15 geskilder, waar Paulus geskryf het: “Nadat [God] die regerings en owerhede naak uitgeklee het, het hy hulle in die openbaar ten toon gestel as oorwonne en hulle deur middel daarvan in ’n triomftog meegevoer” (NW). Hier word vyandelike regerings en owerhede onder Satan die Duiwel as gevangenes in ’n triomftog uitgebeeld. Jehovah die Oorwinnaar sal hulle naak uitklee en in die openbaar as oorwonne ten toon stel. Hulle word “deur middel daarvan”, dit wil sê, deur Jesus se “folterpaal”, oorwin. Sy dood aan die folterpaal het die grondslag voorsien om “die handgeskrewe dokument” (die Wetsverbond) te verwyder en het dit vir Christene moontlik gemaak om van slawerny aan sataniese magte van duisternis bevry te word (Kolossense 2:13, 14, NW). Hoe moet ons tog nie sulke Christelike vryheid waardeer nie!