Hoofstuk 29

Hoe kan ek ophou dink aan seks?

“EK DINK gedurig aan meisies—selfs wanneer hulle nie daar is nie”, sê ’n jong man met die naam Michael. “Dis belaglik. Soms kan ek nie eers konsentreer nie!”

Droom jy, soos Michael, die hele dag oor die teenoorgestelde geslag? As dit die geval is, voel jy dalk dat jy in ’n stryd teen jou eie brein gewikkel is. Gedagtes oor seks dring dalk jou verstand soos vyandelike soldate binne. “Sulke gedagtes kan al jou aandag in beslag neem”, sê Michael. “Dit kan maak dat jy die lang pad na jou kar vat net sodat jy verby ’n oulike meisie kan loop, of dat jy in ’n winkelgang afloop waar jy eintlik niks nodig het nie, net sodat jy iemand van naderby kan bekyk.”

Maar onthou dat seksuele gevoelens op sigself beskou nie sleg is nie. God het immers die man en die vrou geskep met ’n sterk aantrekking vir mekaar, en dis gepas om seksuele begeertes binne die huweliksreëling te bevredig. Terwyl jy nog ongetroud is, ervaar jy dalk intense seksuele drange. As dit gebeur, moet jy nie dink dat jy nou eenmaal sleg is of dat dit vir jou eenvoudig onmoontlik is om sedelik rein te bly nie. Jy kan kuis wees as jy wil! Maar om suksesvol te wees op daardie gebied, moet jy jou gedagtes oor die teenoorgestelde geslag onder beheer hou. Hoe kan jy dit doen?

Kyk wie jou vriende is. Wanneer jou klasmaats oor seks begin praat, kom jy dalk in die versoeking om saam te praat—net sodat jy nie afsteek nie. Maar dan maak jy dit in werklikheid net moeiliker maak om jou gedagtes te beheer. Wat moet jy doen—net opstaan en wegloop? Beslis, en jy hoef nie ongemaklik te voel daaroor nie! Dis dikwels vir jou moontlik om weg te loop sonder om eiegeregtig te lyk en bespotting uit te lok.

Vermy onsedelike vermaak. Nie elke rolprent of CD is natuurlik sleg nie. Nietemin is baie van vandag se vermaak bedoel om ongepaste seksuele gevoelens op te wek. Die Bybel se raad? “Laat ons ons van elke verontreiniging van die vlees en die gees reinig en heiligheid in die vrees van God tot volmaaktheid bring” (2 Korintiërs 7:1). Bly weg van enige vermaak wat onsedelike geslagsdrange kan opwek.a

Die masturbasieprobleem

Party jongmense probeer seksuele opwekking deur middel van masturbasie verlig. Maar dit kan tot ernstige probleme aanleiding gee. Die Bybel spoor Christene aan: “Maak dan dood julle liggaamsdele wat op die aarde is ten opsigte van hoerery, onreinheid, geslagsdrif, skadelike begeertes en hebsug” (Kolossense 3:5). Masturbasie is presies die teenoorgestelde daarvan ‘om geslagsdrif dood te maak’. Trouens, dit stimuleer en voed daardie gevoelens!

Masturbasie kan jou ’n slaaf van jou begeertes maak (Titus 3:3). Een manier waarop jy die gewoonte kan begin oorwin, is deur iemand in jou vertroue te neem. ’n Christen wat jare lank met masturbasie geworstel het, sê: “Ek wens ek kon toe ek nog jonk was die moed bymekaargeskraap het om met iemand daaroor te praat! Skuldgevoelens het my baie jare lank geteister, en dit het my verhouding met ander, en bowenal met Jehovah, ernstig aangetas.”

Met wie moet jy praat? ’n Ouer is dikwels die logiesste keuse. Of dalk kan ’n geestelike ryp lid van die Christengemeente jou help. Jy kan begin deur te sê: “Ek wil graag met jou praat oor ’n probleem wat my baie pla.”

André het met ’n Christen- ouer man gepraat, en hy is bly hy het dit gedoen. “Terwyl die ouer man na my geluister het, het sy oë vol trane geskiet”, sê André. “Toe ek klaar was, het hy my verseker dat Jehovah my liefhet. Hy het gesê dat my probleem algemeen is. Hy het belowe om van tyd tot tyd te vra hoe dit gaan en om meer inligting uit Bybelstudiehulpe vir my te bring. Nadat ek met hom gepraat het, het ek my voorgeneem om vol te hou met die stryd—al val ek weer terug.”

Mário het besluit om met sy pa te praat, wat baie simpatie en begrip getoon het. Hy het selfs aan Mário erken dat dit vir hom ook moeilik was om die gewoonte te bowe te kom toe hy jonk was. “My pa se eerlikheid en opregtheid het my baie aangemoedig”, sê Mário. “Ek het geredeneer, as hy kon oorwin, kan ek ook. My pa se gesindheid het my so diep getref dat ek begin huil het.”

Soos André en Mário, kan jy gehelp word in jou pogings om die masturbasiegewoonte te oorwin. Al val jy terug, moenie moed opgee nie! Wees verseker dat jy die stryd kan wen.b

Beheer jou gedagtes

Die apostel Paulus het gesê: “Ek kasty my liggaam en lei dit as ’n slaaf” (1 Korintiërs 9:27). Jy sal dalk ook streng met jouself moet wees wanneer ongepaste gedagtes oor die teenoorgestelde geslag jou verstand binnedring. As die gedagtes vassteek, probeer fisiese oefening doen. Die Bybel sê dat liggaamlike oefening “wel ’n bietjie waarde” het (1 Timoteus 4:8, Nuwe Afrikaanse Bybelvertaling). As jy ’n entjie gaan loop of ’n paar minute lank fisiese oefening doen, is dit dalk al wat nodig is om die lastige gedagtes te help verdryf.

Jy moet bowenal nie die hulp vergeet wat jou hemelse Vader jou kan gee nie. “Wanneer seksuele drange in my begin opwel”, sê een Christen, “dwing ek myself om te bid.” Nee, God sal nie jou belangstelling in die teenoorgestelde geslag wegneem nie. Maar met sy hulp kan jy vind dat daar baie ander dinge is waaraan ’n mens kan dink.

[Voetnote]

SLEUTELTEKSTE

“Watter deug en watter lofwaardige saak daar ook al is, hou aan om hierdie dinge te bedink.”—Filippense 4:8.

WENK

As jy in die masturbasiegewoonte teruggeval het, moenie moed opgee nie! Ontleed wat daartoe aanleiding gegee het, en probeer om nie dieselfde patroon te herhaal nie.

HET JY GEWEET . . . ?

Die dinge wat jy in jou gedagtes toelaat, kan jou persoonlikheid vorm en jou gedrag beïnvloed.—Jakobus 1:14, 15.

AKSIEPLAN!

Wanneer ek wil ophou dink aan die teenoorgestelde geslag, sal ek ․․․․․

As ’n gesprek met klasmaats suggestief of onsedelik raak, sal ek ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom moet seksuele gevoelens nie altyd as “die vyand” beskou word nie?

● Waarom moet jy jou seksuele gevoelens onder beheer hou?

● Watter soort vermaak kan jou gedurig aan die teenoorgestelde geslag laat dink?

● Waarom is dit belangrik om weg te loop van ’n gesprek wat suggestief of onsedelik geraak het?

[Lokteks op bladsy 240]

Wat my help, is om die onderwerp te verander—om op te hou dink aan die dinge wat my seksueel prikkel. Ek sê vir myself dat die gevoelens of drange uiteindelik sal weggaan.’’—Scott

[Prent op bladsy 239]

Sou jy toelaat dat jou rekenaar deur virusse besmet word? Waarom sou jy dan onrein gedagtes in jou verstand toelaat?