Deel 16

’n Dubbele lewe—Hoef iemand te weet?

□ Alkoholgebruik

□ Assosiasie met mense wat jou ouers as slegte geselskap beskou

□ Verderflike musiek

□ Wilde partytjies

□ ’n Geheime verhouding

□ Gewelddadige of onsedelike rolprente of gewelddadige videospeletjies

□ Vuil taal

KYK na die lys op die vorige bladsy. Het jy, sonder dat jou ouers daarvan weet, enigiets te doen met enige van hierdie dinge? Indien wel, weet jy waarskynlik dat wat jy doen, verkeerd is. Jou gewete pla jou dalk selfs (Romeine 2:15). Maar jy wil jou ouers dalk nie vertel van die dinge wat jy verkeerd doen nie. En wanneer jy aan die moontlike gevolge dink, maak dit dalk vir jou sin om te redeneer: “Wat my ouers nie weet nie, sal hulle nie seermaak nie.” Maar het jy al ooit daaraan gedink dat jy eintlik ’n dubbele lewe lei? Wat het moontlik hiertoe aanleiding gegee?

Die aantrekking van onafhanklikheid

Uiteindelik sal “’n man sy vader en sy moeder verlaat”, sê die Bybel (Genesis 2:24). Dieselfde geld natuurlik vir ’n vrou. Dis net natuurlik dat jy wil grootword, vir jouself wil dink en jou eie besluite wil neem. Maar wanneer ouers weier om toestemming te gee vir dinge wat hulle as onwys—of verkeerd—beskou, rebelleer sommige jongmense.

Toegegee, dit lyk dalk asof party ouers besonder streng is. “Ons mag omtrent na geen fliek kyk nie”, kla ’n jong meisie met die naam Kim. Sy voeg by: “My pa laat ons skaars toe om na enige musiek te luister!” Wanneer party jongmense voel dat hulle onredelik beperk word, begin hulle hulle portuurs beny wat lyk of hulle baie meer vryheid geniet.

’n Jong vrou, Tammy, noem nog ’n rede waarom party ’n dubbele lewe lei—om by skoolmaats in te pas. “Ek het begin deur by die skool te vloek”, sê sy. “Dit het my laat voel asof ek meer soos die ander kinders is. Later het ek begin rook. Ek het my ook dronk gedrink. Toe het ek met seuns begin uitgaan—maar in die geheim, omdat my ouers streng was en my nie toegelaat het om ’n kêrel te hê nie.”

’n Tienerseun met die naam Pete het ’n soortgelyke ondervinding gehad: “Ek is as een van Jehovah se Getuies grootgemaak. Maar ek was baie bang dat ek geterg sou word.” Hoe het Pete sy vrees hanteer? “Ek het gewild probeer wees”, sê hy. “Ek het leuens vertel en verskonings uitgedink oor waarom ek nie op godsdienstige vakansiedae geskenke ontvang het nie.” Nadat Pete met klein dingetjies begin het, was dit nie lank voordat hy hom aan ernstiger oortredings skuldig gemaak het nie.

Niks kan weggesteek word nie

Om ’n dubbele lewe te lei, is niks nuuts nie. Party eertydse Israeliete het ook daarmee probeer wegkom. Maar die profeet Jesaja het hulle gewaarsku: “Wee dié wat baie diep gaan om planne vir Jehovah weg te steek en wie se dade in ’n donker plek plaasgevind het, terwyl hulle sê: ‘Wie sien ons en wie weet van ons?’” (Jesaja 29:15). Die Israeliete het vergeet dat God hulle dade sien. Op sy tyd het hy van hulle rekenskap geëis vir hulle oortredings.

Vandag is dit ook so. Al kry jy dit reg om jou verkeerde dade vir jou ouers weg te steek, kan jy dit nie vir Jehovah God wegsteek nie. “Daar is nie ’n skepping wat nie vir sy oë sigbaar is nie”, sê Hebreërs 4:13, “maar alles lê naak en oop en bloot voor die oë van hom aan wie ons rekenskap moet gee.” Wat help dit dan om dit weg te steek? Onthou, jy kan God nie gelukkig maak deur ’n vroom front voor te hou wanneer jy godsdiensvergaderinge bywoon nie. Jehovah weet wanneer mense hom ‘met hulle lippe eer, maar hulle hart ver van hom verwyderd is’.—Markus 7:6.

Besef jy dat diegene wat ’n dubbele lewe lei, Jehovah seermaak? Is dit regtig moontlik? Ja, dit is! Toe die eertydse volk Israel hulle rug op God se Wet gedraai het, “het [hulle] die Heilige van Israel bedroef” (Psalm 78:41). Hoe moet dit hom vandag tog bedroef wanneer jongmense wat “in die dissipline en verstandsregulering van Jehovah” grootgemaak is, in die geheim verkeerde dinge doen!—Efesiërs 6:4.

Stel sake reg

Jy is dit in werklikheid aan God, jou ouers en jouself verskuldig om te erken wat jy in die geheim gedoen het. Ja, dit kan wel tot verleentheid en moontlik ’n paar onaangename gevolge lei (Hebreërs 12:11). Byvoorbeeld, as jy ’n gewoonte daarvan gemaak het om leuens te vertel en ’n valse indruk te skep, het jy jou ouers se vertroue in jou ondermyn. Moet dus nie verbaas wees as jy ’n ruk lank aan meer beperkings onderwerp word as voorheen nie. Nogtans is dit die beste om met die waarheid uit te kom. Waarom?

Dink aan hierdie illustrasie: Stel jou voor dat jy en jou gesin op ’n staproete is. Wanneer jou ouers nie kyk nie, ignoreer jy hulle opdrag om naby hulle te bly en dwaal jy van die paadjie af totdat jy hulle nie meer kan sien nie. Skielik begin jy in dryfsand wegsink. Sou jy te skaam wees om om hulp te roep? Sou jy bekommerd wees dat jou ouers jou dalk sal dissiplineer omdat jy hulle waarskuwings geïgnoreer het? Nee! Jy sal so hard skreeu as wat jy kan.

As jy ’n dubbele lewe lei, het jy net so dringend hulp nodig. Onthou, jy kan nie teruggaan en die verlede ongedaan maak nie. Maar jy kan die toekoms verander. Dit sal beslis pynlik en moeilik wees, maar dit maak sin om hulp te probeer kry voordat jy jou of jou gesin enige verdere skade aandoen. As jy regtig spyt voel oor die weg wat jy ingeslaan het, sal Jehovah jou barmhartig wees.—Jesaja 1:18; Lukas 6:36.

Vertel jou ouers dus die waarheid. Verstaan dat hulle seergemaak sal voel. Aanvaar hulle dissipline. As jy dit doen, sal jy jou ouers sowel as Jehovah God baie bly maak. Jy sal ook die wonderlike verligting ondervind om weer ’n rein gewete te hê.—Spreuke 27:11; 2 Korintiërs 4:2.

SLEUTELTEKSTE

“Hy wat sy oortredings bedek, sal nie sukses behaal nie, maar hy wat dit bely en laat staan, sal barmhartigheid bewys word.”—Spreuke 28:13.

WENK

Moenie jou foute verklein nie, maar vermy die strik van pessimisme. Onthou dat Jehovah vergewensgesind is.—Psalm 86:5.

HET JY GEWEET . . .?

Skuldgevoelens kan nuttig wees; dit kan ’n persoon beweeg om ’n verkeerde weg reg te stel. Maar iemand wat aanhou sondig, skaad sy gewete. Dit word ongevoelig, soos die litteken van ’n geneesde brandwond.—1 Timoteus 4:2.

AKSIEPLAN!

As ek ’n dubbele lewe lei, sal ek praat met ․․․․․

Ek kan enige dissipline hanteer as ek ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom lei party tieners ’n dubbele lewe?

● Wat is party gevolge daarvan as ’n mens ’n dubbele lewe lei?

● Waarom is dit die moeite werd om so ’n lewenswyse te laat vaar?

[Lokteks op bladsy 140]

Ek dink dat jongmense hulle as Christene met hoë sedelike standaarde moet identifiseer. Hulle moet dit so gou as moontlik doen. Hoe langer hulle wag, hoe moeiliker sal dit wees.’’—Linda

[Prent op bladsy 141]

As jy in die dryfsand van ’n dubbele lewe wegsink, moet jy om hulp roep