“Gawes in die vorm van mense” hou ywerig toesig oor God se kudde
1 Wat ’n liefdevolle voorsiening het Jehovah tog deur middel van sy Seun gemaak om “gawes in die vorm van mense” te voorsien! (Ef. 4:8, 11, 12). Hulle het baie verantwoordelikhede, wat insluit dat hulle aktief en ywerig oor die kudde van God toesig moet hou (1 Pet. 5:2, 3). Ons almal vind baat by hierdie voorsiening wat ons só nodig het. Hetsy party probleme ondervind, onlangs met die gemeente begin omgaan het, sekere swakhede het of afgedwaal het, hierdie manne het ’n sterk persoonlike belangstelling in die geestelike welsyn van almal.—Fil. 2:4; 1 Tess. 5:12-14.
2 Wanneer ontstellende wêreldgebeure ’n mate van angs veroorsaak, is hierdie onderherders “soos ’n skuilplek teen die wind en ’n skuiling teen die reënstorm”. Wanneer ons moeg of swaar belaai is en bemoediging nodig het, verkwik hulle ons, “soos waterstrome in ’n waterlose land” of “soos die skaduwee van ’n groot, swaar rots in ’n uitgeputte land”.—Jes. 32:2.
3 Moedig die onbedrywiges aan: Die ouer manne wend ’n spesiale poging aan om diegene wat ongereeld of onbedrywig geword het, aan te moedig en hulle te help om weer gereeld aan al die gemeentelike bedrywighede deel te neem. Liefdevolle herdersbesoeke het baie mense gehelp om gemeentelike vergaderinge gereeld by te woon en geestelik opgebou te word sodat hulle weer aan die veldbediening kan deelneem. Al hierdie pogings deur die ouer manne weerspieël Jehovah se liefdevolle sorg en die daadwerklike leierskap van Jesus Christus. Hy het die voorbeeld gestel deur sulke besorgdheid te betoon teenoor enige van sy skape wat dalk afgedwaal of verdwaal het.—Matt. 18:12-14; Joh. 10:16, 27-29.
4 Die onderherders soek na tekens wat daarop dui dat iemand dalk geestelik wankel. Enigiemand wat tekens van ontmoediging toon, wat nie gereeld vergaderinge bywoon nie of wat minder velddiens begin doen, het waarskynlik geestelike hulp nodig. Die ouer manne is gretig om enigiemand te help wie se kleredrag en persoonsversorging ’n bietjie wêrelds begin raak of wat ’n kritiese gesindheid teenoor die gemeente ontwikkel. Met opregte belangstelling en tere geneentheid is besorgde opsieners gewillig om ‘hulle eie siele mee te deel’ om hierdie persone te help om hulle liefde vir Jehovah opnuut aan te wakker.—1 Tess. 2:8.
5 In die verlede het party toegewyde Christene kontak verloor met die gemeente en in geestelike onbedrywigheid verval omdat hulle oorweldig is deur gesondheidsprobleme, ekonomiese terugslae of gesinsdruk. Sonder om krities te wees, verseker die ouer manne hulle vriendelik dat Jehovah vir al sy skape omgee en hulle gedurende moeilike tye sal onderskraag (Ps. 55:22; 1 Pet. 5:7). Wakker herders van die kudde kan hulle help besef dat as hulle ‘nader aan God kom, hy nader aan hulle sal kom’ en hulle vertroosting en verkwikking sal gee.—Jak. 4:8; Ps. 23:3, 4.
6 Waardeer die siekes: Liefdevolle onderherders is ook besorg oor diegene wat oor die hoof gesien kan word. In elke gemeente is daar party wat siek is, wat in verpleeginrigtings is of wat op ’n ander manier onbevoeg is. Dit is verstaanbaar dat hulle deelname aan die verkondiging van die Koninkryksboodskap weens hulle omstandighede beperk is. Dalk kry hulle net die geleentheid om te getuig wanneer hulle met besoekers, ander pasiënte of versorgers in aanraking kom. Wat hulle ook al kan doen, word nietemin as ’n waardevolle bydrae tot die wêreldwye predikingswerk beskou (Matt. 25:15). Al getuig hulle net 15 minute lank, moet hulle dit rapporteer sodat hulle steeds as gereelde Koninkryksverkondigers getel kan word.
7 Die “gawes in die vorm van mense” is veral bewus van die geestelike behoeftes van hulle broers gedurende hierdie tyd van die jaar—die Gedenkmaalseisoen. Wat ’n gepaste tyd is dit tog vir die ouer manne om ’n spesiale poging aan te wend om almal wat afgedwaal het, te help om weer eens die vreugde en gemoedsrus te geniet wat voortspruit uit hartlike omgang met die gemeente! Ons is verheug wanneer ons sien dat “dié wat in die geloof aan ons verwant is”, by die gemeentelike vergaderinge is en aan die bediening deelneem en sodoende hulle geloof in die losprysoffer herbevestig.—Gal. 6:10; Luk. 15:4-7; Joh. 10:11, 14.