Wanneer jy net ’n einde aan alles wil maak

ELKE jaar probeer tienduisende mense in die Verenigde State alleen om hulle lewe te neem. Die Bybel gee ’n fundamentele rede waarom baie mense so wanhopig voel. Dit verduidelik dat ons in “kritieke tye [lewe] wat moeilik is om deur te kom”. Mense vind dit besonder moeilik om die druk van die lewe te verwerk (2 Timoteus 3:1; Prediker 7:7). Wanneer die sorge van die lewe vir iemand te veel word, sal hy dalk selfmoord oorweeg om verligting te kry. Wat kan jy doen as jý al selfmoord oorweeg het?

Jy is nie alleen nie!

Al lyk jou situasie miskien hopeloos, moet jy in gedagte hou dat jy nie alleen is nie en dat byna almal vandag ongelukkig met die een of ander probleem te kampe het. Die Bybel sê dat “die hele skepping tot nou toe voortdurend saam kreun en saam pyn ly” (Romeine 8:22). Al lyk dit asof daar nie in die nabye toekoms ’n oplossing vir jou probleem sal wees nie, moet jy onthou dat dinge dikwels met verloop van tyd verbeter. Maar wat kan jou intussen help?

Bespreek jou gevoelens met ’n geestelik volwasse vriend wat jy vertrou. Die Bybel sê: “’n Ware metgesel het te alle tye lief en is ’n broer wat gebore word vir die tyd wanneer daar benoudheid is” (Spreuke 17:17). Die regverdige man Job, wat in die Bybel gemeld word, het gedurende sy beproewinge vir ander vertel hoe hy voel. Toe hy gevoel het dat hy “’n weersin in [sy] lewe” het, het hy gesê: “Ek sal uiting gee aan my besorgdheid oor myself. Ek sal in die bitterheid van my siel praat!” (Job 10:1). As jy ander in jou vertroue neem, kan dit jou emosies laat bedaar, en dit kan jou help om jou probleme in ’n ander lig te sien.a

Stort jou hart voor God uit in gebed. Party dink dat gebed net ’n emosionele kruk is, maar dit is nie wat die Bybel sê nie. Psalm 65:2 noem Jehovah God die “Hoorder van die gebed”, en 1 Petrus 5:7 sê: “Hy sorg vir julle.” Die Bybel beklemtoon herhaaldelik dat dit belangrik is om op God te vertrou. Byvoorbeeld:

“Vertrou op Jehovah met jou hele hart en moenie op jou eie begrip steun nie. Slaan ag op hom in al jou weë, en hy sal jou paaie reguit maak.”—SPREUKE 3:5, 6. 

“Aan die begeerte van dié wat [Jehovah] vrees, sal hy voldoen, en hulle hulpgeroep sal hy hoor, en hy sal hulle red.”—PSALM 145:19.

“Dít is die vertroue wat ons teenoor hom het, dat hy ons hoor, ongeag wat ons volgens sy wil vra.”—1 JOHANNES 5:14.

“Jehovah is ver van die goddeloses af, maar die gebed van die regverdiges hoor hy.”—SPREUKE 15:29.

As jy met God praat oor die probleme wat jy ondervind, sal hy hulp voorsien. Dit is met goeie rede dat die Bybel jou aanspoor: “Vertrou te alle tye op hom . . . Stort [jou] hart voor hom uit.”—Psalm 62:8.

Wanneer bykomende hulp nodig is

Studies toon dat die meeste mense wat hulle lewe neem, ’n geskiedenis van depressie het.b Dit beklemtoon die feit dat mediese behandeling moontlik nodig is. ’n Dokter sal dalk medikasie voorskryf of aanpassings in die persoon se dieet aanbeveel. In party gevalle is ’n oefenprogram tesame met behandeling doeltreffend. Baie het al baat gevind by professionele mediese behandeling.c

Die Bybel bevat baie inligting wat jou kan bemoedig en hoop kan gee. In Openbaring 21:4 sê die Bybel byvoorbeeld aangaande Jehovah God: “Hy sal elke traan van hulle oë afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie. Die vorige dinge het verbygegaan.” Dit is ’n belofte wat God gemaak het, en as ’n mens daaroor peins, kan dit verligting bring.

Jehovah se Getuies maak hierdie Bybelse hoop bekend aan miljoene mense regoor die wêreld. Gevolglik vind baie mense ware hoop in hierdie angswekkende tye. As jy meer inligting wil hê, kan jy in aanraking kom met Jehovah se Getuies in jou omgewing deur die plaaslike Koninkryksaal te besoek, of jy kan skryf na die gepaste adres op bladsy 5 van hierdie tydskrif. Jy kan ook ons webwerf www.watchtower.org besoek.

[Voetnote]

[Venster op bladsy 16]

HULP UIT DIE BYBEL

● “Moet julle oor niks kwel nie, maar laat julle versoeke in alles deur gebed en smeking tesame met danksegging by God bekend word; en die vrede van God wat alle denke te bowe gaan, sal julle harte en julle verstandelike vermoëns deur middel van Christus Jesus bewaak.”—Filippense 4:6, 7.

● “Ek het Jehovah geraadpleeg, en hy het my geantwoord, en uit al my verskrikkinge het hy my verlos.”—Psalm 34:4.

● “Jehovah is naby die gebrokenes van hart; en die verbryseldes van gees red hy.”—Psalm 34:18.

● “Hy genees die gebrokenes van hart en verbind hulle pynlike plekke.”—Psalm 147:3.

[Venster op bladsye 17, 18]

AS JY SELFMOORDGEDAGTES HET . . . 

Bespreek jou gevoelens met ’n vriend wat jy vertrou

Stort jou hart voor God uit in gebed

Kry mediese hulp

[Venster/Prent op bladsy 18]

VIR VRIENDE EN GESINSLEDE

Gesinslede en hegte vriende kom dikwels eerste agter dat ’n terneergedrukte persoon selfmoord oorweeg. Jou optrede kan hierdie persoon se lewe red! Wees ’n simpatieke luisteraar. Erken dat die probleme waarmee die persoon worstel, werklike probleme is. Die Bybel sê: “Praat vertroostend met die terneergedrukte siele” (1 Tessalonisense 5:14). Spoor die terneergedrukte persoon aan om hulp te kry, en maak, indien nodig, seker dat hy wel die nodige hulp kry.