Verwysings vir die Lewe en Bediening-vergaderingwerkboek
© 2023 Watch Tower Bible and Tract Society of Pennsylvania
4-10 MAART
SKATTE UIT GOD SE WOORD | PSALM 16-17
“Jehovah, my Bron van goeie dinge”
Jongmense, julle kan die beste lewe ooit hê
MAAK WARE VRIENDE
11 Lees Psalm 16:3. Dawid het geweet wat die geheim is om ware vriende te maak. Hy het “behae” daarin gehad, of dit het hom baie gelukkig gemaak, om vriende te hê wat lief was vir Jehovah. Hulle word beskryf as “heiliges” omdat hulle sedelik rein was. ’n Ander psalmskrywer het dieselfde gevoel oor sy keuse van vriende. Hy het geskryf: “Ek is ’n metgesel van almal wat u vrees, en van dié wat u bevele onderhou” (Ps. 119:63). Soos ons in die vorige artikel gesien het, kan jy ook goeie vriende vind onder diegene wat Jehovah vrees en gehoorsaam. Dit sluit natuurlik mense van verskillende ouderdomme in.
‘Sien die lieflikheid van Jehovah’
“Jehovah is die deel van wat aan my toegemeet is en van my beker”, het Dawid gesing, “U hou my lot vas. Die meetsnoere het vir my op lieflike plekke geval” (Ps. 16:5, 6). Dawid was dankbaar vir sy “deel”, dit wil sê vir sy goedgekeurde verhouding met Jehovah en die voorreg om hom te dien. Soos Dawid, verduur ons dalk ook ontberinge, maar ons geniet soveel geestelike seëninge! Laat ons dus aanhou om vreugde uit ware aanbidding te put en laat ons Jehovah se geestelike tempel altyd “met waardering . . . aanskou”.
Hou Jehovah voortdurend voor jou
2 Ons kan almal baie leer uit die ondervindinge van welbekende Bybelkarakters—Abraham, Sara, Moses, Rut, Dawid, Ester, die apostel Paulus en ander. Maar ons kan ook baat vind by verslae oor minder bekende persone. Bepeinsing oor Bybelverhale kan ons help om op te tree in ooreenstemming met die psalmis se woorde: “Ek het Jehovah voortdurend voor my gestel. Omdat hy aan my regterhand is, sal ek nie wankel nie” (Ps. 16:8). Hoe moet ons hierdie woorde verstaan?
3 ’n Soldaat het gewoonlik sy swaard met sy regterhand hanteer, wat beteken het dat daardie kant nie beskerm is deur die skild wat hy in sy linkerhand gehou het nie. Maar as ’n vriend naby hom aan sy regterkant geveg het, het dit hom beskerm. As ons Jehovah in gedagte hou en sy wil doen, sal hy ons beskerm. Kom ons kyk dan hoe verslae in die Bybel ons geloof kan versterk, sodat ons “Jehovah altyd voor [ons] hou”.—Byington.
Geestelike skatte
it-2-E 714
Oogappel
As die Hebreeuse woord ʼi·shohnʹ (De 32:10; Spr 7:2;) met ʽaʹyin (oog) gebruik word, beteken dit letterlik “klein man van die oog”; net so word bath (dogter) in Klaagliedere 2:18 gebruik met die idee van “dogter van die oog”, albei uitdrukkings verwys na die oogappel. Die twee word in Psalm 17:8 (ʼi·shohnʹ bath-ʽaʹyin) vir beklemtoning gekombineer, letterlik, “klein man, dogter van die oog”. Dit verwys blykbaar na die klein beeld van jouself wat in daardie deel van iemand anders se oog gesien kan word.
Die oog is baie teer en sensitief; selfs ’n klein haar of ’n stofspikkeltjie tussen die ooglid en die oogbol kan dadelik gevoel word. Die deursigtige deel van die oog (die kornea) bedek die oogappel en moet beskerm en versorg word, want as hierdie deel beskadig word of deur ’n siekte geaffekteer word, kan dit swak sig of blindheid veroorsaak. Die Bybel gebruik die uitdrukking “appel van jou oog” met krag maar tog teerheid wanneer dit praat van iets wat met die grootste sorg beskerm moet word. God se wet moet so beskou word (Spr 7:2). Deuteronomium 32:10 praat van God se vaderlike sorg vir Israel wanneer dit sê dat Hy die nasie “soos die appel van sy oog” beskerm het. Dawid het gebid dat God hom sou beskerm en vir hom sou sorg soos “die appel van [sy] oog” (Ps 17:8) Hy wou hê dat Jehovah vinnig vir hom moes optree wanneer sy vyande hom aanval. (Vergelyk Sag 2:8; waar die Hebreeuse woord ba·vathʹ ʽaʹyin, “oogbol” gebruik word.)
11-17 MAART
SKATTE UIT GOD SE WOORD | PSALM 18
“Jehovah is . . . die Een wat my red”
Beeldspraak in die Bybel—Verstaan jy dit?
Die Bybel vergelyk Jehovah ook met lewelose dinge. Hy word beskryf as “die Rots van Israel”, as ’n “groot rots” en as ’n “vesting” (2 Samuel 23:3; Psalm 18:2; Deuteronomium 32:4). Wat is die ooreenkoms? Net soos ’n groot rots stewig, onbeweeglik is, so kan Jehovah God ’n vaste Bron van veiligheid vir jou wees.
5 Die boek Psalms is vol beeldspraak wat verskillende fasette van Jehovah se persoonlikheid beskryf. Byvoorbeeld, Psalm 84:11 praat van Jehovah as “’n son en ’n skild” omdat hy die Bron van lig, lewe, energie en beskerming is. Daarteenoor sê Psalm 121:5: “Jehovah is jou skaduwee aan jou regterhand.” Net soos ’n skaduplek jou teen die bloedige son kan beskerm, kan Jehovah diegene wat hom dien, teen die hitte van teëspoed beskerm en vir hulle skaduagtige beskutting onder sy “hand” of onder sy “vleuels” gee.—Jesaja 51:16; Psalm 17:8; 36:7.
it-2-E 1161 ¶7
Stem
God hoor die stem van sy knegte. Dié wat God in gees en waarheid aanroep, kan die vertroue hê dat God na hulle stem sal luister, ongeag in watter taal hulle hom aanroep. Maar selfs al word die letterlike stem nie gebruik nie omdat dit ’n stille versoek aan God is, “hoor” of skenk God, wat die harte van mense ken, nog steeds aandag (Ps 66:19; 86:6; 116:1; 1Sa 1:13; Ne 2:4). God luister na dié wat swaarkry en na hom uitroep vir hulp. Hy hoor ook die stem en ken die bedoelings van dié wat hom teëstaan en wat bose dinge teen sy knegte beplan. – Ge 21:17; Ps 55:18, 19; 69:33; 94:9-11; Jer 23:25.
Hoe om angstigheid te hanteer
2. Dink na. Was daar al moeilike tye in jou lewe wat jy net met Jehovah se hulp kon deurmaak? Wanneer ons nadink oor hoe Jehovah ons, sowel as sy knegte van die verlede, ondersteun het, versterk dit ons vertroue in hom en kry ons innerlike vrede (Ps. 18:17-19). ’n Ouerman met die naam Joshua sê: “Ek het ’n lys gemaak van gebede wat Jehovah al beantwoord het. Dit herinner my aan die tye toe ek vir Jehovah vir iets spesifieks gevra het en hy vir my presies gegee het wat ek nodig gehad het.” Wanneer ons nadink oor alles wat Jehovah vir ons gedoen het, kry ons nuwe krag wat ons help om teen angstigheid te stry.
Geestelike skatte
it-1-E 432 ¶2
Gerub
Hierdie gerubs was nie belaglike figure soos die monsteragtige beelde met vlerke wat deur die heidense nasies om hulle aanbid was, soos party mense dink nie. Volgens die eenstemmige verklaring van eertydse Joodse tradisie (die Bybel sê niks oor hierdie saak nie) het hierdie gerubs n menslike vorm gehad. Hulle was ongelooflike kunswerke wat pragtige geesskepsele voorgestel het, en was presies gemaak volgens die voorbeeld wat Moses van Jehovah self ontvang het (Eks 25:9). Die apostel Paulus beskryf hulle as glorieryke gerubs wat die versoendeksel oorskadu (Heb 9:5).
Hierdie gerubs word geassosieer met die teenwoordigheid van Jehovah: “Ek sal daar aan jou verskyn en van bokant die deksel af met jou praat. Ek sal van tussen die twee gerubs wat op die ark van die Getuienis is, vir jou al die bevele gee wat jy aan die Israeliete moet oordra” (Eks 25:22; Nu 7:89). Daarom word daar gesê dat Jehovah “bo [of, tussen] die gerubs sit” (1Sa 4:4; 2Sa 6:2; 2Kn 19:15; 1Kr 13:6; Ps 80:1; 99:1; Jes 37:16). In ’n simboliese sin het die gerubs gedien as die afbeelding van die strydwa waarop Jehovah gery het (1Kr 28:18), en die vlerke van die gerubs het as beskerming gedien en kon vinnig van rigting verander. So Dawid het in ’n digterlike lied die spoed beskryf waarteen Jehovah hom kom help het, soos een wat “’n gerub gery en aangevlieg gekom” het “op die vlerke van ’n gees”. – 2Sa 22:11; Ps 18:10.
18-24 MAART
SKATTE UIT GOD SE WOORD | PSALM 19-21
“Die hemele maak die heerlikheid van God bekend”
Laat almal die heerlikheid van Jehovah verkondig
DAWID, die seun van Isai, het as ’n herderseun in die omgewing van Betlehem grootgeword. Hy het ongetwyfeld baie keer in die stilte van die nag opgekyk na die uitgestrekte sterrehemel terwyl hy sy vader se skape in daardie eensame weivelde opgepas het. Hierdie indrukwekkende beelde het sekerlik in sy gedagtes opgekom toe hy, onder inspirasie van God se heilige gees, die pragtige woorde van Psalm 19 gekomponeer en gesing het: “Die hemele maak die heerlikheid van God bekend; en die uitspansel verkondig die werk van sy hande. Oor die hele aarde het hulle meetsnoer uitgegaan, en hulle woorde tot aan die einde van die vrugbare land.”—Psalm 19:1, 4.
2 Sonder spraak, sonder woorde, sonder stem, verkondig die ontsagwekkende hemele wat Jehovah geskep het, sy heerlikheid dag na dag, aand na aand. Die skepping hou nooit op om God se heerlikheid bekend te maak nie, en dit laat ons nederig voel wanneer ons nadink oor hierdie stille getuienis wat oor “die hele aarde” uitgaan sodat al die bewoners dit kan sien. Maar die stille getuienis van die skepping is nie genoeg nie. Getroue mense word aangespoor om hulle stemme hierby te voeg en dit hoorbaar te maak. ’n Psalmis wie se naam nie genoem word nie, het hierdie geïnspireerde woorde tot getroue aanbidders gerig: “Skryf aan Jehovah heerlikheid en sterkte toe. Skryf aan Jehovah die heerlikheid toe wat sy naam toekom” (Psalm 96:7, 8). Diegene wat ’n hegte verhouding met Jehovah het, gee met blydskap gehoor aan daardie aansporing. Maar wat behels dit om heerlikheid aan God toe te skryf?
Die skepping maak die heerlikheid van God bekend!
8 Dawid beskryf vervolgens nog ’n wonder van Jehovah se skepping: “In hulle [die sigbare hemele] het hy ’n tent vir die son geplaas, en dié is soos ’n bruidegom wanneer hy uit sy bruidskamer kom; hy verheug hom net soos ’n sterk man wanneer hy op ’n pad hardloop. Van die een einde van die hemel is sy uitgang, en sy voltooide kring reik tot aan die ander eindes daarvan; en niks is verborge vir sy hitte nie.”—Psalm 19:4-6.
9 In vergelyking met ander sterre is die son maar van middelmatige grootte. En tog is dit ’n merkwaardige ster, wat die planete wat daarom wentel, baie klein laat lyk. Een bron sê dat dit ’n massa het van “2 miljard maal miljard maal miljard ton”—99,9 persent van die massa van ons sonnestelsel! Die aantrekkingskrag daarvan laat die aarde op ’n afstand van 150 miljoen kilometer daarom wentel sonder om weg te dryf of ingetrek te word. Net omtrent ’n halwe miljardste van die son se energie bereik ons planeet, maar dit is genoeg om lewe te onderhou.
10 Die psalmis gebruik beeldspraak wanneer hy die son beskryf as “’n sterk man” wat gedurende die dag van een horison na die ander hardloop en snags in “’n tent” rus. Wanneer daardie magtige ster agter die horison verdwyn, lyk dit van die aarde af asof die son in “’n tent” ingaan, as ’t ware om te rus. In die oggend lyk dit of hy skielik te voorskyn kom, met ’n stralende glans “soos ’n bruidegom wanneer hy uit sy bruidskamer kom”. As ’n herder het Dawid geweet hoe verskriklik koud die nag kan wees (Genesis 31:40). Hy het onthou hoe die son se strale hom en die landskap om hom vinnig warm gemaak het. Die son was beslis nie moeg ná sy “reis” van die ooste na die weste nie, maar was soos “’n sterk man”, gereed om weer die reis aan te pak.
Die mees verwaarloosde Kunstenaar van ons tyd
As ons ons waardering vir die kunswerke in die natuur laat toeneem, kan dit ons help om ons Skepper te leer ken deur wie se handewerk ons omring word. By een geleentheid het Jesus vir sy dissipels gesê om goed te kyk na die veldblomme wat om Galilea groei. “Leer ’n les by die lelies van die veld,” het hy gesê, “hoe hulle groei; hulle swoeg nie, en hulle spin ook nie; maar ek sê vir julle dat nie eens Salomo in al sy heerlikheid soos een van hulle geklee was nie” (Matteus 6:28, 29). Die prag van ’n onbeduidende veldblommetjie kan ons daaraan herinner dat God wel in die behoeftes van die mensdom belangstel.
Geestelike skatte
it-1-E 1073
Hebreeus, II
Dan is daar die sintetiese (of, formele, konstruktiewe) parallelisme waarin die tweede deel nie net dieselfde gedagte as die eerste oordra of in teenstelling is daarmee nie. Dit maak dit eerder duideliker en dra ’n nuwe gedagte by. Psalm 19:7-9 is ’n voorbeeld hiervan:
Die wet van Jehovah is volmaak.
Dit gee nuwe krag.
Die herinnering van Jehovah is betroubaar.
Dit maak die onervarene wys.
Die bevele van Jehovah is regverdig.
Dit maak die hart bly.
Die gebod van Jehovah is rein.
Dit laat die oë straal.
Die vrees vir Jehovah is suiwer.
Dit bly vir ewig.
Die oordele van Jehovah is waar.
Dit is heeltemal regverdig.
Let op dat die tweede deel die gedagte voltooi. So die hele vers is ’n samevatting, dit is die resultaat van twee elemente wat bymekaar gebring word. Eers met die tweede deel, soos “dit gee nuwe krag” en “dit maak die onervarene wys”, leer die leser dat ‘die wet van Jehovah volmaak is’ en hoe ‘die herinnering van Jehovah betroubaar is’. In so ’n reeks van sintetiese parallelle, dien die skeiding tussen die eerste en tweede deel as ’n ritmiese breek. Soos die gedagte aangaan, bly die styl dieselfde. Daarom word dit soms formele of konstruktiewe parallelisme genoem.
25-31 MAART
SKATTE UIT GOD SE WOORD | PSALM 22
Die Bybel het details oor Jesus se dood voorspel
Hulle het die Messias gevind!
16 Die Messias sou skynbaar deur God verlaat wees. (Lees Psalm 22:1.) In ooreenstemming met die profesie het Jesus “op die negende uur [omtrent drie-uur die middag] . . . met ’n harde stem uitgeroep: ‘Eli, Eli, lama sabagtani?’ wat, wanneer dit vertaal word, beteken: ‘My God, my God, waarom het u my verlaat?’” (Mark. 15:34). Jesus het nie vertroue in sy hemelse Vader verloor nie. God het Jesus aan sy vyande oorgelaat deur Sy beskerming te verwyder sodat Christus se onkreukbaarheid ten volle op die proef gestel kon word. En deur die woorde hierbo uit te roep, het Jesus Psalm 22:1 vervul.
Hulle het die Messias gevind!
13 Dawid het voorspel dat die Messias bespot sou word. (Lees Psalm 22:7, 8.) Jesus is bespot terwyl hy aan die folterpaal gely het, want Matteus sê: “Die verbygangers het hom begin smaad, hulle kop geskud en gesê: ‘O jy wat glo die tempel sou afbreek en in drie dae sou opbou, red jouself! As jy ’n seun van God is, kom van die folterpaal af!’ Net so het ook die hoofpriesters saam met die skrifgeleerdes en ouer manne met hom die spot begin dryf en gesê: ‘Ander het hy gered; homself kan hy nie red nie! Hy is Koning van Israel; laat hom nou van die folterpaal afkom en ons sal in hom glo. Hy het sy vertroue in God gestel; laat Hy hom nou red as Hy hom wil hê, want hy het gesê: ‘Ek is God se Seun’” (Matt. 27:39-43). Tog het Jesus dit alles met waardigheid verduur. Wat ’n uitstekende voorbeeld vir ons!
Hulle het die Messias gevind!
14 Die lot sou vir die Messias se klere gewerp word. “Hulle verdeel my kledingstukke onder mekaar,” het die psalmis geskryf, “en oor my klere werp hulle die lot” (Ps. 22:18). Dit is wat gebeur het, want “toe [die Romeinse soldate] hom aan die paal gehang het, het hulle [Jesus se] boklere verdeel deur die lot te werp”.—Matt. 27:35; lees Johannes 19:23, 24.
Geestelike skatte
Toon respek vir ons heilige samekomste
7 Daar is tasbare maniere waarop ons respek vir ons samekomste kan toon. Een manier is deur teenwoordig te wees wanneer Koninkryksliedere gesing word. Baie hiervan is in die vorm van gebede en moet dus op eerbiedige wyse gesing word. Die apostel Paulus het Psalm 22 aangehaal en van Jesus geskryf: “Ek sal u naam aan my broers bekend maak; in die midde van die gemeente sal ek u met sang loof” (Hebreërs 2:12). Ons moet ons dus daarop toelê om in ons sitplek te wees voordat die voorsitter die lied aankondig en om dan te let op die betekenis van die woorde terwyl ons sing. Mag ons sang die gevoelens weerspieël van die psalmis wat geskryf het: “Ek sal Jehovah met my hele hart prys in die intieme groep van die regskapenes en die vergadering” (Psalm 111:1). Ja, om lofliedere aan Jehovah te sing, is ’n baie goeie rede om vroeg by ons vergaderinge aan te kom en tot aan die einde te bly.
Loof Jehovah “in die midde van die gemeente”
Vandag, soos in vroeëre tye, kan individuele gelowiges hulle geloof “in die midde van die gemeente” bekend maak. Een geleentheid wat almal het, is om kommentaar te lewer op vrae wat tydens gemeentelike vergaderinge aan die gehoor gestel word. Moet nooit die waarde hiervan onderskat nie. Byvoorbeeld, kommentare oor hoe probleme oorkom of vermy kan word, maak ons broers meer vasbeslote om Bybelbeginsels toe te pas. Antwoorde wat teksverwysings verduidelik of wat gedagtes uit persoonlike navorsing bevat, kan ander aanmoedig om beter studiegewoontes aan te kweek.
1-7 APRIL
SKATTE UIT GOD SE WOORD | PSALM 23-25
“Jehovah is my Herder”
“Jehovah is my Herder”
Jehovah lei sy skape. Skape verdwaal maklik sonder hulle herder. Ons het eweneens hulp nodig om die regte weg in die lewe te vind (Jeremia 10:23). Dawid verduidelik dat Jehovah sy volk na “grasryke weivelde” en “waterryke rusplekke” lei. Hy lei hulle “in die spore van regverdigheid” (verse 2, 3). Hierdie beelde uit die herderslewe verseker ons dat ons op God kan vertrou. As ons ag slaan op die leiding van sy gees soos dit in die Bybel geopenbaar word, kan ons ’n lewensweg volg wat tevredenheid, verkwikking en veiligheid meebring.
“Jehovah is my Herder”
Jehovah beskerm sy skape. Sonder hulle herder is skape bang en hulpeloos. Jehovah sê vir sy volk dat hulle nie hoef bang te wees nie, nie eens wanneer hulle “wandel . . . in die vallei van diep skaduwee” nie—gedurende wat dalk soos die donkerste oomblikke in die lewe lyk (vers 4). Jehovah beskerm hulle en is altyd gereed om hulle te help. Hy kan sy aanbidders die wysheid en krag gee wat hulle nodig het om beproewinge die hoof te bied.—Filippense 4:13; Jakobus 1:2-5.
“Jehovah is my Herder”
Jehovah voed sy skape. Skape is afhanklik van hulle herder om vir hulle kos te vind. Ons het ’n geestelike behoefte wat slegs met God se hulp bevredig kan word (Matteus 5:3). Gelukkig is Jehovah ’n vrygewige Voorsiener wat ’n oorvloedige tafel voor sy knegte berei (vers 5). Die Bybel en Bybelstudiehulpe, soos die tydskrif wat jy nou lees, is ’n bron van geestelike voedsel wat ons behoefte bevredig om te weet wat die sin van die lewe en God se voorneme vir ons is.
Geestelike skatte
Jy moet regverdigheid met jou hele hart liefhê
DEUR middel van sy Woord en sy heilige gees lei Jehovah sy volk in “die spore van regverdigheid” (Ps. 23:3). Maar aangesien ons onvolmaak is, is ons geneig om van hierdie pad af te wyk. Dit verg doelbewuste inspanning om weer te begin doen wat reg is. Wat sal ons help om sukses te behaal? Soos Jesus, moet ons lief wees daarvoor om te doen wat reg is.—Lees Psalm 45:7.
2 Wat is “die spore van regverdigheid”? ’n Spoor kan na ’n voetpaadjie verwys. Hierdie “spore” word deur Jehovah se standaard van regverdigheid bepaal. In Hebreeus en Grieks verwys “regverdigheid” na wat “regskape” is, en dit dui daarop dat ’n mens streng by sedelike beginsels bly. Aangesien Jehovah “die woonplek van regverdigheid” is, vertrou sy aanbidders met graagte op hom om te bepaal wat die sedelik regskape pad is wat hulle moet volg.—Jer. 50:7.
3 Ons sal God net ten volle kan behaag as ons met ons hele hart daarna streef om volgens sy regverdige standaarde te lewe (Deut. 32:4). Ons begin hiermee deur alles moontlik van Jehovah God uit sy Woord, die Bybel, te leer. Hoe meer ons van hom leer en elke dag nader aan hom kom, hoe meer sal ons sy regverdigheid liefhê (Jak. 4:8). Ons moet ook die leiding van God se geïnspireerde Woord aanvaar wanneer ons belangrike besluite in die lewe moet neem.
8-14 APRIL
SKATTE UIT GOD SE WOORD | PSALM 26-28
Hoe Dawid sy integriteit versterk het
Wandel in die weg van onkreukbaarheid
8 Dawid het gebid: “Ondersoek my, o Jehovah, en stel my op die proef; louter my niere en my hart” (Psalm 26:2). Die niere lê diep in die liggaam. In figuurlike sin stel die niere ’n mens se diepste gedagtes en emosies voor. En die figuurlike hart is die hele innerlike mens—sy beweegredes, gevoelens en intellek. Toe Dawid Jehovah gevra het om hom te ondersoek, het hy gebid dat sy diepste gedagtes en gevoelens ondersoek en deurvors moet word.
9 Dawid het gepleit dat sy niere en sy hart gelouter moet word. Hoe louter Jehovah ons innerlike? Dawid het gesing: “Ek sal Jehovah loof, wat my raad gegee het. Waarlik, in die nagte het my niere my tereggewys” (Psalm 16:7). Wat beteken dit? Dit beteken dat goddelike raad die diepste dele van Dawid se wese bereik het en daar gebly het sodat dit sy diepste gedagtes en emosies reggestel het. Dit kan ook met ons die geval wees as ons met waardering nadink oor die raad wat ons deur God se Woord, sy verteenwoordigers en sy organisasie ontvang en toelaat dat dit diep in ons bly. As ons gereeld tot Jehovah bid om ons op hierdie manier te louter, sal dit ons help om in onkreukbaarheid te wandel.
Wandel in die weg van onkreukbaarheid
12 Met verwysing na nog ’n faktor wat sy onkreukbaarheid versterk het, het Dawid gesê: “Ek het nie by mense van onwaarheid gesit nie; en by dié wat verberg wat hulle is, gaan ek nie in nie. Ek het die gemeente van kwaaddoeners gehaat, en by die goddeloses sit ek nie” (Psalm 26:4, 5). Dawid het eenvoudig geweier om by die goddeloses te sit. Hy het slegte omgang gehaat.
13 Wat van ons? Weier ons om deur middel van televisieprogramme, video’s, rolprente, webwerwe op die Internet of op ander maniere by mense van onwaarheid te sit? Bly ons weg van dié wat verberg wat hulle is? Party by die skool of by die werk gee dalk met oneerlike bedoelings voor dat hulle ons vriende is. Wil ons werklik hegte bande smee met dié wat nie in God se waarheid wandel nie? Agter bewerings dat hulle opreg is, verberg afvalliges dalk ook hulle bedoeling om ons van Jehovah se diens af te keer. Sê nou daar is party in die Christengemeente wat ’n dubbele lewe lei? Ook hulle verberg wat hulle werklik is. Jayson, wat nou as ’n bedieningskneg dien, het in sy jeug sulke vriende gehad. Hy sê van hulle: “Eendag het een van hulle vir my gesê: ‘Dit maak nie saak wat ons nou doen nie, want wanneer die nuwe stelsel kom, gaan ons tog net dood wees. Ons sal nie weet dat ons enigiets misgeloop het nie.’ Hierdie soort kommentare het my laat wakker skrik. Ek wil nie dood wees wanneer die nuwe stelsel kom nie.” Jayson was verstandig en het sy omgang met sulke persone beëindig. “Moenie mislei word nie”, het die apostel Paulus gewaarsku. “Slegte omgang bederf nuttige gewoontes” (1 Korintiërs 15:33). Hoe noodsaaklik is dit tog dat ons slegte omgang vermy!
Wandel in die weg van onkreukbaarheid
17 Die tabernakel, met sy altaar vir offerandes, was die middelpunt van Jehovah se aanbidding in Israel. Dawid het sy liefde vir daardie plek uitgespreek en gebid: “Jehovah, ek het die woning van u huis liefgehad en die woonplek van u heerlikheid.”—Psalm 26:8.
18 Hou ons daarvan om by plekke te vergader waar ons van Jehovah leer? Elke Koninkryksaal met sy gereelde program van geestelike onderrigting dien as die middelpunt van ware aanbidding in die gemeenskap. Daarbenewens het ons ons jaarlikse streek- en kringbyeenkomste en spesiale byeenkomsdae. Jehovah se “herinneringe” word by hierdie vergaderinge bespreek. As ons leer om ‘hulle baie lief te hê’, sal ons gretig wees om vergaderinge by te woon en aandagtig luister terwyl ons daar is (Psalm 119:167). Hoe verkwikkend is dit tog om saam met medegelowiges te wees wat in ons persoonlike welsyn belangstel en wat ons help om op die weg van onkreukbaarheid te bly!—Hebreërs 10:24, 25.
Geestelike skatte
Jehovah verlos die geteisterde
15 Die psalmis Dawid het gesing: “As my eie vader en my eie moeder my sou verlaat, sal Jehovah my opneem” (Psalm 27:10). Hoe vertroostend is dit tog om te weet dat Jehovah se liefde dié van enige menseouer oortref! Al is dit hoe pynlik om deur ’n ouer verwerp, mishandel of verlaat te word, hou dit nie verband met hoeveel Jehovah vir jou omgee nie (Romeine 8:38, 39). Onthou dat God dié wat hy liefhet, na hom toe trek (Johannes 3:16; 6:44). Ongeag hoe jy deur mense behandel is, jou hemelse Vader is lief vir jou!
15-21 APRIL
SKATTE UIT GOD SE WOORD | PSALM 29-31
Dissipline – ’n Bewys van God se liefde
it-1-E 802 ¶3
Gesig
Om ‘die gesig weg te draai’ kan verskillende dinge beteken, afhangende van die omstandighede. Wanneer Jehovah God sy gesig weggedraai het, het dit baie keer beteken dat hy sy guns of sy ondersteunende krag weggeneem het. Dit was dalk die gevolg van die ongehoorsaamheid van ’n persoon of ’n groep mense, soos die nasie Israel (Job 34:29; Ps 30:5-8; Jes 54:8; 59:2). In party gevalle kan dit dalk beteken dat Jehovah vir sy eie vasgestelde tyd wag voordat hy optree (Ps 13:1-3). Deur God te vra, “draai u gesig weg van my sondes af,” het Dawid God gevra om sy sondes te vergewe. – Ps 51:9; vergelyk Ps 10:11.
Gelukkig om op Jehovah te wag
Die manier waarop ons baat vind by dissipline van Jehovah, kan vergelyk word met die manier waarop vrugte ryp word. Die Bybel sê dat dissipline van God ‘vir dié wat daardeur geoefen is, vreedsame vrug oplewer, naamlik regverdigheid’ (Hebreërs 12:11). Net soos vrugte tyd nodig het om ryp te word, is tyd nodig sodat ons ons gesindhede kan verander in reaksie op die opleiding wat God voorsien. As ons byvoorbeeld weens wangedrag die een of ander voorreg in die gemeente verloor, sal ons gewilligheid om op God te wag, keer dat ons mismoedig raak en moed opgee. In sulke omstandighede is die geïnspireerde woorde van Dawid bemoedigend: “Om onder [God se] toorn te wees, is vir ’n oomblik, om onder sy welwillendheid te wees, is lewenslank. In die aand kan gehuil sy intrek neem, maar in die oggend is daar vreugdegeroep” (Psalm 30:5). As ons ’n wagtende houding aankweek en die raad toepas wat ons van God se Woord en sy organisasie ontvang, sal ons tyd van “vreugdegeroep” kom.
Wat is ware berou?
18 As iemand wat uitgesit is, regtig berouvol is, sal hy die vergaderinge gereeld bywoon. Hy sal ook die ouermanne se raad om gereeld te bid en die Bybel te studeer, toepas. Hy sal ook sy bes doen om die omstandighede te vermy wat tot sy sonde gelei het. As hy hard daaraan werk om sy verhouding met Jehovah te herstel, kan hy seker wees dat Jehovah hom heeltemal sal vergewe en dat die ouermanne hom sal help om weer deel van die gemeente te word. Die ouermanne sal natuurlik elke saak anders hanteer omdat elke persoon se omstandighede anders is. En hulle sal nie onnodig streng wees wanneer hulle oordeel nie.
Geestelike skatte
Glanspunte uit die Eerste Boek van Psalms
31:23—Hoe word ’n hoogmoedige persoon oorvloedig vergeld? Die vergelding hier is straf. ’n Regverdige ontvang sy vergelding vir sy onopsetlike foute in die vorm van dissipline van Jehovah af. Aangesien ’n hoogmoedige persoon nie sy verkeerde weg verlaat nie, word hy oorvloedig vergeld met swaar straf.—Spreuke 11:31; 1 Petrus 4:18.
22-28 APRIL
SKATTE UIT GOD SE WOORD | PSALM 32-33
Hoekom ’n ernstige sonde bely?
Jehovah se barmhartigheid red ons van wanhoop
7 As ons ons aan ernstige oortreding van God se wet skuldig gemaak het, vind ons dit dalk moeilik om ons sondes te bely, selfs teenoor Jehovah. Wat kan onder sulke omstandighede gebeur? In Psalm 32 het Dawid erken: “Toe ek geswyg het [pleks van te bely], het my gebeente uitgeteer in my gebrul die hele dag; want u hand [Jehovah s’n] was dag en nag swaar op my; my murg het verander soos deur somergloed” (Verse 3, 4). Dit het sondige Dawid uitgemergel om sy sonde te probeer verberg en ’n skuldige gewete te probeer onderdruk. Sielswroeging het sy krag so uitgeput dat hy soos ’n droogtegeteisterde boom sonder lewegewende vog was. Trouens, hy het heel moontlik verstandelik en fisies nadelige gevolge ondervind. In ieder geval, hy het sy vreugde verloor. Wat moet ons doen as enigeen van ons ons in ’n soortgelyke toestand bevind?
’n God wat “vergewensgesind” is
8 ’n Berouvolle Dawid het gesê: “My sonde het ek uiteindelik aan u bely, en my ongeregtigheid het ek nie bedek nie. . . . En u het die ongeregtigheid van my sondes vergewe” (Psalm 32:5). Die term “vergewe” vertaal ’n Hebreeuse woord wat basies “optel” of “dra” beteken. Die gebruik daarvan in hierdie geval beteken om “skuld, sonde, oortreding” weg te neem. Jehovah het dus as ’t ware Dawid se sondes opgetel en dit weggeneem. Dit het ongetwyfeld Dawid se skuldgevoelens verlig (Psalm 32:3). Ons kan ook volle vertroue hê in die God wat die sondes wegneem van diegene wat sy vergifnis soek op grond van hulle geloof in Jesus se losprysoffer.—Matteus 20:28.
Belydenis wat lei tot genesing
Nadat Dawid sy sonde bely het, het hy nie aan ’n negatiewe gevoel van waardeloosheid toegegee nie. Sy woorde in die psalms oor belydenis toon die verligting wat hy gevoel het, asook sy vasbeslotenheid om God getrou te dien. Kyk byvoorbeeld na Psalm 32. In vers 1 lees ons: “Welgeluksalig is hy wie se oortreding vergewe, wie se sonde bedek is.” Ongeag hoe ernstig die sonde is, ’n gelukkige uiteinde is moontlik as ’n persoon opregte berou toon. Een manier waarop ’n mens hierdie opregtheid kan toon, is deur volle verantwoordelikheid vir jou dade te aanvaar, soos Dawid gedoen het (2 Samuel 12:13). Hy het homself nie voor Jehovah probeer regverdig of ander die skuld probeer gee nie. Vers 5 sê: “My sonde het ek U bekend gemaak, en my ongeregtigheid het ek nie bedek nie. Ek het gesê: Ek wil aan die HERE my oortredinge bely; en Ú het die ongeregtigheid van my sonde vergewe.” As iemand sy sondes opreg bely, bring dit verligting mee, sodat sy gewete hom nie meer hoef te kwel oor vorige oortredinge nie.
Geestelike skatte
Glanspunte uit die Eerste Boek van Psalms
33:6; voetnoot in NW—Wat is “die gees”, of “asem”, van Jehovah se mond? Hierdie gees is God se werkende krag, of heilige gees, wat hy gebruik het om die fisiese hemele te skep (Genesis 1:1, 2). Dit word die gees van sy mond genoem omdat dit, soos ’n kragtige asem, uitgestuur kan word om dinge van ’n afstand af te doen.
29 APRIL–5 MEI
SKATTE UIT GOD SE WOORD | PSALM 34-35
‘Loof Jehovah altyd’
Laat ons Jehovah se naam saam verhef
11 “Ek sal Jehovah te alle tye loof; sy lof sal voortdurend in my mond wees” (Psalm 34:1). Terwyl Dawid as ’n uitgeworpene gelewe het, het hy ongetwyfeld baie materiële sorge gehad, maar soos hierdie woorde toon, het sy daaglikse sorge nie sy vasbeslotenheid oorskadu om Jehovah te loof nie. Wat ’n goeie voorbeeld is dit tog vir ons wanneer ons ontberinge verduur! Hetsy ons op skool, by die werk, saam met mede-Christene of in die openbare bediening is, ons grootste begeerte moet wees om Jehovah te loof. Dink net aan die tallose redes wat ons het om dit te doen! Daar is byvoorbeeld geen einde aan wat ons in Jehovah se wonderlike skeppingswerke kan ontdek en geniet nie. En dink aan wat hy deur middel van die aardse deel van sy organisasie tot stand gebring het! In hedendaagse tye het Jehovah getroue mense op kragtige wyse gebruik, al is hulle onvolmaak. Hoe vergelyk God se werke met dié van mense wat deur die wêreld verafgod word? Stem jy nie saam met Dawid nie, wat ook geskryf het: “Daar is niemand soos u onder die gode nie, o Jehovah, ook is daar niks soos u werke nie”?—Psalm 86:8.
Laat ons Jehovah se naam saam verhef
13 “In Jehovah sal my siel roem; die sagmoediges sal hoor en sal bly wees” (Psalm 34:2). Dawid het hier nie oor enige persoonlike prestasies geroem nie. Hy het byvoorbeeld nie gespog oor die manier waarop hy die koning van Gat om die bos gelei het nie. Hy het besef dat Jehovah hom beskerm het toe hy in Gat was en dat hy met Jehovah se hulp ontkom het (Spreuke 21:1). Dawid het derhalwe nie in homself geroem nie, maar in Jehovah. As gevolg hiervan is sagmoediges tot Jehovah aangetrek. Jesus het eweneens die naam van Jehovah verheerlik, en dit het nederige, ontvanklike mense tot Hom aangetrek. Vandag word sagmoedige mense uit alle nasies aangetrek tot die internasionale gemeente van gesalfde Christene, waarvan Jesus die Hoof is (Kolossense 1:18). Die harte van sulke sagmoedige mense word geraak wanneer hulle hoor hoe God se naam deur sy nederige knegte verheerlik word en wanneer hulle die Bybel se boodskap hoor, wat hulle met die hulp van God se heilige gees verstaan.—Johannes 6:44; Handelinge 16:1.
Laat ons Jehovah se naam saam verhef
15 “Ek het Jehovah geraadpleeg, en hy het my geantwoord, en uit al my verskrikkinge het hy my verlos” (Psalm 34:4). Hierdie ondervinding was vir Dawid belangrik. Daarom het hy verder gesê: “Hierdie geteisterde het geroep, en Jehovah het gehoor. En uit al sy benoudhede het Hy hom gered” (Psalm 34:6). Wanneer ons met medegelowiges omgaan, het ons baie geleenthede om opbouende ondervindinge te vertel van hoe Jehovah ons gehelp het om onder moeilike omstandighede te volhard. Dit versterk die geloof van ons medeaanbidders, net soos Dawid se woorde die geloof van sy ondersteuners versterk het. In Dawid se geval het sy metgeselle “na [Jehovah] opgesien en begin straal, en hulle aangesig kon onmoontlik beskaamd word” (Psalm 34:5). Hoewel hulle vir koning Saul gevlug het, was hulle nie beskaamd nie. Hulle was oortuig dat Dawid God se steun geniet, en hulle gesigte het gestraal. Net so sien nuwe belangstellendes sowel as dié wat al lank ware Christene is, op na Jehovah om hulle te ondersteun. Omdat hulle sy hulp al persoonlik ervaar het, weerspieël hulle stralende gesigte hulle vasbeslotenheid om getrou te bly.
Geestelike skatte
Glanspunte uit die Eerste Boek van Psalms
35:19—Wat beteken Dawid se versoek dat dié wat hom haat, nie toegelaat moet word om hulle oog te knip nie? Om die oog te knip, sou aandui dat Dawid se vyande hulle daarin verlekker dat hulle kwaadwillige planne teen hom geslaag het. Dawid het gevra dat dit nie moet gebeur nie.