’n Versamelaar wat die Skepper wou vereer

TOE die Amerikaanse beeldhouer en skoenlapperversamelaar Herman Strecker ’n eeu gelede gesterf het, het hy op daardie stadium die grootste en belangrikste versameling van skoenlappers en motte in die Amerikas agtergelaat. Die grootste gedeelte van sy versameling, wat uit ongeveer 50 000 eksemplare bestaan, behoort nou aan die Field-museum in Chicago, Illinois, VSA. Een spesie van die reusesymotte van Suid-Amerika in die versameling was anders weens sy naam. Mnr. Strecker het in sy boek Lepidoptera verduidelik dat hy hierdie spesie nie na iemand vernoem het wat hom met ’n ete of ’n lening kon vergoed het nie.a Hy het dit eerder na die Skepper vernoem. Op dié manier sou hierdie “wonderlike” spesie mense wat dit sien aan God laat dink. As gevolg van mnr. Strecker se wens om die Skepper te vereer, dra hierdie symot vandag die wetenskaplike naam Copiopteryx jehovah.

Party van mnr. Strecker se tydgenote het egter beswaar gemaak omdat hy God se naam gebruik, want, soos een kritikus geskryf het, “die naam bring in die opregte en nadenkende verstand alles na vore wat heilig is”. Mnr. Strecker het hierop geantwoord: “As dit die geval is, is ek inderdaad bly oor my keuse, want na my gedagte moet enigiets wat ons aan die Skepper laat dink . . . voordelig wees; en watter beter manier is daar om oor heilige dinge na te dink—oor die bewyse van die grootsheid en krag van die Allerhoogste?” Daarom het die versamelaar Strecker afgesluit: “Dat daar enige geldige beswaar kan wees om een van die Skepper se interessantste werke na Hom te vernoem, kan ek my nie indink nie.”

Strecker se vroomheid en verering van die Skepper is opmerkenswaardig. Christene probeer vandag om die majestueuse naam Jehovah op maniere te gebruik wat dit vereer.

[Voetnoot]

[Prent op bladsy 31]

Herman Strecker

[Erkenning]

Herman Strecker: Uit die boek The Passing Scene, Vol. 8/The Historical Society of Berks County

[Prent op bladsy 31]

(Werklike grootte)