Die Bybel se beskouing

Is hipnotisme vir Christene?

‘Daar mag niemand onder jou gevind word wat ’n towerspreuk oor ander uitspreek nie.’—DEUTERONOMIUM 18:10, 11.

HIPNOTISME is ’n kontroversiële onderwerp waaroor daar al baie gedebatteer is.a Selfs deskundiges op die gebied vind dit moeilik om te verduidelik. Daar word oor die algemeen aanvaar dat hipnose ’n gewysigde bewussynstoestand, of beswyming, is. Die meeste mense stel egter meer belang in wat hipnotisme kan doen as in wat dit is.

Dit het in onlangse jare onder gesondheidspraktisyns in sommige lande ’n algemene gebruik geword om hipnotisme as ’n vorm van behandeling aan te beveel. Die tydskrif Psychology Today sê byvoorbeeld: “Hipnoterapie kan gebruik word om hoofpyne te behandel, geboortepyne te verlig, jou te help om op te hou rook, narkose te vervang en studiegewoontes te verbeter—sonder enige newe-effekte.” Aan die ander kant assosieer baie mense hipnotisme met spiritisme en die okkulte.

Wat is die Bybelse beskouing? Die Bybel is natuurlik nie ’n mediese handboek nie, en hipnotisme word nie spesifiek daarin bespreek nie. Maar die beginsels in God se Woord kan ons help om te sien wat God se beskouing is.

Hipnotisme en die okkulte—Is daar ’n verband?

Is die bewering dat hipnotisme met die okkulte verband hou net die produk van iemand se verbeelding? Fantasieverhale in rolprente en storieboeke het moontlik die idee bevorder, maar daar is grondige rede om te glo dat hipnotisme met spiritisme verband hou. Die Encyclopedia of Occultism and Parapsychology verduidelik aangaande hipnotisme: “Die geskiedenis daarvan is nou verweef met die okkulte.” Godsdiensbeswymings, wat deur die geskiedenis heen ’n deel van towery en die toorkuns was, word oor die algemeen as ’n vorm van hipnose beskou. Die priesters in eertydse Egipte en Griekeland het ook ’n soort hipnotiese toestand gebruik om siektes in die naam van hulle valse gode te probeer genees.

Die ensiklopedie wat hierbo aangehaal is, sê: “Selfs vandag word talle hipnotiese verskynsels as ‘spiritisties’ beskou.” Hoewel dit moeilik is om te bepaal in watter mate verskeie vorme van hipnotisme met die okkulte te doen het, is dit duidelik dat God alle vorme van spiritisme uitdruklik veroordeel (Deuteronomium 18:9-12; Openbaring 21:8). Christene kan dus nie die aspekte van hipnotisme ignoreer wat beslis onskriftuurlik is nie.

Uitwerking op gedrag

Wat van hipnose se uitwerking op ’n persoon se verstand en gedrag? Bestaan daar enige gevaar? ’n Geldige rede tot kommer is dat ’n gehipnotiseerde persoon dalk min beheer oor sy dade het. Hipnotiseurs wat as verhoogkunstenaars optree, maak hiervan gebruik en kry vrywilligers om dinge te doen wat hulle normaalweg nie sal doen nie, selfs om voor te gee dat hulle dronk is.

The Encyclopedia Americana sê oor hierdie openbare vertonings: “Die gehipnotiseerde persoon is moontlik baie vatbaar vir selfs subtiele suggestie, hy het moontlik maklik toegang tot sy onbewuste drange wat gewoonlik goed versteek is, en terwyl hy onder hipnose is, kan hy voel dat alle sosiale en persoonlike inhibisies ten opsigte van sy gedrag verwyder is.” Collier’s Encyclopedia sê: “Die gehipnotiseerde persoon se gedagtes is heeltemal gefokus sodat hy baie vatbaar is vir die hipnotiseur se suggestie en gewillig is om dit uit te voer.”

Klink dit onskadelik? Sal dit van ’n ware Christen verstandig wees om toe te laat dat ander sy verstand deur middel van hipnotiese suggesties beïnvloed? Dit sal in stryd wees met die apostel Paulus se vermaning: “Bied . . . julle liggaam aan . . . as ’n offerande wat lewend, heilig en vir God aanneemlik is, ’n heilige diens met julle denkvermoë. En moenie langer na hierdie stelsel van dinge gevorm word nie, maar word verander deur julle verstand te hervorm, dat julle kan seker maak wat die goeie en aanneemlike en volmaakte wil van God is.”—Romeine 12:1, 2.

Kan ’n Christen ‘’n goeie gewete behou’ as hy toelaat dat iemand hom in ’n toestand plaas waarin hy nie volle beheer het oor sy gedagtes of begeertes of selfs sy dade nie? (1 Petrus 3:16). Die Bybel gee hierdie raad: “Elkeen van julle moet weet hoe om in heiliging en eer sy eie vat in besit te kry” (1 Tessalonisense 4:4). Dit is duidelik dat hipnose ’n mens se vermoë belemmer om sulke raad te volg.

’n Hoop op volmaakte gesondheid

Met die oog op die bogenoemde Bybelbeginsels vermy Jehovah se Getuies tegnieke wat met hipnose of selfhipnose te doen het. Hulle slaan ag op die bevel in Deuteronomium 18:10, 11: ‘Daar mag niemand onder jou gevind word wat ’n towerspreuk oor ander uitspreek nie.’ Vir dié met gesondheidsprobleme is daar baie ander vorme van behandeling wat ’n mens nie blootstel aan die gevare van die okkulte of behels dat ’n mens se verstand deur ander gemanipuleer word nie.

As Christene gebruike vermy wat in stryd met Bybelbeginsels is, kan hulle die hoop hê om vir ewig in God se regverdige nuwe wêreld te lewe. Dan sal die mensdom volmaak wees in liggaam en verstand sonder die gebruik van hipnotisme.—Openbaring 21:3, 4.

[Voetnoot]