Noodleniging ná oorstromings in die Kaukasus

DEUR ONTWAAK!-MEDEWERKER IN RUSLAND

VERLEDE jaar in Rusland in die noordelike Kaukasus-gebied het drie maande se reën in net twee dae geval. Tientalle riviere het hulle oewers oorstroom. Selfs klein stroompies het meesleurende riviere geword en alles wat in hulle pad was, weggespoel. Damme het gebreek en huise en ander strukture is verwoes. Skielik was duisende mense haweloos. Baie wat nie vinnig genoeg uit hulle huise kon kom nie, het omgekom. Ander het hulpeloos toegekyk hoe onkeerbare waters hulle geliefdes meesleur.

In die stad Newinnomisk het ’n gesin op hulle trekker probeer wegkom. Maar ’n groot golf het die trekker omgekeer, en die hele gesin het omgekom. Party het gesterf terwyl hulle ander probeer red het. Volgens amptelike skattings is 335 000 mense deur die oorstromings geraak. Van hulle is meer as 200 dood en talle vermis.

Tienduisende huise is oorstroom. Waterpype en rioolstelsels is vernietig. Die onkeerbare water het selfs lyke wat begrawe was, en die karkasse van diere wat aan miltsiekte dood is, oopgespoel. Volgens skattings was die vloedskade sowat 16 miljard roebel, of ongeveer 4 miljard rand.

Dit was hartverskeurend om hierdie pragtige, vrugbare land, waaroor daar dikwels gesing en gedigte geskryf is, te aanskou! Tog het die ramp nie ware naasteliefde vernietig nie.

Noodleniging word gou voorsien

Aanvanklik was daar geen skoon water, elektrisiteit, gas of telefoonkommunikasie nie. Mense kon nie met mekaar in aanraking kom nie. Meer as 3 000 Getuies van Jehovah woon in die geteisterde gebied en meer as 700 van hulle woon in en om Newinnomisk. Toe die Getuies dus van die oorstromings hoor, het hulle dadelik spesiale noodlenigingskomitees gestig om in die behoeftes van die vloedslagoffers te voorsien. Hierdie komitees het aan die werk gespring selfs voordat die staat se reddingswerkers opgedaag het.

In die klein dorpie Orbeljanofka, omtrent 60 kilometer suidoos van Newinnomisk, het die water vinnig gestyg. Agt mense, insluitende twee Getuiesusters, het op die kruin van ’n koppie skuiling gesoek. Maar so ook klein diertjies en baie slange. Gevolglik moes die agt mense die hele nag lank die slange verwilder.

Teen die volgende oggend het die plaaslike Getuies na maniere begin soek om hulle twee gestrande Christensusters te bereik. Vroeg in die middag het hulle uiteindelik ’n klein rubberbootjie in die hande gekry. Maar voordat die Getuies die susters gered het, het hulle eers ’n bejaarde verlamde man met die bootjie na veiligheid gebring. Later, terwyl hulle die susters na veiligheid gebring het, het ’n helikopter opgedaag en die ander mense opgepik wat op die koppie gestrand was.

Later daardie dag het die Getuies in die bootjie nog ander gered. Toe die Getuies mense gevra het: “Weet julle wie ons is?” het hulle geantwoord: “Die Departement van Noodtoestande natuurlik.” Hulle was verbaas om te hoor wie ons is.

Die Getuies in Newinnomisk het ’n vervoerbare kombuis gekoop en warm etes vir vloedslagoffers voorberei. Hulle het nie net kos nie, maar ook water, klere en medisyne afgelewer. Spanne Getuievrywilligers het ook huise skoongemaak en puin van erwe af opgeruim.

’n Getuie-egpaar in Zelenokoemsk wat hulle eie besigheid het, het hulle voertuig gebruik om water, kos en klere te vervoer, wat hulle by ’n groothandelsmark gekoop het. Toe die vrou se kennisse wou weet vir wie sy alles koop, het sy verduidelik dat dit vir medegelowiges is wat deur die ramp getref is. Haar liefdevolle gesindheid het hulle so geraak dat hulle ook wou help. Een besigheidsvrou het ’n sak noedels geskenk, ’n ander het ’n groot pak seep gegee en ander het sakke suiker voorsien.

Noodleniging van verafgeleë plekke

Aangesien baie Getuies in Rusland wou weet hoe hulle die vloedslagoffers kon help, is ’n spesiale fonds vir hulle gestig. Selfs vrywillige werkers by die Administratiewe Sentrum van Jehovah se Getuies in Rusland, wat naby St. Petersburg geleë is, het gehelp. Party het nuwe items vir die vloedslagoffers gekoop. Een van hulle het verduidelik: “Ek het my beste goed gegee omdat ek iets het, maar ons broers en susters het niks nie.”

Die Administratiewe Sentrum het ook briewe aan sowat 150 gemeentes van Jehovah se Getuies in St. Petersburg en Moskou gestuur en verduidelik hoe die broers geld, kos en klere kon skenk. Hoewel die ekonomiese toestand in Rusland veel te wense laat en die meeste Getuies maar arm is, het hulle ruimhartige bydraes gemaak. Dit was soortgelyk aan die vrygewigheid wat die arm Christene in Masedonië aan hulle behoeftige broers en susters in Judea betoon het.—2 Korintiërs 8:1-4.

Nadat die geskenkte items by sentrale versamelpunte gesorteer is, is dit op vragmotors gelaai en na die rampgebied geneem. Benewens hierdie geskenkte items het die Administratiewe Sentrum tien ton kos, 500 stelle lakens, seep en ontsmettingsmiddels gekoop, sowel as gereedskap en werksklere vir die opruimingswerk ná die ramp. Altesaam het ses 50-tonvragmotors noodlenigingvoorrade na die noordelike Kaukasus-gebied geneem.

Vrygewigheid lei tot ’n getuienis

Die werk wat die Getuies gedoen het gedurende die skoonmaak van die rampgebied, het nie ongemerk gebly nie. Neem byvoorbeeld wat gebeur het in die pragtige vakansiestad Kislowodsk, waar daar meer as 300 Getuies is. Hulle het hulle dienste aan die stadsraad aangebied en het ’n area gekry om skoon te maak.

Op 28 Junie om 8:00 vm. het omtrent 150 Getuies, insluitende gesinne, hulle gereedskap gebring en bymekaargekom om te begin werk. Party het onbetaalde verlof geneem om aan die skoonmaakwerk deel te neem. Kort voor lank het die onderburgemeester in ’n motor opgedaag en uitgeklim. “Wie is hierdie mense?” het hy gevra.

“Hulle is Jehovah se Getuies”, is daar vir hom gesê. “Hulle het gekom om die stad ná die ramp skoon te maak.”

Die onderburgemeester was verbaas om soveel mense te sien en het gesê: “Mooi so! Dankie! Dit is wonderlik!”

Later, net voor middagete, het nog ’n stadsamptenaar in haar motor verbygery. Sy het stilgehou, uitgeklim en die Getuies genader. “Ons sien wat julle doen en ons is eenvoudig verbaas”, het sy gesê. “Ons het nog nooit mense sien werk soos julle werk nie. Julle het reeds soveel gedoen!”

Op min of meer daardie selfde oomblik het ’n bejaarde vrou wat verbygeloop het, stil gaan staan en gevra: “Waarom werk hierdie mense so hard?” Toe daar vir haar gesê is dat Jehovah se Getuies die stad help, was daar trane in haar oë. “Julle is ware gelowiges”, het sy gesê. “Mense wys hulle ware kleure wanneer ’n ramp tref.” ’n Ander vrou het gesê: “Wat ’n wonderlike ding om te doen! Ek het dit lank laas gesien.”

Die volgende dag het die plaaslike koerant Na Vodakh Jehovah se Getuies geprys en gesê dat hulle meer as 100 ton slik uit die stad verwyder het. Stadsamptenare van Kislowodsk het ’n dankbrief aan die Getuies geskryf en gesê: “Julle waardevolle bydrae het die stad tot sy vorige prag herstel . . . Die woorde van waardering van ons stad se talle besoekers sal ongetwyfeld julle grootste beloning wees.”

Hoewel die natuurramp wat die noordelike Kaukasus-gebied getref het groot verliese en verwarring veroorsaak het, was Jehovah se Getuies bly dat hulle liefde aan hulle medegelowiges en hulle naaste kon betoon. Dit het hulle veral bly gemaak omdat hulle weet dat sulke liefdesblyke Jehovah, ons Skepper, verheerlik.

[Kaarte op bladsy 16]

(Sien publikasie vir oorspronklike teksuitleg)

Swart See

KAUKASUS-GEBERGTE

Newinnomisk

Orbeljanofka

Zelenokoemsk

Kislowodsk

Kaspiese See

[Erkenning]

Aardbol: Mountain High Maps® Copyright © 1997 Digital Wisdom, Inc.

[Prent op bladsy 17]

Getuies het hierdie vervoerbare kombuis gekoop en etes vir vloedslagoffers voorberei

[Prent op bladsy 17]

Hierdie Getuie het haar voertuig gebruik om kos en voorraad af te lewer

[Prent op bladsy 18]

Amptenare van Kislowodsk het die Getuies geprys omdat hulle gehelp het om hulle stad te herstel