Die ware oplossing vir armoede

HONDERDMILJOENE mense regoor die wêreld probeer elke dag om ten spyte van volslae armoede aan die lewe te bly. Dit is duidelik dat die mens ’n regverdige en onverderflike regering nodig het wat die opregte begeerte het om hierdie onregte te verander. So ’n regering moet ook magtig genoeg wees om sy goeie voornemens uit te voer. Is dit realisties om te verwag dat mense so ’n regering tot stand kan bring?

Die geskiedenis bevestig die waarheid van die Bybel se waarskuwing: “Moenie julle vertroue in edeles stel nie, ook nie in die mensekind, aan wie geen redding behoort nie” (Psalm 146:3). Het jy gevind dat vertroue op menseregerings of -leiers dikwels tot teleurstelling lei? Maar tot wie anders kan ons ons wend?

Miljoene mense het in werklikheid al gebid vir ’n regverdige regering wat die onregverdige situasie sal verander. Jy het dalk ook al die modelgebed gebid wat Jesus ons geleer het: “Ons Vader in die hemele, laat u naam geheilig word. Laat u koninkryk kom. Laat u wil geskied, soos in die hemel, so ook op die aarde. Gee ons vandag ons brood vir hierdie dag; en vergewe ons ons skulde, soos ons ook ons skuldenaars vergewe het. En bring ons nie in versoeking nie, maar verlos ons van die bose.”—Matteus 6:9-13.

Is dít die Koninkryk wat ons nodig het? Is dit regverdig en onverderflik? Is dit magtig genoeg om sy goeie voornemens uit te voer? Ongetwyfeld! Die God wat hierdie regering tot stand gebring het, “ons Vader in die hemele”, is “’n regverdige God en ’n Redder” wat “regverdig in al sy werke” is (Jesaja 45:21; Daniël 9:14). Van hom word daar gesê: “U is te suiwer van oë om die kwaad te sien”, en daarom kan ons seker wees dat sy regering nooit verdorwe sal raak nie (Habakuk 1:13). “God [is] nie partydig . . . nie, maar in elke nasie is die mens wat hom vrees en regverdigheid beoefen, vir hom aanneemlik”, en daarom weet ons dat hy op onpartydige wyse in die welsyn van elke mens op aarde belangstel.—Handelinge 10:34, 35; Romeine 2:11.

Reeds opgerig en in werking!

Hoewel God se Koninkryk ’n hemelse regering is, sal dit aangeleenthede op aarde daadwerklik rig om die uitvoering van God se voornemens te verwesenlik. Dit sluit in dat God se volmaakte regering onvolmaakte menseregerings sal vervang. Hierdie belofte is in Daniël 2:44 opgeteken: “In die dae van dié konings [regerings] sal die God van die hemel ’n koninkryk oprig wat nooit vernietig sal word nie. En die koninkryk sal aan geen ander volk oorgedra word nie. Dit sal al hierdie koninkryke verbrysel en daar ’n einde aan maak, en self sal dit tot onbepaalde tye bly staan.”

Onder leiding van hierdie Koninkryk kan God se wil uiteindelik in die hemel asook op aarde geskied. Hoe bemoedigend is dit tog om te weet dat dit ’n regering sal wees wat alle spore van die ongelykheid sal kan uitwis wat in die verlede daartoe bygedra het dat die kloof tussen ryk en arm ontstaan het! Daar sal nie meer ’n paar wees wat ’n oorvloed het en baie ander wat niks het nie.

Hoe verblydend is dit tog om te weet dat God se hemelse regering nou gereed is om hierdie probleme vir ewig op te los! Bybelchronologie en wêreldgebeure toon duidelik dat God se regering in 1914 in die hemel opgerig is.a Dit is dus al byna ’n eeu lank daadwerklik besig om die grondslag vir ’n nuwe wêreld van regverdigheid te lê.

Diegene wat besef dat die Koninkryk opgerig is en nou die leiding daarvan gehoorsaam volg, is onpartydig. Jehovah se Getuies doen hulle predikingswerk in byna elke land. Die burgers van hierdie lande, of hulle nou ryk is of nie, word die geleentheid gegee om te leer hoe hulle die ewige lewe kan verkry (Johannes 17:3). Die Getuies laat nie toe dat ekonomiese verskille iemand se posisie of status in hulle gemeentes bepaal nie. Mense word nie geoordeel op grond van wat hulle besit nie. Hulle word eerder gerespekteer vir die soort mense wat hulle is. Daar word groter klem gelê op geestelike as op materiële waardes.

Wil jy graag uitvind hoe jy onder hierdie regverdige regering kan lewe? Begin dan vandag om ondersoek in te stel. Vind uit waarom jy daarna kan uitsien om die lewe te geniet in ’n wêreld wat nie deur rykdom verdeel sal word nie.

[Voetnoot]

[Venster/Prente op bladsy 8, 9]

Almal broers, hetsy ryk of arm

◼ Teen die einde van die Tweede Wêreldoorlog het baie Getuies van Jehovah in Europa en die Ooste voedsel, klere en huisvesting nodig gehad. Getuies in ander lande het tonne klere en voedsel aan hulle geestelike broers in Europa, die Filippyne en Japan gestuur. Getuies in die Verenigde State en Kanada het bydraes gelewer sodat noodlenigingsvoorrade gestuur kon word na België, Duitsland, Engeland, Finland, Frankryk, Griekeland, Holland, Hongarye, Italië, Oostenryk, Pole, Roemenië en Tsjeggo-Slowakye (nou die Tsjeggiese Republiek en Slowakye).

[Prente]

Verenigde State

Switserland

Duitsland

◼ In onlangser tye, in die noordelike somer van 1994, het ’n span Getuievrywilligers van Europa hulle Christenbroers en -susters in Afrika te hulp gekom. Goed georganiseerde kampe en veldhospitale is vir Rwandese vlugtelinge opgerig. Groot hoeveelhede klere, komberse, voedsel en Bybellektuur is gestuur om meer as 7 000 geteisterdes te help—wat byna drie keer soveel is as die getal Jehovah se Getuies wat destyds in Rwanda was.

◼ Twee jaar later, in 1996, het oorlog in die ooste van die Demokratiese Republiek van die Kongo uitgebreek. Gewasse is vernietig, die voedselvoorraad is geplunder en toevoerlyne is afgesny. Die meeste mense kon net een maaltyd per dag bekostig, wat tot wanvoeding en siekte gelei het. Jehovah se Getuies in Europa het vinnig opgetree. ’n Noodlenigingspan van Getuies, waaronder mediese dokters, het met medisyne en geld daarheen gevlieg. Teen Junie 1997 het Getuies in België, Frankryk en Switserland die volgende geskenk: meer as 500 kilogram medisyne, 10 ton hoëproteïenbeskuitjies, 20 ton ander voedsel, 90 ton klere, 18 500 paar skoene en 1 000 komberse—waarvan die waarde byna R6,7 miljoen was.

◼ Jehovah se Getuies voorsien nie net in materiële behoeftes nie, maar stel selfs meer daarin belang om mense geestelik te help. Dit verklaar hulle begeerte om Koninkryksale te bou wat as sentrums van geestelike opleiding dien. In 1997 is daar berig: “Met die hulp van broers in ander lande kon die [Wagtoring]genootskap gedurende ’n tydperk van net vier maande in 75 lande help om 413 nuwe Koninkryksale te bou en nog 727 op te knap.” Teen 2003 het ’n verslag gelui: “Roemenië is een van die Europese lande wat baat vind by die reëling om Koninkryksale in lande met beperkte middele te bou, en 124 Koninkryksale is sedert Julie 2000 daar gebou. Die Oekraïne het ’n standaardplan vir feitlik al hulle Koninkryksale gebruik en het in 2001 61 sale en in 2002 nog 76 gebou. Met geld wat tot die Koninkryksaalfonds bygedra is, is honderde Koninkryksale in Bulgarye, Kroasië, Masedonië, Moldowa, Rusland asook Serwië en Montenegro gebou.”

[Prente]

Kroasië

Bulgarye

Roemenië

[Prent op bladsy 7]

’n Vrywilliger sien om na twee vlugtelingwesies

[Erkenning]

© Liba Taylor/Panos Pictures

[Prent op bladsy 10]

Jehovah se Getuies verkondig ’n boodskap van hoop

[Prent op bladsy 10]

God se Koninkryk sal armoede uitwis