Ons beskou die wêreld
◼ “Dronkbestuur is een van die misdade in Amerika wat die meeste lewens eis”, het die waarnemende minister van vervoer, Maria Cino, gesê. Gedurende 2005 was 39 persent van al die sterftes op Amerikaanse paaie alkoholverwant.—AMERIKAANSE DEPARTEMENT VAN VERVOER.
◼ “Vandag dryf daar meer as 46 000 stukke plastiekrommel op elke vierkante myl van die see.”—VERENIGDE NASIES SE OMGEWINGSPROGRAM.
◼ “Amerikaanse werknemers bestee 500 miljoen uur per jaar daaraan om [rekenaarspeletjies] by die werk te speel, teen ’n koste van $10 miljard [R71 miljard] weens verlore produktiwiteit.” Dit sluit nie tyd in wat “daaraan bestee word om persoonlike websoektogte te doen nie”.—MANAGEMENT-ISSUES.COM
Geweld teen kinders
“Vir baie kinders is geweld iets algemeens, ’n deel van hulle daaglikse lewe”, sê die Wêreldgesondheidsorganisasie. Volgens ’n onlangse verslag deur die VN se sekretaris-generaal “is daar in 2002 byna 53 000 kinders wêreldwyd doodgemaak”. Daarbenewens word miljoene kinders uitgebuit deur hulle as dwangarbeiders, prostitute en vir pornografiese doeleindes te gebruik. Kan sulke euwels vermy word? Die sekretaris-generaal se verslag sê: “Faktore wat waarskynlik by die huis sowel as op ander plekke as beskerming sal dien, is onder andere goeie ouerskap, die ontwikkeling van hegte bande tussen ouers en kinders en positiewe niegewelddadige dissipline.”
Goeie vriende, lang lewe!
As ’n mens ’n netwerk van goeie vriende het, kan dit jou heel moontlik langer laat lewe, berig die Journal of Epidemiology and Community Health. ’n Studie van bykans 1 500 Australiërs van 70 jaar en ouer het ondersoek hoe verhoudings lewensduur oor ’n tydperk van tien jaar geraak het. Die sterftesyfer onder mense met ’n sterk netwerk van vriende was 22 persent laer as dié onder mense met min vriende. Aktiewe vriendskappe het ook ’n positiewe uitwerking op bejaardes wanneer dit kom by “depressie, selfeffektiwiteit, eiewaarde, probleemhantering en moraal sowel as ’n sin van persoonlike beheer”, sê die berig.
Britte in die skuld
“Meer as ’n derde van volwassenes wat ’n bankrekening het, maak staat op hulle oortrekkingsfasiliteit om kop bo water te hou”, sê The Daily Telegraph van Londen. In plaas daarvan dat ’n oortrekkingsfasiliteit as ’n noodkredietfasiliteit beskou word, het dit ’n “absolute noodsaaklikheid” geword vir die 3,5 miljoen Britte wie se rekening permanent oortrokke is. Keith Tondeur, die hoof- uitvoerende beampte van die liefdadigheidsorganisasie Credit Action, skryf dit toe aan die “kultuur van onmiddellike bevrediging wat ons samelewing verswelg”. Tondeur waarsku: “Miljoene van ons lewe permanent bo ons inkomste, en die gebrek aan selfs basiese kennis oor hoe om met geld te werk, beteken dat die meeste van ons nie die vaagste benul het van hoeveel dit ons kos nie.”
Nagvlugte en aardverwarming
Die kondensasiespoor wat straalvliegtuie in die lug laat, het ’n uitwerking op atmosferiese temperatuur, sê Scientific American. Gedurende die dag weerkaats hierdie kondensasiespore inkomende sonlig, wat ’n algehele verkoeling van die atmosfeer veroorsaak. Maar snags word hitte onder die kondensasiespore vasgevang. Engelse navorsers het gevind dat “vlugte tussen 6 nm. en 6 vm. verantwoordelik is vir 60 tot 80 persent van die klimaatverwarming wat deur kondensasiespore veroorsaak word, hoewel hierdie vlugte slegs ’n kwart van alle lugverkeer verteenwoordig”, sê die berig.