Ons beskou die wêreld
◼ ’n Omvattende studie van die gesondheid van rifvormende koraalspesies toon dat 32,8 persent van dié wat ondersoek is, “groot gevaar loop om uit te sterf” as gevolg van klimaatsverandering of plaaslike steuring deur mense.—SCIENCE, VSA.
◼ Van die meer as 2 000 kinders met asemhalingsprobleme wat by ’n kindereenheid in ’n hospitaal in Atene, Griekeland, ondersoek is, is sowat “65 persent deur een of albei ouers aan [tabak]rook blootgestel is”.—KATHIMERINI—ENGLISH EDITION, GRIEKELAND.
◼ “Die vinnig stygende prys van olie, die toenemende lewenskoste, . . . die bedreiging van ’n ekonomiese resessie . . . en die voortdurende natuurrampe wat ons kwesbaarheid beklemtoon: dit is voor die hand liggend dat ons geen gepaste kort- of langtermynoplossings vir enige van hierdie ernstige probleme het nie.”—LLUÍS MARIA DE PUIG, PRESIDENT VAN DIE PARLEMENTÊRE VERGADERING VAN DIE EUROPESE RAAD.
◼ In Pole het 17 persent van die seuns en 18 persent van die meisies al met dwelms geëksperimenteer teen die tyd dat hulle 15 jaar oud was.—ŻYCIE WARSZAWY, POLE.
Konflik tussen leeus en mense
Namate die mensebevolking in Afrika toeneem, word die habitat vir dierelewe kleiner, wat “gereelde en dikwels gewelddadige ontmoetings” tot gevolg het, sê Africa Geographic, ’n tydskrif van Kaapstad. Dit lyk of veral leeus “mense as prooi geïdentifiseer het”. Byvoorbeeld, in Tanzanië het leeus sedert 1990 elke jaar ten minste 70 mense doodgemaak. In party gevalle, sê die tydskrif, is daar selfs leeutroppe wat “net op mense jag maak en hulle op die voorstoep van hulle hut vang of deur grasdakke en swak moddermure breek”.
Antieke graanskure in Egipte opgegrawe
Argeoloë van die Universiteit van Chicago wat in die suide van Egipte werk, het sewe antieke graanhouers opgegrawe, die grootste nog in dié land. Artefakte wat daar naby gevind is, het argeoloë in staat gestel om die silo’s tussen 1630 en 1520 v.G.J. te dateer. As die datering akkuraat is, het die houers in Moses se tyd bestaan. Die ronde houers van rousteen, wat ’n deursnee van 5,5 tot 6,5 meter het en seker ten minste 7,5 meter hoog is, was deel van ’n plaaslike administratiewe sentrum. Die universiteit se verslag oor die vonds sê dat sulke sentrums “as plekke gedien het waar die oorvloedige oes van die Nylvallei versamel is om deur die staat gebruik te word. Graan as betaalmiddel het die farao’s hulle mag gegee.” Die verslag het bygevoeg dat “graan ’n betaalmiddel was en dat die silo’s dus as ’n bank en ’n voedselbron gedien het”.
Papier so sterk soos yster
Navorsers by die Koninklike Instituut vir Tegnologie in Swede het ’n metode ontwikkel om papier uit houtsellulose te vervaardig wat die natuurlike sterkte van die vesels behou. Die normale meganiese verwerking van houtpap in papiervervaardiging beskadig die klein sellulosevesels en maak dit aansienlik swakker. Maar die Sweedse span het daarin geslaag om die pap met ensieme af te breek en dan die sellulosevesels sagkens in water te skei deur ’n meganiese klopper te gebruik. Wanneer die water van die onbeskadigde vesels gedreineer word, verbind dit in netwerke en vorm dit velle papier met ’n swigsterkte wat groter is as dié van gietyster en amper so groot is soos dié van boustaal.