Televisie
KORT nadat die mens geleer het om klank uit te saai, het uitvinders gewonder of hulle ook bewegende beelde kan uitsend. Om te verstaan hoe groot die uitdaging was, kan ons kyk hoe televisie vandag werk.
Eerstens fokus ’n TV-kamera ’n toneel op ’n trefplaat wat die beeld “lees”, amper soos jy skrif lees. Maar pleks van reëls letters op die bladsy te skandeer, skandeer dit reëls kolletjies (of beeldelemente) in die beeld. Dit verander die beeld wat dit sien, na ’n elektroniese videosein wat na ’n ander plek oorgesein kan word. ’n Ontvanger verander die sein dan weer terug na ’n bewegende beeld.
’n Skot met die naam John Logie Baird word erken as die eerste persoon wat ’n televisie gedemonstreer het. Toe hy weens swak gesondheid sy werk as ’n elektriese ingenieur opgegee het, het hy sy aandag toegespits op ’n onderwerp waarin hy sedert sy tienerjare belanggestel het—hoe om ’n masjien te bou wat bewegende beelde kan uitsend.
Baird se televisiekamera het ’n skyf gebruik (aanvanklik ’n hoededoos) met omtrent 30 gate wat in ’n spiraalvorm gerangskik is. Terwyl die skyf vinnig gedraai het, het die gate opeenvolgende reëls van die beeld geskandeer en lig op ’n foto-elektriese sel laat val. Die sel het ’n videosein voortgebring wat na ’n ontvanger oorgesein is. In die ontvanger is die sein versterk om ’n reëlbare lig agter ’n soortgelyke draaiende skyf te laat skyn om die beeld weer voort te bring. Die uitdaging was om die skywe te sinchroniseer. Terwyl Baird aan die projek geswoeg het, het hy hom onderhou deur skoene te poleer.
Baird het op 2 Oktober 1925 die eerste televisiebeelde van die een kant van sy solder na die ander kant oorgesein. Die eerste persoon wat op TV verskyn het, was ’n verskrikte seun wat in die kantoor op die grondverdieping gewerk het en wat met ’n halfkroon oorgehaal is om dit te doen. In 1928 het Baird die eerste televisiebeelde oor die Atlantiese Oseaan uitgesaai. Toe John Baird in New York aangekom het, was die inkennige Skot uiters verleë om deur ’n groep doedelsakspelers verwelkom te word. Hy was beroemd. Maar was dit die eerste keer dat bewegende beelde oorgesein is?