Die natuur was eerste
“Die oor wat hoor en die oog wat sien —Jehovah het hulle al twee gemaak.”—Spreuke 20:12.
JOU oë is soos klein televisiekameras. Hulle omskep beelde in elektriese seine en gelei hierdie seine deur die optiese senuwee na die agterkant van jou brein, die eintlike plek waar sig plaasvind.
Die oog is ’n wonder in miniatuur. Met ’n deursnee van net 24 millimeter en ’n gewig van sewe en ’n half gram getuig dit van vindingryke ontwerp. Dit het byvoorbeeld aparte stelsels vir gedempte en helder lig sodat jou oë 30 minute nadat jy by ’n donker vertrek ingestap het, 10 000 keer gevoeliger vir lig kan word.
Wat gee jou ’n skerp beeld in normale lig? Jou oog het oor die 100 keer meer liggevoelige selle (beeldelemente) as die meeste videokameras. Ook is ’n groot gedeelte van hierdie selle gekonsentreer in ’n klein kolletjie in die middel van die retina wat die fovea genoem word, wat die skerpste sig voorsien. Aangesien jy jou blik verskeie kere per sekonde verskuif, kry jy die indruk dat jou hele gesigsveld skerp is. Verbasend genoeg, jou oog se fovea is omtrent so groot soos die punt aan die einde van hierdie sin.
Elektriese seine van die liggevoelige selle word van die een senusel na die ander oorgedra tot by die optiese senuwee. Maar die senuselle dra die seine nie net oor nie. Hulle verwerk dit vooraf deur belangrike inligting te versterk en onnodige besonderhede te demp.
Die visuele korteks van jou brein is soos ’n gesofistikeerde video-ontvanger. Dit verskerp beelde deur die buitelyne duideliker te maak en vergelyk die seine van die selle wat gevoelig is vir hoofkleure, sodat jy miljoene kleure kan onderskei. Jou brein vergelyk ook die klein verskille tussen wat jou twee oë sien, sodat jy afstand kan waarneem.
Dink aan hoe jou oë gesigte in ’n skare deurkyk wat ver van jou af is en elektroniese impulse na jou brein stuur, wat die seine dan in duidelike beelde omskep. Dink ook aan hoe subtiele besonderhede van daardie gesigte vergelyk word met dié in jou geheue sodat jy jou vriend onmiddellik herken. Is hierdie proses nie ontsagwekkend nie?
[Prent op bladsy 7]
Die manier waarop die oog inligting verwerk, getuig van vindingryke ontwerp