Is dit ontwerp?
Die sandkasteelwurm se gom
● Chirurge herstel gebreekte bene met behulp van penne, plate en skroewe, maar hierdie instrumente is te groot om vir kleiner beenbreuke gebruik te word. Tot onlangs toe het navorsers nie geweet hoe om ’n kleefstof te ontwikkel wat in die vogtige omgewing van die menseliggaam kan hard word nie. Hulle het ’n moontlike oplossing gevind deur die sandkasteelwurm te bestudeer!
Dink hieraan: Die sandkasteelwurm maak sy buisvormige tuiste onder die water van stukkies sand en skulp. Elke stukkie word aan die volgende stukkie vasgeheg met ’n titseltjie gom wat deur ’n klier in die wurm se borsgedeelte vervaardig word. Hierdie gom is beter as mensgemaakte kleefstowwe wat tans gebruik word. Dit bevat ’n unieke stel proteïene wat, wanneer dit saamgevoeg word, veroorsaak dat die gom onder die water hard word—en vinnig ook! Die sandkasteelwurm is al ’n meestermesselaar genoem, en met goeie rede. Russell Stewart, van die Universiteit van Utah, sê dat hierdie diertjie “ingewikkelde kleefprobleme” opgelos het.
Navorsers het sintetiese weergawes van die sandkasteelwurm se gom gemaak wat selfs sterker is as die oorspronklike. Die gom wat op die ou end in operasiesale gebruik sal word, sal ook bioafbreekbaar moet wees, want wanneer dit gebruik word om gebreekte bene vas te heg, sal die gom moet oplos namate die been genees. As hierdie gom in die menseliggaam gebruik kan word, sal dit ’n mediese deurbraak wees.
Wat dink jy? Het die sandkasteelwurm se gom per toeval ontstaan? Of is dit ontwerp?
[Prent op bladsy 26]
Navorsers hoop om beenbreuke te herstel sonder om metaal te gebruik
[Foto-erkenning op bladsy 26]
Sandkasteelwurm: © Peter J. Bryant, University of California, Irvine