Eerlikheid is prakties
“Brood wat deur ’n leuen verkry is, is lekker vir ’n man, maar agterna sal sy mond vol gruis word.”—Spreuke 20:17.
MOET ’n mens oneerlik wees om in die sakewêreld sukses te behaal? Die antwoord is nee. Trouens, oneerlikheid is dikwels teenproduktief. Waarom? Omdat eerlike persone ’n besliste voordeel bo oneerlike persone het. ’n Eerlike persoon wen ander se vertroue, wat belangrik is vir sukses op die lang termyn.
Die waarde van vertroue
Jou reputasie wat eerlikheid betref, het ’n uitwerking op hoe suksesvol jy sal wees—of jy dit besef of nie. Die ondervinding van Franz, wat in die vorige artikel aangehaal is, lig dit toe. “Toe ek vir my huidige werkgewers begin werk het”, sê hy, “het hulle my eerlikheid sonder my medewete op verskeie maniere op die proef gestel. Ek het later gehoor dat ek die toets geslaag het. Gevolglik is ek meer verantwoordelikheid en vryheid gegee, en die eienaars het my vir my eerlikheid beloon. Ek weet dat daar ander mense is wat die werk beter as ek kan doen en wat beslis slimmer is as ek. Maar ek dink dat ek my werk behou het omdat my werkgewers my vertrou.”
Vermy onverstandige risiko’s
David, ’n sakeman wat in die vorige artikel aangehaal is, sê: “Wanneer ek gesien het hoe mense die reëls omseil om hulleself op die kort termyn te bevoordeel, het ek gedink: ‘Soms kom die rekening laat, maar dit kom altyd.’ Met ander woorde, oneerlikheid sal uiteindelik op die een of ander manier probleme meebring. Ons maatskappy het talle verdagte sakegeleenthede van die hand gewys. Baie van die maatskappye wat van hierdie geleenthede gebruik gemaak het, het later verdwyn, en party individue is geregtelik vervolg. Ons het sulke tragiese probleme vermy.”
Toe Ken in die suidooste van Afrika met beeste begin boer het, kon hy in die versoeking gekom het om amptenare om te koop om invoere te bespoedig en om invoerbelasting te ontduik. Hy sê: “Dit was iets algemeens, en baie ander boere het dit gedoen. Omdat ons eerlik was, het dit tien jaar geneem voordat ons plaas goed aan die gang was. Was dit die moeite werd? Ja! Dié wat omkoopgeld betaal het, is later heeltyd lastig geval deur korrupte amptenare wat nog geld wou hê.”
Ekonomiese probleme
Wanneer ’n besigheid die gevaar loop om bankrot te speel, is die druk groot om oneerlik te wees. Maar sulke omstandighede kan ook toon hoe waardevol dit is om ’n reputasie as ’n eerlike persoon te hê.
Neem die voorbeeld van Bill, wie se bouonderneming bankrot gespeel het tydens ’n insinking in die huismark in die Verenigde State. Hy vertel: “’n Aantal van ons groot kliënte se ondernemings het ondergegaan terwyl hulle ons honderdduisende rande geskuld het. Toe sake hopeloos begin lyk het, het ek ’n mededinger genader om te hoor of hulle enige van ons in diens sou neem. Binne 48 uur het hulle aangebied om my en die meeste van my werknemers in diens te neem. Daar is vir my gesê dat ek bekend is vir my goeie diens en eerlikheid.”
Al die mense wie se ondervindinge hierbo vertel word, is Jehovah se Getuies. Die standaarde wat hulle in sakeaangeleenthede volg, is op die Bybel gegrond, net soos alle ander aspekte van hulle lewe. Soos jy kan sien, het hulle eerlikheid nie hulle sukses in die sakewêreld ondermyn nie, maar eerder vir hulle praktiese voordele meegebring.
Maar daar sal altyd situasies wees waarin dit lyk of oneerlikheid voordelig sal wees. Is finansiële voordele die enigste maatstaf van sukses?
[Lokteks op bladsy 6]
Jou reputasie wat eerlikheid betref, het ’n uitwerking op hoe suksesvol jy sal wees—of jy dit besef of nie
[Prent op bladsy 7]
“Daar is vir my gesê dat ek bekend is vir my goeie diens en eerlikheid.”—Bill, Verenigde State