Deel 2
’n Aarde vry van lyding
1, 2. Watter ander beskouing het baie mense?
MAAR miljoene mense in alle wêrelddele het egter ’n heeltemal ander beskouing. Hulle verwag ’n wonderlike toekoms vir die mensdom. Hulle sê dat daar binnekort op hierdie aarde ’n wêreld heeltemal vry van goddeloosheid en lyding gaan wees. Hulle is vol vertroue dat alles wat sleg is binnekort uit die weg geruim gaan word en dat ’n volkome nuwe wêreld tot stand gebring gaan word. Hulle sê selfs dat die fondament van hierdie nuwe wêreld nou reeds gelê word!
2 Hierdie mense glo dat daar geen oorlog, wreedheid, misdaad, ongeregtigheid en armoede in die nuwe wêreld sal wees nie. Dit sal ’n wêreld sonder siekte, hartseer, trane en selfs die dood wees. Dan sal mense mettertyd volmaaktheid bereik en vir ewig in geluk op ’n aardse paradys lewe. Selfs diegene wat gesterf het, sal opgewek word en die geleentheid hê om vir ewig te lewe!
3, 4. Waarom het hierdie mense soveel vertroue in hulle beskouing?
3 Is hierdie beskouing van die toekoms net ’n droom, net wensdenkery? Nee, glad nie. Dit berus op ’n vaste geloof dat hierdie Paradys gewis aan die kom is (Hebreërs 11:1). Waarom is hulle so seker hiervan? Omdat die almagtige Skepper van die heelal dit belowe het.
4 Die Bybel sê aangaande God se beloftes: ‘Nie een woord van al die goeie woorde wat die HERE julle God oor julle gespreek het, het onvervuld gebly nie; alles het vir julle uitgekom, nie een woord daarvan het onvervuld gebly nie.’ “God is geen man dat Hy sou lieg nie . . . Sou Hý iets sê en dit nie doen nie, of spreek en dit nie waar maak nie?” “Die HERE van die leërskare het gesweer en gesê: Waarlik, soos Ek gedink het, so gebeur dit; en soos Ek besluit het, kom dit tot stand.”—Josua 23:14; Numeri 23:19; Jesaja 14:24.
5. Watter vrae moet beantwoord word?
5 Waarom het God egter in die eerste plek toegelaat dat slegte dinge plaasvind as dit sy doel was om ’n aardse paradys tot stand te bring? Waarom het hy sesduisend jaar lank gewag tot nou toe om reg te stel wat verkeerd is? Toon al hierdie eeue van lyding dalk dat God nie werklik vir ons omgee nie, of dat hy selfs nie bestaan nie?