Hoofstuk 7

Is ek gereed om die huis te verlaat?

“Soms voel ek dat mense op my neersien omdat ek 19 is en nog steeds by my ouers bly, asof ek eers ’n volwassene sal wees as ek op my eie bly.”—Katie.

“Ek is amper 20, en ek haat dit dat ek so min sê het oor wat in my lewe gebeur. Ek het dit al oorweeg om die huis te verlaat.”—Fiona.

LANK voordat jy gereed is om die huis te verlaat, sal jy dalk begin voel dat jy onafhanklik wil wees. Dit is normaal om so te voel. Soos in Hoofstuk 3 bespreek is, was God se oorspronklike voorneme immers dat jongmense grootword, uiteindelik hulle vader en moeder verlaat en hulle eie gesin begin (Genesis 2:23, 24; Markus 10:7, 8). Maar hoe sal jy weet of jy werklik gereed is om die huis te verlaat? Daar is drie belangrike vrae wat jy moet beantwoord. Die eerste is . . . 

Wat is my beweegredes?

Kyk na die lys hieronder. Nommer die redes waarom jy die huis wil verlaat in volgorde van belangrikheid.

․․․․․ Om van probleme by die huis weg te kom

․․․․․ Om meer vryheid te verkry

․․․․․ Sodat my vriende my meer sal respekteer

․․․․․ Om ’n vriend te help wat ’n woonstelmaat nodig het

․․․․․ Om êrens anders met vrywillige werk te gaan help

․․․․․ Om ondervinding op te doen

․․․․․ Om my ouers se finansiële las te verlig

․․․․․ Ander ․․․․․

Die redes wat hierbo gemeld word, is nie noodwendig sleg nie. Maar die vraag is: Wat is jou beweegrede? As jy byvoorbeeld die huis verlaat bloot om van beperkings ontslae te raak, wag daar heel moontlik ’n skok op jou!

Danielle, wat ’n ruk lank op haar eie gaan bly het toe sy 20 was, het baie uit die ondervinding geleer. Sy sê: “Ons almal moet met sekere beperkings saamleef. Wanneer jy op jou eie is, sal jou werkrooster of gebrek aan geld beperk wat jy kan doen.” Carmen, wat ses maande lank oorsee gaan bly het, sê: “Ek het die ondervinding geniet, maar ek het dikwels gevoel dat ek geen vrye tyd het nie! Ek moes bybly met die gewone huiswerk—die woonstel skoonmaak, dinge regmaak, onkruid uittrek, wasgoed was, vloere skrop, ensovoorts.”

Moenie toelaat dat ander druk op jou uitoefen om ’n oorhaastige besluit te neem nie (Spreuke 29:20). Selfs al het jy geldige redes om die huis te verlaat, het jy meer as net goeie bedoelings nodig. Jy het oorlewingsvaardighede nodig—en dit lei tot die tweede vraag . . .

Is ek gereed daarvoor?

Om op jou eie te gaan bly, is soos om in ’n wildernis te gaan stap. Sal jy die wildernis invaar sonder om te weet hoe om ’n tent op te slaan, vuur te maak, kos te kook of ’n kaart te lees? Nie sommer nie! Tog trek talle jongmense uit die huis uit met min van die vaardighede wat nodig is om ’n huishouding te behartig.

Die wyse koning Salomo het gesê: “Die skerpsinnige gee ag op sy voetstappe” (Spreuke 14:15). Kyk na die volgende onderhofies om jou te help bepaal of jy gereed is om op jou eie te gaan bly. Maak ’n ✔ langs die vaardighede wat jy reeds het en ’n X langs dié waaraan jy nog moet werk.

□ Geldsake: “Ek moes nog nooit self vir enigiets betaal nie”, sê Serena, 19. “Ek is bang om die huis te verlaat en om volgens ’n begroting te moet lewe.” Hoe kan jy leer om met geld te werk?

’n Bybelspreuk sê: “’n Wyse sal luister en meer onderrigting inneem” (Spreuke 1:5). Vra dus jou ouers hoeveel dit waarskynlik per maand sal kos vir een persoon om huur of ’n verband te betaal, kos te koop, ’n motor op die pad te hou of ander vervoerkoste te dek. Laat jou ouers jou dan leer hoe om ’n begroting op te stel en rekeninge te betaal.a

□ Huishoudelike vaardighede: Brian, 17, sê dat die ding waarvoor hy die bangste is as hy die huis sou verlaat, is om self sy wasgoed te moet was. Hoe weet jy of jy gereed is om vir jouself te sorg? Aron, 20, gee hierdie wenk: “Probeer ’n week lank lewe asof jy op jou eie bly. Eet net kos wat jy self voorberei het, wat jy self by die winkel gekoop het en waarvoor jy met jou geld betaal het. Dra klere wat jý gewas en gestryk het. Doen al jou eie huiswerk. En probeer om self uit te kom waar jy moet wees, sonder dat iemand anders jou optel of aflaai.” As jy hierdie wenk volg, sal dit twee dinge vir jou doen: Dit sal (1) jou waardevolle vaardighede leer en (2) jou waardering vergroot vir die werk wat jou ouers doen.

□ Sosiale vaardighede: Kom jy goed oor die weg met jou ouers, broers en susters? Indien nie, neem jy dalk aan dat die lewe makliker sal wees as jy saam met ’n vriend intrek. Maar kyk na wat Eve, 18, sê: “Twee van my vriendinne het saam ingetrek. Hulle was boesemvriendinne voordat hulle die woonstel gedeel het, maar hulle kon eenvoudig nie onder dieselfde dak woon nie. Die een was netjies, die ander slordig. Die een was geestelikgesind, die ander nie juis nie. Dit het net nie gewerk nie!”

Wat is die oplossing? Erin, 18, sê: “Jy kan baie leer oor hoe om met mense oor die weg te kom terwyl jy nog in die huis is. Jy leer hoe om probleme op te los en toegewings te maak. Iets wat ek opgelet het, is dat diegene wat die huis verlaat om onenigheid met hulle ouers te vermy, leer om van konflikte af weg te hardloop, nie om dit op te los nie.”

□ ’n Persoonlike geestelike roetine: Party verlaat die huis met die spesifieke doel om van hulle ouers se godsdiensroetine af weg te kom. Ander is vasbeslote om ’n goeie persoonlike roetine van Bybelstudie en aanbidding te volg, maar verval gou in slegte gewoontes. Hoe kan jy keer dat ‘jou geloof skipbreuk ly’?b—1 Timoteus 1:19.

Jehovah God wil hê dat ons almal die dinge wat ons glo, aan onsself moet bewys (Romeine 12:1, 2). Begin met ’n goeie persoonlike roetine vir Bybelstudie en aanbidding, en bly dan daarby. Skryf gerus jou geestelike roetine op ’n kalender neer en kyk of jy ’n maand lank daarby kan bly sonder dat jou ouers jou moet aanpor om dit te doen.

Die derde en laaste vraag waaraan jy moet dink, is . . . 

Waarheen is ek op pad?

Wil jy die huis verlaat om van probleme af weg te kom? Of om onder jou ouers se gesag uit te kom? Dan dink jy net aan wat jy agterlaat, nie aan waarheen jy op pad is nie. Hierdie benadering is net soos om te probeer bestuur terwyl jou oë stip op die truspieël gerig is—jy is so behep met wat jy agterlaat dat jy blind is vir wat voorlê. Die les? Moenie net daarop konsentreer om van die huis af weg te kom nie—hou jou oë gerig op ’n doelwit wat die moeite werd is.

Sommige jong volwassenes onder Jehovah se Getuies het getrek om in ander gebiede in hulle land of selfs in die buiteland te gaan preek. Ander trek om met die bou van plekke van aanbidding te help of om by ’n takkantoor van Jehovah se Getuies te gaan werk. Dan is daar weer ander wat meen dat hulle eers ’n ruk op hulle eie moet bly voordat hulle trou.c

Ongeag watter doelwit jy het, dink goed daaroor na. “Die planne van die vlytige lei gewis tot voordeel”, sê ’n Bybelspreuk, “maar elkeen wat oorhaastig is, stuur gewis op gebrek af” (Spreuke 21:5). Luister na jou ouers se raad (Spreuke 23:22). Bid oor die saak. En hou die Bybelbeginsels wat ons nou bespreek het, in gedagte terwyl jy hieroor besluit.

Die eintlike vraag is nie ‘Is ek gereed om die huis te verlaat?’ nie, maar ‘Is ek gereed om my eie huishouding te behartig?’ As die antwoord op hierdie laaste vraag ja is, is jy heel moontlik gereed om op jou eie te gaan bly.

[Voetnote]

SLEUTELTEKSTE

“’n Man [sal] sy vader en sy moeder verlaat.”—Matteus 19:5.

WENK

Gee jou ouers ’n tyd lank die volle bedrag wat nodig is om jou kos, huisvesting en ander uitgawes te dek. As jy nie jou uitgawes kan of wil dek terwyl jy in die huis is nie, is jy nie gereed om op jou eie te gaan bly nie.

HET JY GEWEET . . . ?

Die rede waarom jy die huis verlaat, kan beïnvloed hoe gelukkig jy sal wees nadat jy onder jou ouers se dak uit is.

AKSIEPLAN!

Die doelwit wat ek wil bereik deur die huis te verlaat, is ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Hoe kan dit jou tot voordeel strek om nog ’n ruk in die huis te bly, selfs al is julle gesinslewe moeilik?

● Wat kan jy doen, terwyl jy nog in die huis is, wat julle gesin tot voordeel sal strek én jou sal voorberei om jou eie huishouding te behartig?

[Lokteks op bladsy 52]

Dit is normaal om onafhanklik te wil wees. Maar as jy die huis wil verlaat bloot om van reëls af weg te kom, toon dit maar net dat jy nie werklik daarvoor gereed is nie.’’—Aron

[Prent op bladsye 50, 51]

Om die huis te verlaat, is soos om in die wildernis te gaan stap—jy moet oorlewingsvaardighede aanleer voordat jy die staptog aanpak