Ons lesers vra
Waar gaan die oorlog van Armageddon plaasvind?
Die oorlog van Armageddon gaan nie op ’n spesifieke slagveld plaasvind nie. Die hele aarde sal eerder die slagveld wees. Waarom? Omdat die twee strydende magte so groot is dat geen terrein groot genoeg is daarvoor nie.
Armageddon, of Har–Magedon, staan ook bekend as “die oorlog van die groot dag van God die Almagtige”. Jehovah God sal sy Seun, Christus Jesus, gebruik om ’n engeleleër teen die gesamentlike magte van al die goddelose heersers van die aarde aan te voer.—Openbaring 16:14; 19:11-16.
Die nasies word op die een of ander manier deur sataniese magte gelok om by die geveg aan te sluit. Die Bybel praat van “uitinge wat deur demone geïnspireer is”, wat uitgaan “na die konings [heersers] van die hele bewoonde aarde, om hulle te versamel . . . na die plek wat in Hebreeus Har–Magedon genoem word”.—Openbaring 16:14-16.
Openbaring het die verbeelding van tallose Bybellesers aangegryp soos geen ander Bybelboek dit gedoen het nie. Baie lesers wat voel dat Openbaring letterlik opgeneem moet word, het die presiese plek aangewys waar hulle glo die oorlog sal begin en hou gebeure in daardie gebied senuweeagtig dop. Die idee dat Armageddon na ’n spesifieke plek verwys, kan gevind word in die vroegste beskikbare Griekse kommentaar op Openbaring, wat in die sesde eeu G.J. deur Oekumenius geskryf is.
John F. Walvoord, ’n voormalige president van die Dallas- kweekskool, is dit eens met ’n gewilde beskouing onder Fundamentalistiese geestelikes en sê dat Armageddon “die finale noodlottige geveg in ’n desperate wêreldstryd [is] waarvan die middelpunt in die Midde-Ooste sal wees”. Walvoord identifiseer die brandpunt van hierdie groot toekomstige konflik as “‘die berg Megiddo’, ’n klein bergie in Noord-Palestina aan die punt van ’n breë vallei”.
Maar die boek Openbaring is nie ’n padkaart na ’n letterlike plek genaamd Armageddon nie. Die openingswoorde sê dat die verslag “in tekens” aangebied word (Openbaring 1:1). Jehovah se Getuies het lank gelede al in hulle publikasie Studies in the Scriptures, Deel IV, gesê: “Ons moenie ’n letterlike versameling van mense by die Heuwel van Megiddo verwag nie.”
Die geskiedkundige Megiddo dui op ’n vasgekeerde toestand, of situasie, met geen uitkoms vir God se vyande nie. God sal dus by Armageddon toesien dat alle korrupsie en goddeloosheid, ongeag waar dit op hierdie aarde voorkom, met wortel en tak uitgeroei word.—Openbaring 21:8.
Liefhebbers van Jehovah God en sy Seun, Jesus Christus, hoef nie Armageddon te vrees nie. God se oorlog is slegs gerig teen mense wat deur God as onberouvolle goddeloses geoordeel word. Die vernietiging wat sy oorlog sal veroorsaak, sal selektief wees. ‘Jehovah weet hoe om mense van godvrugtige toegewydheid te verlos’, sê die Bybel (2 Petrus 2:9). ’n Bemoedigende belofte in Psalm 37:34 sê: “Hoop op Jehovah en hou sy weg, en hy sal jou verhef om die aarde in besit te neem. Wanneer die goddeloses uitgeroei word, sal jy dit sien.”