Xɔse​—Nɔnɔmɛ ci yí donɔ ŋsɛn amɛ

XƆSE ɖo ŋsɛn sugbɔ. Le kpɔwɛ mɛ, ci Satana jinɔ mɔ yeawu mì le gbɔngbɔnmɛ can ɔ, xɔse kpenɔdo mì nu yí mìcinɔ “enuvwinwatɔ hwanzojejewo.” (Efe. 6:16) Le xɔse mɛɔ, mìatɛnŋ ato cukaɖa ciwo yí gangan shigbe etowo hannɛ mɛ. Yesu nu nɔ yi nukplaviwo mɔ: “Nɔ xɔse ɖoɖo le mí shi shigbe lokoku kpeti ɛnɛ ɔ, mí a nu nɔ eto gangan cɛ mɔ yi le sole lɛtɔxu a vayì je hunnɔ ɖaa, eyi á soyì.” (Mt. 17:20) Ci mìnya mɔ xɔse donɔ ŋsɛn amɛ le gbɔngbɔnmɛɔ, mìɖo abu tamɛ kpɔ so nyɔbiɔse cɛwo nu: Nyi yí xɔse nyiɔ? Lé eji nɔnɔmɛ ci yí le mì shi, kpɔnɔ ŋsɛn do mìwo xɔse ji doɔ? Lé mìawɛ ado ŋsɛn mìwo xɔseɔ? Mi ji yí mìɖo axɔ seɔ?​—Rɔm. 4:3.

NYI YÍ XƆSE NYIƆ?

Denyi nɔ mìkando Bibla mɛ nyɔnɔnwi lɔ ji kpoŋ yí anyi mìɖo xɔse o, ɖo “gbɔngbɔn vɔnwo can gbe kando ji [mɔ Mawu li] hɛnnɛ, yi wo hunhunnɔ.” (Ʒaki 2:19) Nɔ ele ahan ɖe, nyi yí xɔse nyiɔ?

Bibla dre xɔse mɔ yiɖo nɔnɔmɛ amɛve. Ŋkɔtɔ, “xɔse lɔ nyi kankando enu ciwo ji mì ɖo ŋkuvi do.” (Ebre. 11:1a) Nɔ èɖo xɔseɔ, àkando ji sɛnsinɖe mɔ, enyɔ ciwo pleŋ Yehowa nu nyi nyɔnɔnwi yí woavamɛ. Le kpɔwɛ mɛ, Yehowa nu nɔ Izraɛliviwo mɔ: “Nɔ míatɛnŋ acu anyi nublabla ci ŋwa kudo ŋkeke koɖo ezan nu yí ana ŋkeke koɖo zan dagbevanɔ do wowo gamɛ jiɔ, eyi gbɔxwe woatɛnŋ acu anyi nublabla ci ŋwa koɖo anyi sɛntɔ Davidi.” (Ʒer. 33:​20, 21, nwt) Èvɔnnɔ mɔ taŋfuin ewe ami toto le jeŋkwimɛ yí ŋkeke koɖo ezan dagbelia? Nɔ èkando jɔjɔmɛse ciwo yí na nyigban trɔnɔ do yiɖeki yí gbetrɔnɔ do ewe ji ɖe, àdo ɖyika mɔ mɛ ci yí ɖo ese ŋtɔ́wo datɛnŋ awa do egbe ciwo eɖo jia? Àwɛ ahan gbeɖe go!​—Ezai 55:​10, 11; Mt. 5:18.

Evetɔ, “xɔse gbe nyi nya le amɛ ɖeki mɛ mɔ enu ci yí mì de kpɔ ɔ, yi li nyɔnɔnwitɔ.” Xɔse nyi “nya le amɛ ɖeki mɛ” alo kpeɖoji ciwo yí ana kankandoji amɛ mɔ enu ciwo ŋkuvi datɛnŋ akpɔ o li nyɔnɔnwitɔ. (Ebre. 11:1b) Kpɔwɛ ci yí dasɛ mɔ mìatɛnŋ axɔ ŋɖe ci mìdekpɔkɔ ji seɔ? Sɔɛ mɔ ɖevi ɖe biɔ eo se mɔ, ‘Lé èwɛ yí nya mɔ aya liɔ?’ Ci dekpɔ aya kpɔ can ɔ, àtɛnŋ axo nuxu ni so enu ciwo yí dasɛ mɔ aya li nu. Àtɛnŋ axo nuxu so gbɔngbɔn to ŋɔcimɛ, jihɔn nuwanawo koɖo nubuwo nu. Nɔ ɖeviɛ kando kpeɖoji lɔwo jiɔ, álɔn do ji mɔ enu ciwo ŋkuvi datɛnŋ akpɔ o li nyao. Ahanke wocunɔ xɔse do kpeɖoji sɛnŋwo ji nɛ.​—Rɔm. 1:20.

EJI NƆNƆMƐ NYWI ÐO ANƆ MÌ SHI

Gbɔxwe mɛɖe aɖo xɔseɔ, éɖo “a jeshi nyɔnɔnwi” ŋtɔŋtɔ lɔ, ɖo kpeɖojiwo ji yí wocunɔ xɔse do shigbe lé mìkpɔɛ nɛ. (1 Tim. 2:⁠4) Vɔ desun o. Apostolo Pɔlu ŋwlɛn mɔ: “Mì kandoji koɖo mìwo jiwo.” (Rɔm. 10:10) Nɔ mɛɖe kando nyɔnɔnwi lɔ jiɔ, desun o, éɖo agbedo afixɔxɔ yi nu. Egbeɖo anɔ agbe asɔ koɖo nyɔnɔnwi lɔ keŋ asɔ adasɛ mɔ yeɖo xɔse. (Ʒaki 2:20) Nɔ nyɔnɔnwi lɔ dejeŋ nɔ mɛɖe so ji mɛɔ, átɛnŋ agbe mɔ yedakando kpeɖoji lɔwo ji o, ɖo delɔn mɔ yeatashi jixɔse ciwo yí le ye shi o alo éjikɔ mɔ yeakpɔtɔ anɔkɔ agbe do ŋcilanmɛ drowo nu. (2 Piɛ 3:​3, 4; Ʒuda 18) Eyi taɖo le Bibla hwenuwoɔ, denyi mɛ ciwo pleŋ yí kpɔ enujiŋwo tɔxu yí ɖo xɔse o. (Amh. 14:11; Ʒan 12:37) Mɛ ciwo ɖekɛ yí lɔn nyɔnɔnwi lɔ xɔse yí Mawu gbɔngbɔn kɔkɔɛ lɔ donɔ ŋsɛn.​—Gal. 5:22; 2 Tɛs. 2:​10, 11.

LÉ DAVIDI NA YI XƆSE SƐNŊ DO

Efyɔ Davidi le mɛ ciwo yí ɖo xɔse sɛnŋ mɛ. (Ebre. 11:​32, 33) Vɔ denyi mɛshiamɛ yí xɔse sɛnŋ nɔ le Davidi xomu mɛ o. Le kpɔwɛ mɛ, enyɔ ciwo Goliati nu na Davidi do dɔmɛzi. Vɔ ci Davidi fofoɔ xoxutɔ Eliabu deɖo xɔseɔ, égbe nyɔ nɔ Davidi. (1 Sam. 17:​26-28) Wodejinɔ mɛɖe koɖo xɔse o yí mɛɖe deɖunɔ xɔse cinɔ le yi jilawo gbɔ o, eyi taɖo kacaca ci yí le Davidi koɖo Mawu gblamɛ yí na eɖo xɔse.

Le Ehajiji Wema 27 lɔ mɛɔ, Davidi nu lé ewɛ yí vaɖo xɔse sɛnŋ cɛ. (Kpukpui 1) Davidi bu tamɛ kpɔ so enu ciwo mɛ eto koɖo lé Yehowa wanu koɖo yi ketɔnɔwo do. (Kpukpui 2, 3) Ðoɖo ci Yehowa wa do yi sɛnsɛn nu jeŋ ni sugbɔ. (Kpukpui 4) Davidi sɛn Mawu doju koɖo yi kpena xɔsetɔwo le avɔnzava lɔ mɛ. (Kpukpui 6) Édo gbe ɖaɖa yí ji Yehowa veviɖe. (Kpukpui 7, 8) Davidi gbeji mɔ yeaxɔ kpla ci yí so Mawu gbɔ. (Kpukpui 11) Xɔse le veviɖe nɔ Davidi keke ebiɔ se mɔ: “Fini yí nale nɔ xɔse dele ŋshi saɔ?”​—Kpukpui 13, nwt.

LÉ ÀDO ŊSƐN AO XƆSE DO

Àtɛnŋ aɖo xɔse shigbe Davidi nɛ nɔ èsran nɔnɔmɛ koɖo enuwana ciwo yí wodre le Ehajiji Wema 27 lɔ mɛ. Enujejeshi adodwitɔ lɔ ji yí wocunɔ xɔse do; eyi taɖo zenɛni ci yí èkplanɔ Bibla koɖo Bibla nukplawemawoɔ, ahanke anɔ fafɛɖe nɔ eo yí naɖo xɔse ci yí nyi gbɔngbɔn lɔ kusɛnsɛn kpaxwe ɖe nɛ. (Eha. 1:​2, 3) Ji gamɛ abunɔ tamɛ kpɔ so enu ci èkpla nu. Nɔ èbunɔ tamɛ kpɔ so enu ci èkpla nuɔ, ana enu ci Yehowa wa ajenɔŋ nɔ eo doji. Nɔ enu ci Yehowa wa jenɔŋ nɔ eoɔ, àji veviɖe mɔ yeadasɛ ao xɔse lɔ le bɔbɔwo mɛ yí agbexonɔ nuxu so ao mɔkpɔkpɔ lɔ nu nɔ amɛwo. (Ebre. 10:​23-25) Gbesɔ kpe niɔ, mìdanasɛ mɔ mìɖo xɔse, nɔ mìkpɔtɔ “wanɔ kwifan gashagamɛ yi [mìdemi] o.” (Luiki 18:​1-8) Eyi taɖo “ŋgbe ɖote kwifan wawa gbeɖe” nɔ Yehowa o. Kando ji mɔ Yehowa “kpenɔ ŋkuvi do [ye] nu.” (1 Tɛs. 5:17; 1 Piɛ 5:7) Xɔse cucunɔ mì mìwanɔ enunywi yí nɔ mìwa enunywiɔ, mìwo xɔse lɔ gbesɛnnɔŋ doji.​—Ʒaki 2:22.

XƆ YESU JI SE

Le fiɛfi ci yí doŋkɔ nɔ Yesu ku mɛɔ, énu nɔ yi dokplɔtɔwo mɔ: “Mí kando Mawu ji, yi mía gbe kando Enyɛ ji.” (Ʒan 14:1) Eyi taɖo denyi Yehowa ɖekɛ ji mìaxɔ se o, vɔ mìaxɔ Yesu ji se hɛnnɛ. Lé àxɔ Yesu ji se doɔ? Na mìakpɔ emɔ amɛtɔn ci ji mìawɛ le.

Ŋkɔtɔ, kpɔ tafɛn lɔ shigbe enu ci Mawu ŋtɔ na eo nɛ. Apostolo Pɔlu nu mɔ: “Ŋ kpɔtɔ le agbe le ŋcilanmɛ, vɔ ŋ le agbe toto xɔse mɛ le Mawuvi gbɔ. Yesu yí nyi amɛ ci yí lɔn ŋ, yi gbe sɔ Yiɖeki na yí hwlɛn ŋ gan.” (Gal. 2:20) Nɔ èxɔ Yesu ji seɔ, àkando ji sɛnsinɖe mɔ tafɛn lɔ atɛnŋ akpedo ye nu. Yesu ji woato asɔ nuvɔnwo ke eo yí nakpɔ mɔ nɔ agbe mavɔ. Àgbekando ji mɔ, yɛnyi kpeɖoji gangantɔ ci yí dasɛ mɔ Mawu lɔn ye. (Rɔm. 8:​32, 38, 39; Efe. 1:7) Ecɛ ado ŋsɛn eo yí dagbedonɔ hwɛ eoɖeki do ao nuvɔnwo ŋci o.​—2 Tɛs. 2:​16, 17.

Evetɔ, Te gogo Yehowa le gbedodoɖa mɛ to Yesu vɔnsa lɔ ji. Tafɛn lɔ yí na mìatɛnŋ ado gbe ɖaɖa nɔ Yehowa “koɖo vovo koɖo ejidodo le afi ci yí sɔsɔke xɔxɔ le. Le enɔ ɔ, mì xɔnɔ ŋshishikuku koɖo xomɛvu yí wo a kpedo mì nu le gamɛ nywi lɔ ji.” (Ebre. 4:​15, 16; 10:​19-22) Gbedodoɖa donɔ ŋsɛn gbeta ci mìsɔ mɔ mìaɖu tetekpɔ ciwo yí ana mìawa nuvɔn ji.​—Luiki 22:40.

Etɔntɔ, se tonu nɔ Yesu. Apostolo Ʒan ŋwlɛn mɔ: “Amɛ ci yí xɔ Evi lɔ ji se ɖo agbe mavɔ. Vɔ, amɛ ci yí gbé Evi lɔ da kpɔ agbe o, ɖo ɔ, Mawu dɔmɛzi le ji.” (Ʒan 3:36) Do jeshi mɔ Ʒan do vovototo xɔseɖoɖo koɖo tonumasi mɛ. Eyi taɖo nɔ èxɔ Yesu ji seɔ, àsenɔ tonu ni. Nɔ èwanɔ do ‘Kristo se’ lɔ ci yí nyi enu ciwo ekpla amɛwo koɖo ese ciwo edo jiɔ, anyi èɖonɔ to yi. (Gal. 6:2) Àgbeɖonɔ to Yesu nɔ èwanɔ do emɔdasɛnamɛ ciwo enanɔ to “hwashi egbejinɔtɔ koɖo ŋɖɛnyatɔ lɔ” ji. (Mt. 24:​45, nwt) Nɔ èsenɔ tonu nɔ Yesuɔ, àkpɔ ŋsɛn ci àsɔ to cukaɖa ciwo yí le shigbe jihɔnshi hannɛ mɛ.​—Luiki 6:​47, 48.

“MÍ ZAN MÍWO XƆSE KƆKWƐ GANGAN LƆ A SƆ CU MÍWOÐEKIWO”

Gbeɖekaɔ, ŋsu ɖeka daxwa ɖaɖa Yesu mɔ: “Ŋ ɖo [xɔse]. Do alɔ̀ ŋ nɔ ma gbe ɖo [xɔse] wu nɛnɛ.” (Maki 9:24) Xɔse hwɛɖeka le ŋsu lɔ shi, vɔ ésɔ yiɖeki hwe yí do jeshi mɔ yegbeʒan xɔse sugbɔ doji. Le nɔnɔmɛ ɖewo mɛɔ, mì pleŋ ʒan xɔse sugbɔ shigbe ŋsu cɛ nɛ. Yí mì pleŋ mìatɛnŋ ado ŋsɛn mìwo xɔse le kakacɛ mɛ. Shigbe lé mìkpɔɛ nɛɔ, mìdonɔ ŋsɛn mìwo xɔse nɔ mìkplanɔ Mawu Nyɔ lɔ keŋ yí bunɔ tamɛ kpɔ so nu, ɖo ecɛ ana Yehowa nu ajeŋ nɔ mì doji. Mìwo xɔse asɛnŋ doji nɔ mìwo koɖo mìwo kpena xɔsetɔwo sɛnnɔ Yehowa, xonɔ nuxu so mìwo mɔkpɔkpɔ lɔ nu nɔ mɛbuwo yí donɔ gbe ɖaɖa mamimami. Gbesɔ wuɔ, nɔ mìdo ŋsɛn mìwo xɔseɔ, mìaxɔ fɛncu gangantɔ. Eyi taɖo Mawu Nyɔ lɔ do ŋsɛn mì mɔ: “Exlɔnyɛ veviwo, mí zan míwo xɔse kɔkwɛ gangan lɔ a sɔ cu míwoɖekiwo yí a lodo.  . . Mí sɔ míwoɖekiwo do Mawu lɔnlɔn mɛ.”​—Ʒuda 20, 21.