TUEON-AN NGA ARTIKULO 40
KANTA 30 Akon Amay, Akon Dios, kag Abyan
Ginapamayad ni Jehova ro mga Tagipusuon nga Nagakalisud
“Ginapamayad na ro mga tagipusuon nga nagakalisud; ginabugkusan na ro andang mga nina.”—SAL. 147:3.
RO ATONG MATUN-AN
Nagakabaeaka gid si Jehova sa mga nasubuan ag nagakalisud it sobra sa emosyonal. Ipakita it rayang artikulo kon paano na mapahagan-hagan ro atong kasubo ag kon paano man kita makabulig sa iba.
1. Ano ro ginabatyag ni Jehova sa anang mga alagad?
ANO ro nakikita ni Jehova kon nagatan-aw imaw sa anang mga alagad iya sa eugta? Nakikita na ro atong kasadya ag kasubo. (Sal. 37:18) Masadya gid si Jehova kon nakikita na kita nga ginaobra ro tanan sa pag-alagad kana, maskin pa may ginaantus kita sa emosyon. Euwas karon, gusto na gid kita buligan ag paumpawan.
2. Ano ro ginaobra ni Jehova sa mga tagipusuon nga nagakalisud, ag paano kita makabenepisyo kara?
2 Nagahambae ro Salmo 147:3 nga ‘ginabugkusan ni Jehova ro mga nina’ it mga tagipusuon nga nagakalisud. Ginapakita it rayang teksto kon paano ginabuligan ni Jehova ratong mga nagakalisud sa emosyon. Ano ro dapat natong obrahon agud makabenepisyo sa bulig ni Jehova? Isipa rayang ilustrasyon. Ro mayad nga doktor hay makabulig gid agud ro naninahan nga tawo hay magmayad. Pero para magmayad, dapat na man sundon ro mga instruksyon it doktor. Sa rayang artikulo, tan-awon naton ro mapinalanggaon nga mga ginhambae ni Jehova sa anang Bisaea, para sa mga nagakalisud sa emosyon ag sayuron naton kon paano naton ra masunod.
GINAPASALIG KATON NI JEHOVA NGA IMPORTANTE KITA KANA
3. Ham-an nagabatyag ro iba nga bukon sanda it importante?
3 Nagakabuhi kita sa kalibutan nga owa it pagpalangga, ag makasueobo, abung tawo ro nagabatyag nga bukon sanda it importante. Ro sangka sister nga si Helena naghambae: “Nagbahoe ako sa buko’t mapinalanggaon nga pamilya. Ro akong tatay hay bayolente ag pirme na kaming ginahambaean nga owa it pueos.” Pareho ni Helen, basi buko’t manami ro pagtratar kimo, ginapakahuy-an ka pirme, o ginapabatyag nga bukon ka’t palangga. Ngani, basi malisdan ka nga magpati nga may gapalangga pa kimo.
4. Base sa Salmo 34:18, ano ro ginapasalig katon ni Jehova?
4 Maskin buko’t manami ro pagtratar kimo it iba, makasigurado ka nga palangga ka ni Jehova ag importante ka kana. “Maeapit si Jehova sa mga tagipusuon nga nagakalisud.” (Basaha ro Salmo 34:18.) Kon “naeuyahan it buot,” tandai nga nakikita ni Jehova ro mayad sa ing tagipusuon ag imaw mismo ro magabira kimo papaeapit kana. (Juan 6:44) Handa gid imaw pirme nga magbulig kimo, tungod espesyal ka kana.
5. Ano ro matun-an naton sa paagi it pagtratar ni Jesus sa mga ginapakanaba it iba?
5 Masayran naton ro baeatyagon ni Jehova kon tun-an naton ro halimbawa ni Jesus. Sa ministeryo ni Jesus iya sa eugta, gintaw-an na it atensyon, ag ginpakitaan na it kaeuoy ratong mga ginapakanaba it iba. (Mat. 9:9-12) May sangka bayi nga nagtabing sa eambong ni Jesus tungod nagaeaum imaw nga magmayad sa anang malala nga sakit. Pagkasayod kara ni Jesus, ginpaumpawan na ra ag gindayaw sa anang pagtuo. (Mar. 5:25-34) Perpekto nga hatuead ni Jesus ro ugali it anang Ama. (Juan 14:9) Ngani makasigurado ka nga importante ka kay Jehova ag nakikita na ro imong manami nga mga ugali, pati ing pagtuo ag pagpalangga kana.
6. Ano ing pwedeng obrahon kon nagabatyag ka nga owa ka it pueos?
6 Ano ing pwedeng obrahon kon pauman-uman mo nga nabatyagan nga owa ka it pueos? Magbasa it mga teksto sa Biblia nga nagapasalig kimo nga importante ka kay Jehova ag pamaeandungan ra.b (Sal. 94:19) Kon may goal nga owa mo naabot o sangkiri ing maobra kaysa sa iba, indi pagpakanabaa ing sarili. Owa nagapaabot si Jehova it sobra sa ing makaya. (Sal. 103:13, 14) Kon nakaagi ka dati it pisikal, emosyonal, o sekswal nga pagpang-abuso, indi pagbasuea ing sarili sa gin-obra it nag-abuso kimo. Bukon mo’t saea ron! Tandai nga hukman ni Jehova ro mga nagapang-abuso, pero buligan na ro mga biktima. (1 Ped. 3:12) Si Sandra nga gin-abuso kat unga pa naghambae, “Pirme ko nga ginapangamuyo kay Jehova nga buligan na ako nga mangin balanse ang pagtan-aw sa ang sarili pareho sa pagtan-aw na kang.”
7. Paano ro atong mga naeksperyinsyahan dati hay magamit naton sa atong pag-alagad kay Jehova makaron?
7 Indi magduda nga pwede kang gamiton ni Jehova para buligan ro iba. Gintaw-an ka nana it pribilehiyo nga makaibahan imaw sa pagwali nga ueobrahon. (1 Cor. 3:9) Tungod sa ing mga naeksperyinsyahan sa kabuhi, mas mapakita mo ro empatiya ag mas maintindihan ro ginabatyag it iba. Abu ing mabulig kanda. Si Helen nga ginsambit kaina hay nakabaton it bulig ag nagabulig man imaw makaron sa iba. Hambae na: “Nagabatyag ako dati nga owa’t pueos pero ginpabatyag kakon ni Jehova nga palangga na ako ag magamit na para mabuligan ro iba.” Masadya si Helen nga nagaalagad bilang regular pioneer.
GUSTO NI JEHOVA NGA BATUNON NATON RO ANANG KAPATAWARAN
8. Ano ro ginapasalig katon sa Isaias 1:18?
8 Ro pila sa mga alagad ni Jehova hay nakokonsensya gihapon sa mga saea nga haobra nanda dati, bago o pagkatapos nanda mabautismuhan. Pero dapat natong tandaan nga gintao ni Jehova ro pangtubos tungod palangga gid nana kita. Ngani, makasigurado kita nga gusto na nga batunon naton ro anang regalo. Ginapasalig katon ni Jehova nga indi na eon pagdumdomon ro atong mga haobrang saea pagkatapos nga ‘mahusay naton ro mga bagay’c kana. (Basaha ro Isaias 1:18.) Nagapasaeamat gid kita sa atong mapinalanggaong Ama nga si Jehova tungod owa na eon ginadumdom ro haobra natong mga saea! Ag owa na gid ginakalipatan ro manami natong ginaobra.—Sal. 103:9, 12; Heb. 6:10.
9. Ham-an indi naton dapat pag-inisipon ro mga saea nga haobra naton dati?
9 Kon nabaeaka ka sa ing mga haobrang saea dati, tinguhai nga magpukos sa makaron ag sa paeaabuton kaysa sa nagtaliwan. Talakayon naton ro halimbawa ni apostol Pablo. Naghinuesoe imaw nga ginhingabot na it mapintas ro mga Cristyano kato, pero sayod na nga ginpatawad eon imaw ni Jehova. (1 Tim. 1:12-15) Padayon na baea nga gin-inisip ro anang mga saea dati? Owa gid, pareho sa owa na pagpukos sa anang haabot nga mga kadaeag-an dati bilang matutom nga sumoeunod ku mga Judio. (Fil. 3:4-8, 13-15) Kundi, nagpukos si Pablo sa paeaabuton ag nangin mahugod gid imaw sa anang ministeryo . Pareho ni Pablo, indi mo mabag-o ro mga natabo eon. Pero pwede mo mapasadya si Jehova makaron ag magpukos sa manami nga paeaabuton nga anang ginpromisa kimo.
10. Ano ro atong obrahon kon may haobra kita dati nga nakasakit sa iba?
10 Basi nabaeaka ka sa mga haobra mo dati nga nakasakit sa iba. Ano ro makabulig? Obraha ro tanan para maayos ra, ag sinsero nga mangayo it pasensya. (2 Cor. 7:11) Mangamuyo kay Jehova nga buligan ratong mga naapektuhan it ing gin-obra. Buligan ka nana ag ratong nakasakit kimo nga makapadayon sa pag-alagad kana ag makabaton it katawhayan sa isip.
11. Ano ro atong matun-an sa halimbawa ni propeta Jonas? (Tan-awa man ro piktyur.)
11 Magbuoe it leksyon sa mga saea nga haobra mo dati, ag pasugti si Jehova nga gamiton ka sa maskin alin nga paagi nga pilion na. Tan-awon naton ro halimbawa ni propeta Jonas. Ginsugo imaw it Dyos nga mag-agto sa Ninive pero imbes nga magtuman, nag-agto imaw sa ibang direksyon. Gindisiplina imaw ni Jehova, ag nakatuon imaw sa anang saea. (Jon. 1:1-4, 15-17; 2:7-10) Gingamit gihapon ni Jehova si Jonas bilang propeta. Ginsugo imaw it uman ni Jehova nga mag-agto sa Ninive, ag sa rayang panahon gintuman na eagi ra. Owa na ginpasugti ro anang mga haobrang saea dati nga magpugong kana para batunon ro asayment halin kay Jehova.—Jon. 3:1-3.
Kat nakaeuwas si propeta Jonas sa sueod it mabahoe nga isda, ginsugo imaw it uman ni Jehova nga mag-agto sa Ninive para isugid ro Anang mensahe (Tan-awa ro parapo 11)
GINAPAUMPAWAN KITA NI JEHOVA PAAGI SA ANANG BAEAAN NGA ESPIRITU
12. Paano kita ginataw-an ni Jehova it katawhay kon makaeksperyinsya kita it trauma o kon mamatyan it pinalangga? (Filipos 4:6, 7)
12 Ginapaumpawan kita ni Jehova paagi sa anang baeaan nga espiritu kon na-trauma kita o namatyan it pinalangga. Tan-awon naton ro ekspersyinsya ni Ron ag Carol. Makasueobo, nagpakamatay ro andang unga nga eaki. Naghambae sanda: “Nakaagi eon kami it malisud nga mga problema dati, pero raya ro pinakamalala. Abung beses nga indi kami makatueog ngani nagapangamuyo kami, ag nabatyagan gid namon ro katawhay nga ginhambae sa Filipos 4:6, 7.” (Basaha.) Kon nagaagi ka it masakit ag malisud nga mga problema, pwede mong isugid kay Jehova ing tanan nga ginabatyag paagi sa pangamuyo, maskin pilang beses ag maskin mauno man it buhay. (Sal. 86:3; 88:1) Pangayua pirme kay Jehova ro anang baeaan nga espiritu. Buligan ka gid nana.—Luc. 11:9-13.
13. Paano kita mabuligan it baeaan nga espiritu nga makapadayon sa pag-alagad kay Jehova it matutom? (Efeso 3:16)
13 May naeksperyinsyahan ka baea nga nagpaeuya kimo? Mataw-an ka ku baeaan nga espiritu it kusog nga makapadayon sa pag-alagad kay Jehova it matutom. (Basaha ro Efeso 3:16.) Tan-awon ta ro eksperyinsya it sister nga si Flora. Nagaalagad sanda ku anang asawa bilang misyonero, pero nangin buko’t matutom kana ro anang asawang eaki ag nagdeborsyo sanda. Naghambae imaw: “Kada maisip ko ro anang pagpangluko kakon, nasubuan gid ang. Ginpangamuyo ko kay Jehova ro anang baeaan nga espiritu agud makapadayon. Ginpaumpawan ako ni Jehova ag maskin matsa imposible ra ku una, nangin mabaskog ako ag nakaya ko ra paagi sa anang bulig.” Nabatyagan ni Flora nga ginbuligan imaw it Dyos nga mas magsalig kana ag itao ro anang mga kinahang-eanon kon may problema imaw. Naghambae pa imaw: “Nakabulig gid kakon ro Salmo 119:32: ‘Gusto ko gid sundon ing mga sugo tungod nagbutang ka kara it lugar sa ang tagipusuon.’”
14. Paano naton pasugtan ro espiritu it Dyos nga magbulig katon?
14 Ano ing dapat obrahon pagkatapos mong pangayuon kay Jehova ro anang baeaan nga espiritu? Magpartisipar sa mga ueobrahon nga magabulig kimo nga mabaton ro espiritu it Dyos. Kaibahan kara ro pag-attend sa mga miting ag pag-preaching. Pun-a ing isip it mga kaisipan ni Jehova paagi sa pagbasa it anang Bisaea kada adlaw. (Fil. 4:8, 9) Habang nagabasa, tandai ro mga karakter sa Biblia nga nakaeksperyinsya it mga problema ag pamaeandungi kon paano sanda ginbuligan ni Jehova nga makatiis. Si Sandra nga ginsambit kaina hay nakaagi it sunod-sunod nga mga problema sa anang kabuhi. Naghambae imaw: “Na-touch gid ako sa istorya parti kay Jose. Owa na ginpasugtan ro mga problema ag mga inhustisya nga anang naagyan nga magpaeuya sa anang relasyon kay Jehova.”—Gen. 39:21-23.
GINAPAUMPAWAN KITA NI JEHOVA PAAGI SA ATONG MGA ISIGKA-CRISTYANO
15. Kanyo kita makabaton it paumpaw, ag paano nanda kita mabuligan? (Tan-awa man ro piktyur.)
15 Kon nagaantus kita, ro atong mga isigka-Cristyano hay ‘mabahoe gid nga bulig’ o paumpaw. (Col. 4:11) Ro atong mga igmanghod hay sambato sa paagi nga ginapakita ni Jehova ro anang pagpalangga katon. Pwede nanda kitang paumpawan paagi sa pagtao it oras nga makaibahan kita, ag pagpamati it mayad katon. Pwede nanda kitang taw-an it makapalig-on nga teksto sa Biblia o mangamuyo kaibahan naton.d (Roma 15:4) May mga panahon nga pwede kitang padumdomon it sangka igmanghod parti sa kaisipan ni Jehova ag buligan kita nga padayon nga makatiis. Ro atong isigka-Cristyano hay makatao man katon it praktikal nga bulig, pareho sa pagtao it pagkaon kon nagakasubo kita.
Ro masaligan ag hamtong nga mga amigo hay makatao it paumpaw ag bulig (Tan-awa ro parapo 15)
16. Ano ro pwede natong obrahon para mabaton ro bulig it iba?
16 Para mabaton naton ro bulig it iba, basi kinahang-ean nga pangayuon naton ra. Palangga gid kita it atong mga igmanghod ag gusto nanda kitang buligan. (Hulu. 17:17) Pero basi owa sanda kasayod kon ano ro atong ginabatyag o kinahang-ean. (Hulu. 14:10) Kon nasubuan ka, pwede mong isugid ing ginabatyag sa ing hamtong nga mga amigo. Hambaea kanda kon paano ka nanda mabuligan. Pwede mo man ra isugid sa sambato o daywang ka elder nga maeapit kimo. May mga sister mat-a nga mas komportableng mag-istorya sa sangka hamtong nga sister.
17. Ano ro pila nga mga kalisdanan ro pwedeng magpugong katon sa pagbaton it pagpalig-on, ag paano naton ra masuk-ean?
17 Indi pag-ipaeayo ing sarili sa mga igmanghod. Tungod sa sobrang kasubo, basi owa eon kita naila nga makaibahan ro iba. May mga panahon nga basi indi ka maintindihan it imong mga igmanghod o owa sanda kasayod kon ano ro ihambae kimo. (Sant. 3:2) Indi pagsugti rayang mga kalisdanan nga magpugong kimo nga mabaton ro pagpalig-on nga kinahang-ean mo. Ro elder nga si Gavin nga may depresyon hay naghambae: “Pirme akong owa’t gana nga makig-istorya ag makig-iba sa ang mga amigo.” Pero owa nagpapirdi si Gavin sa anang baeatyagon, ag nakabenepisyo gid imaw sa anang pagpakig-iba sa mga igmanghod. Ro sister nga si Amy hay naghambae: “Tungod sa ang mga eksperyinsya ku una, nalisdan ako nga magsalig sa tawo. Pero ginatinguhaan ko nga palanggaon ag saligan ro akong mga igmanghod parehas sa ginaobra ni Jehova. Sayod ko nga nagapasadya ra kay Jehova, ag pati man kang.”
MAKAPAUMPAW KATON RO MGA PROMISA NI JEHOVA SA PAEAABUTON
18. Ano ro ginaeauman naton sa paeaabuton, ag ano ro pwede natong obrahon makaron?
18 Makasalig kita sa manami nga paeaabuton. Sa indi magbuhay, dueaon eon ni Jehova ro tanan nga pisikal ag emosyonal nga kasakit. (Pah. 21:3, 4) Sa ruyong panahon, ro masakit nga mga bagay nga atong naeksperyinsyahan hay ‘maduea eon sa tagipusuon.’ (Isa. 65:17) Natun-an naton nga maskin makaron hay ‘ginabugkusan ni Jehova ro atong mga nina.’ Ngani, panginpusli ro tanan nga ginatao ni Jehova para paumpawan ag buligan ka. Makasigurado ka nga ‘nagakabaeaka imaw kimo.’—1 Ped. 5:7.
KANTA 7 Si Jehova ang Amon Kusog
a Gin-islan ro mga pangaean.
b Tan-awa ro kahon nga “Importante Ka kay Jehova.”
c Para ‘mahusay naton ro mga bagay’ kay Jehova, kinahang-ean natong pamatud-an nga nagahinuesoe kita paagi sa pagpangayo kana it patawad ag pagbag-o sa atong mga ginaobra. Kon nakaobra kita it seryoso nga saea, kinahang-ean natong magpabulig sa mga elder sa kongregasyon.—Sant. 5:14, 15.