Tueara ro Kahugod ni Jesus sa Pagwali

1. Ano ro kinaiba it mga alagad ni Jehova sa mga nagaaku nga Cristyano?

RO MGA alagad ni Jehova hay mahugoda nga nagawali it mayad nga balita, ngani iba gid sanda sa mga nagaaku nga Cristyano. (Tito 2:14) Pero basi kon amat, nagabatyag ka nga owa ka it gana mag-preaching. O basi nabatyagan mo man ro ginbatyag it sangka elder. Ginhambae na, “Kon amat, natamad ako mag-preaching.”

2. Ham-an malisud kon amat nga mangin mahugod sa pagministeryo?

² Posibleng mas naga-enjoy kita sa ibang paagi it pag-alagad kay Jehova kaysa sa pag-preaching. Ham-an? Dahil kon nagabulig kita sa pagpatindog o pagmentinar it mga Kingdom Hall, nagabulig sa atong mga igmanghod nga naagyan it mga kalamidad, o ginapalig-on sanda, nakikita eagi naton ro mayad nga resulta ag sayod naton nga ginaapresyar nanda ra. Pero sa pag-preaching, maskin dinag-on eon naton ra nga ginaobra sa pareho nga teritoryo, sangkiri eang ro nagabaton. O may una pa ngani nga owa gid nagabaton. Ag sayod man naton nga habang nagaeapit ro katapusan, mas nagaabu ro nagakontra katon dahil sa mensahe nga atong ginadaea. (Mat. 10:22) Ano ro makabulig katon agud padayon o dugangan pa gid ro atong kahugod sa pagwali nga ueobrahon?

3. Ano ro atong matun-an parti kay Jesus sa ilustrasyon sa Lucas 13:​6-9?

³ Makatuon kita sa halimbawa ni Jesus kon paalin mangin mahugod sa atong pagwali nga ueobrahon. Kat iya si Jesus sa eugta, padayon imaw nga nangin mahugod sa pagwali sa mga tawo. Ro matuod, nangin mas mahugod pa gid imaw hasta sa katapusan it anang pagministeryo. (Basaha ro Lucas 13:​6-9.) Pareho ku manogdipara it ueobasan nga gin-alagaan it tatlong dag-on ro puno it higera nga owa gid nagabunga, mga tatlong dag-on man nga nagwali si Jesus sa mga Judio, nga kaeabanan kanda hay owa man nagbaton. Pero, pareho ku manogdipara it ueobasan nga owa nadueaan it pag-eaum nga magbunga ro puno it higera, owa man nagpundo si Jesus sa pagwali kanda o nagtinamad sa anang pagministeryo. Kundi, mas naghugod pa gid imaw sa pagwali para maabot na ro andang tagipusuon.

4. Ano ro ap-at nga bagay nga matun-an naton sa halimbawa ni Jesus?

⁴ Sa rayang artikulo, pagatalakayon naton kon paalin ginpakita ni Jesus ro kahugod, eabi eon gid sa ulihi nga an-um nga buean it anang pagministeryo. Padayon kita nga mangin mahugod kon sundon naton ro anang ginhambae ag gin-obra. Sayuron ta ro ap-at nga bagay nga atong matun-an kay Jesus: (1) Nagpukos imaw sa ginapaobra ni Jehova, (2) nangin alerto imaw sa mga hula it Biblia, (3) nagsalig imaw sa bulig ni Jehova, ag (4) padayon imaw nga nangin positibo nga may magapamati gid kana.

NAGPUKOS IMAW SA GINAPAOBRA NI JEHOVA

5. Paalin ginpakita ni Jesus nga nagpukos imaw sa ginapaobra it Dyos kana?

⁵ Mahugod nga ginwali ni Jesus “ro Mayad nga Balita ku Ginharian” dahil sayod na nga raya ro gusto it Dyos nga obrahon nana. (Luc. 4:43) Nangin pinakaimportante gid sa kabuhi ni Jesus ro pagministeryo. Maskin pilang buean lang ro anang pagministeryo, nag-agto gihapon imaw “sa mga baryo ag mga banwa” para tur-an ro iba. (Luc. 13:22) Nagsanay man imaw it dugang nga mga disipulo para mangin manogwali it mayad nga balita.​—Luc. 10:1.

6. Paalin ro pagwali nga ueobrahon hay may eabot sa iba pa natong teokratikong mga asayment? (Tan-awa man ro piktyur.)

⁶ Makaron, ro pagwali man it mayad nga balita ro pinakaimportante nga ueobrahon nga gusto ni Jehova ag ni Jesus nga obrahon naton. (Mat. 24:14; 28:​19, 20) Ro atong pagwali nga ueobrahon hay may eabot sa iba pa natong teokratikong mga asayment. Halimbawa, ro atong pagpatindog it mga teokratikong pasilidad o pag-alagad sa Bethel hay nagasuporta sa pagwali nga ueobrahon. Nagatao man kita it bulig sa mga igmanghod nga naapektuhan it kalamidad bukon eang sa andang mga kinahang-eanon, kundi para buligan sanda nga makapadayon sa andang espiritwal nga rutina, eakip eon ro pag-preaching. Kon dumdomon naton nga ro pagwali ro pinakaimportante nga ueobrahon nga ginsugo katon ni Jehova, mas mapahueag kita nga mangin mahugod sa pag-preaching. Si János, nga sangka elder sa Hungary hay naghambae, “Ginapadumdom ko ang sarili nga owa’t ibang teokratikong asayment nga makabaylo sa pagwali nga ueobrahon; raya ro atong panguna nga ueobrahon.”

7. Ham-an gusto ni Jehova nga padayon kitang mag-preaching? (1 Timoteo 2:​3, 4)

⁷ Mangin mahugod kita sa pagministeryo kon tan-awon naton ro mga tawo pareho sa pagtan-aw ni Jehova. Gusto na gid nga ro tanan hay makabati it mayad nga balita ag magbaton kara. (Basaha ro 1 Timoteo 2:​3, 4.) Ngani, ginasanay na kita nga mangin mas epektibo sa pagsugid it makaeuwas kabuhi nga mensahe. Halimbawa, ro brosyur nga Palanggaa ang mga Tawo—Tudlui Sila hay nagaturo katon kon paalin makaumpisa it pag-istorya sa mga tawo agud mangin Bible study sanda ag mangin disipulo ni Jesus. Maskin indi sanda magbaton makaron, may tsansa pa sanda nga magbaton ag magbag-o bago matapos ro mabahoe nga kasakitan. Sa paeaabuton, posibleng madumdoman nanda ro mga ginsugid naton ag magapahueag ron kanda nga alagaron si Jehova. Pero matabo eang ron kon padayon kitang mag-preaching.

NANGIN ALERTO IMAW SA MGA HULA IT BIBLIA

8. Ano nga mga hula sa Biblia ro nakabulig kay Jesus nga gamiton it mayad ro anang panahon?

⁸ Naintindihan ni Jesus kon paalin matuman ro mga hula sa Biblia. Sayod na nga mga tatlong dag-on ag tunga lang ro anang pagministeryo. (Dan. 9:​26, 27) Sayod na man ro hula kon hin-uno ag kon paalin imaw mamatay. (Luc. 18:​31-34) Ro mga nasayran ni Jesus hay nakabulig kana kon paalin gamiton it mayad ro anang panahon. Bilang resulta, mahugod imaw nga nagwali para matapos ro ueobrahon nga ginsugo kana.

9. Ham-an ro mga hula sa Biblia hay nagapalig-on katon nga padayon nga mangin mahugod sa pagwali?

⁹ Kon pamaeandungan naton ro mga hula sa Biblia, mapalig-on kita kara nga padayon nga mangin mahugod sa pagwali. Sayod naton nga maeapit lang matapos rayang sistema. Naintindihan man naton nga ro mga nagakatabo makaron ag ro mga ugali it tawo hay ginhula sa Biblia ag tanda it ulihing mga inadlaw. Ginasugid man it Biblia ro hula parti sa hari it habagat ag hari it amihan nga magakontrahanan “sa panahon it katapusan.” Naintindihan naton nga nagatukoy ra sa gubyerno it Britain ag United States nga nagakontra sa gubyerno it Russia ag sa anang mga kaalyado kara. (Dan. 11:40) Naintindihan man naton nga ro Anglo-Amerikano nga Kagamhanan it Kalibutan hay nagarepresentar sa siki it estatwa nga ginhambae sa Daniel 2:​43-45. Kumbinsido man kita base sa atong natun-an sa hula it Biblia nga maeapit eon lang dueaon it Ginharian it Dyos ro mga gubyerno it tawo. Raya tanan nga mga hula hay nagapakita nga iya eon kita sa katapusan, ngani dapat natong gamiton it mayad ro atong panahon nga iwali ro mayad nga balita.

10. Sa ano pang paagi ro mga hula sa Biblia hay nagapalig-on katon nga padayon nga mangin mahugod sa pagwali?

¹⁰ Ro mga hula sa Biblia hay mga mensahe nga nagapalig-on katon nga isugid ra sa iba. Ro sister nga si Carrie, nga nagaalagad sa Dominican Republic hay naghambae: “Kon naisip ko ro manami nga mga bagay nga ginpromisa ni Jehova nga obrahon na sa paeaabuton, nagapahueag kakon ra nga isugid man ra sa iba.” Naghambae pa imaw: “Kon nakikita ko ro mga kalisdanan nga ginaatubang it mga tawo makaron, narealisar ko nga rayang mga promisa hay bukon eang it para kakon, kundi para man kanda.” Ro mga hula sa Biblia hay nagapalig-on katon nga padayong mag-preaching dahil sayod naton nga nagabulig gid si Jehova para maobra rayang ueobrahon. Si Leila, nga taga-Hungary hay naghambae man: “Ro Isaias 11:​6-9 nagapalig-on kakon nga isugid ro mayad nga balita maskin sa mga tawo nga matsa indi magbaton. Sayod ko nga sa bulig ni Jehova, pwedeng magbag-o ro maskin sin-o.” Ag ro brother nga si Christopher, nga taga-Zambia hay naghambae pa gid: “Pareho sa ginhula sa Marcos 13:​10, ro mayad nga balita hay makaabot sa bilog nga kalibutan, ag sangka pribilehiyo gid nga makabulig para matuman rayang hula.” Ano nga mga hula sa Biblia ro nagapalig-on kimo nga padayon nga mangin mahugod sa pagwali?

NAGSALIG IMAW SA BULIG NI JEHOVA

11. Ham-an kinahang-ean ni Jesus magsalig sa bulig ni Jehova para padayon nga mangin mahugod sa pagwali? (Lucas 12:​49, 53)

¹¹ Nagsalig si Jesus sa bulig ni Jehova para padayon imaw nga mangin mahugod sa pagwali. Maskin nangin matinahuron si Jesus sa pagwali, sayod na nga ro mayad nga balita it Ginharian hay pwedeng magpaakig sa iba ag abu ro magakontra kara. (Basaha ro Lucas 12:​49, 53.) Dahil sa pagwali ni Jesus, owa kara naila ro relihiyusong mga lider. Ngani pauman-uman nandang gintinguhaan nga patyon imaw. (Juan 8:59; 10:​31, 39) Pero padayon nga nagwali si Jesus dahil sayod na nga ginabuligan imaw ni Jehova. Naghambae si Jesus: “Bukon eamang it ako ro nagahusga, kundi ako ag ro Ama nga nagpadaea kakon. . . . Owa nana ako ginapabay-i, ay ginahimo ko sa gihapon ro anang nahamut-an.”​—Juan 8:​16, 29.

12. Paalin ginhanda ni Jesus ro anang mga disipulo para padayon nga makawali maskin may paghingabot?

¹² Ginpadumdom ni Jesus ro anang mga disipulo nga makasalig sanda sa bulig ni Jehova. Ginpasalig na sanda it pauman-uman nga buligan sanda ni Jehova kon makaatubang it paghingabot. (Mat. 10:​18-20; Luc. 12:​11, 12) Ag ginpalig-on na sanda nga mangin mahaeungon. (Mat. 10:16; Luc. 10:3) Ginhambaean na man sanda nga indi ipilit ro mensahe sa mga tawo nga owa naila magpamati. (Luc. 10:​10, 11) Ag magpaeagyo sanda kon ginahingabot. (Mat. 10:23) Maskin mahugod si Jesus ag nagasalig kay Jehova, owa na ginbutang sa peligro ro anang kabuhi.​—Juan 11:​53, 54.

13. Ham-an makasalig ka nga buligan ka ni Jehova?

¹³ Abu ro nagakontra sa atong ueobrahon makaron, ngani kinahang-ean naton it bulig ni Jehova para padayon natong masugid ro mayad nga balita sa mga tawo. (Pah. 12:17) Ham-an makasalig ka nga buligan ka ni Jehova? Tan-awa ro pangamuyo ni Jesus sa Juan kapitulo 17. Ginpangabay na si Jehova nga bantayan ro anang mga apostoles, ag ginsabat ni Jehova ro anang pangamuyo. Ro libro it Binuhatan hay nagapakita kon paalin na ginbuligan ro mga apostoles nga padayon nga magwali maskin pa may paghingabot. Ginpangabay na man si Jehova nga bantayan ratong mga nagtuo sa ginwali it anang mga apostoles. Eakip ka eon kara. Owa gid nagpundo si Jehova sa pagsabat sa pangamuyo ni Jesus; Buligan ka nana pareho sa kon paalin na ginbuligan ro mga apostoles.​—Juan 17:​11, 15, 20.

14. Ham-an makasigurado kita nga padayon kita nga mangin mahugod sa pag-preaching maskin malisud ro sitwasyon? (Tan-awa man ro piktyur.)

¹⁴ Habang nagaeapit ro katapusan, posibleng mas malisdan kita sa pagwali it mayad nga balita, pero ginpasalig kita ni Jesus nga buligan kita ni Jehova agud padayon nga mangin mahugod sa atong ueobrahon. (Luc. 21:​12-15) Pareho kay Jesus ag sa anang mga disipulo, ginapasugtan naton ro mga tawo nga magdesisyon kon mamati sanda o indi, ag owa kita nakikipagdebate kanda. Maskin sa mga nasyon nga ginabawae ro atong ueobrahon, padayon nga nagasugid ro atong mga igmanghod it mayad nga balita dahil nagasalig sanda kay Jehova, buko’t sa andang sarili. Pareho sa unang mga Cristyano nga gintaw-an ni Jehova it kusog, taw-an na man kita it kusog para “ikasugid ro bug-os nga mensahi” sa paagi nga gusto ni Jehova. (2 Tim. 4:​17, Ro Bag-o nga Kasugtanan, TAP) Makasigurado ka nga kon magsalig ka kay Jehova, padayon ka nga mangin mahugod sa pag-preaching.

PADAYON IMAW NGA NANGIN POSITIBO

15. Ano ro nagapakita nga positibo si Jesus sa pagministeryo?

¹⁵ Padayon nga nangin positibo si Jesus sa pagministeryo. Nakabulig ra kana nga mangin masadya ag padayon nga mangin mahugod sa pagwali nga ueobrahon. Halimbawa, mga sang dag-on pa eang nga naumpisahan ni Jesus ro anang pagministeryo, nakita na nga abu ro handang magpamati sa mayad nga balita. Ginkumpara na sanda sa aeanihon nga handa eon anihon. (Juan 4:35) Pagtaliwan it mga sang dag-on, ginhambae ni Jesus sa anang mga disipulo nga “Abunda [o, abu] ro aeanihon.” (Mat. 9:​37, 38) Ag ku ulihi, ginpabahoe na ra it uman: “Abu ro aeanihon . . . Magpangamuyo kamo sa tag-ana ku aeanihon nga magpadaea imaw it dugang pa nga mga manog-ani sa anang aeanihon.” (Luc. 10:2) Padayon nga nag-eaum si Jesus nga may una gid magabaton sa mayad nga balita, ag nagkasadya gid imaw kat may nagbaton kara.​—Luc. 10:21.

16. Paalin ro mga ilustrasyon ni Jesus hay nagapakita it positibong pagtan-aw sa ministeryo? (Lucas 13:​18-21) (Tan-awa man ro piktyur.)

¹⁶ Ginbuligan ni Jesus ro anang mga disipulo nga padayon nga mangin positibo sa mensahe nga andang ginadaea, makabulig ra kanda nga padayon nga mangin mahugod. Halimbawa, tan-awa ro daywa sa anang mga ilustrasyon. (Basaha ro Lucas 13:​18-21.) Ginkumpara ni Jesus ro mensahe ku Ginharian sa busoe it mustasa nga nangin mabahoe nga puno. Nagakahueogan ra nga abung tawo ro magabaton sa mayad nga balita ag owa it makapugong kara. Ginkumpara na pa gid ra sa lebadora o yeast dahil ro mensahe ku Ginharian hay iwali sa bilog nga kalibutan ag pwede rang makapabag-o sa mga tawo, maskin rayang pagbag-o hay indi eagi makita it iba. Ngani, ginpasalig ni Jesus ro anang mga disipulo nga ro mensahe nga andang ginawali hay magabulig sa abu nga tawo.

17. Ano ro mga rason kon ham-an padayon kitang mangin positibo sa atong ministeryo?

¹⁷ Kon isipon naton kon paalin nakabulig ro pag-preaching sa abu nga tawo sa bilog nga kalibutan makaron, mapalig-on kitang padayon nga mag-preaching. Kada dag-on, minilyon nga mga interesado ro naga-attend sa Memoryal ag nagapa-Bible study. Linibo man ro nabautismuhan ag nangin kaibahan naton sa pagwali nga ueobrahon. Owa kita kasayod kon pila pa ro magapamati sa atong pag-preaching, pero sayod naton nga ginatipon ni Jehova ro mabahoe nga grupo it mga tawo nga maeuwas sa nagapaabot nga mabahoe nga kasakitan. (Pah. 7:​9, 14) Si Jehova ro Agaeon it pag-ani, ag sigurado imaw nga abu pang tawo ro magabaton it mayad nga balita. Ngani, padayon eang kitang mag-preaching.

18. Ano ro gusto naton nga makita katon it iba?

¹⁸ Kilaea gid ro mga disipulo ni Jesus nga mahugod sa pag-preaching. Kat nakita it mga tawo nga ro mga apostoles hay maisog sa pagwali, “nasayran nanda nga raya sanda mga kaibahan anay ni Jesus.” (Binu. 4:13) Habang ginaobserbahan kita it mga tawo sa ministeryo, kabay nga makita man nanda nga ginatuead man naton ro halimbawa it kahugod ni Jesus.