TUEON-AN NGA ARTIKULO 47
KANTA 38 Pabakuron Ka Niya
Espesyal Ka Gid kay Jehova!
“Espesyal gid ikaw.”—DAN. 9:23.
RO ATONG MATUN-AN
Para buligan ro mga nagabatyag nga owa it pueos nga masayran nga importante gid sanda kay Jehova.
1-2. Ano ro makabulig katon nga masayran nga espesyal kita kay Jehova?
ESPESYAL gid kay Jehova ro anang mga alagad. Pero ro pila kanda hay nalisdan nga magpati kara dahil posibleng ginpabatyag kanda it iba nga bukon sanda it importante. Nabatyagan mo eon baea ra? Kon huo, ano ro makabulig kimo nga masayran nga espesyal ka kay Jehova?
2 Ro sangka paagi nga makabulig kimo hay ro pagbasa it mga istorya sa Biblia nga nagapakita kon paalin ginatan-aw ag ginatratar ni Jehova ro mga tawo. Ginrespeto ni Jesus ro mga tawo ag gintratar na sanda nga may kabuot. Sa pag-obra kara, ginpakita na nga espesyal kana ag sa anang Ama ro mga nagabatyag nga bukon sanda it importante. (Juan 5:19; Heb. 1:3) Sa rayang artikulo, pagatalakayon naton: (1) kon paalin ginbuligan ni Jesus ro mga tawo nga masayran nga importante sanda ag (2) kon paalin naton makumbinsi ro atong sarili nga espesyal gid kita sa panan-aw it Dyos.—Hag. 2:7.
GINBULIGAN NI JESUS RO MGA TAWO NGA MASAYRAN NGA IMPORTANTE SANDA
3. Paalin gintratar ni Jesus ro mga taga-Galilea nga gustong magpabulig kana?
3 Kat nagwali si Jesus sa Galilea, abung tawo ro nag-agto kana para magpamati ag magpabueong it andang mga masakit. Naghambae si Jesus nga “ginapalisdan ag ginadaog-daog sanda, pareho it mga karnero nga owa it manogbantay.” (Mat. 9:36, Ro Bag-o nga Kasugtanan, TAP.) Ginpakanaba man sanda ku andang relihiyusong mga lider ag naghambae kanda nga “ginpakamaeaut sanda it Dyos!” (Juan 7:47-49) Pero gintratar sanda ni Jesus nga may kabuot ag pagrespeto paagi sa pagtao kanda it oras agud tur-an sanda ag pamayron ro andang mga masakit. (Mat. 9:35) Dugang pa, para mabuligan ro mas abu nga tawo, ginsanay na ro anang mga apostoles sa pagwali nga ueobrahon ag gintaw-an sanda it awtoridad nga magpamayad it mga masakit.—Mat. 10:5-8.
4. Ano ro atong matun-an sa paagi it pagtratar ni Jesus sa ratong mga ginapakanaba it iba?
4 Ro pagrespeto ni Jesus ag pagtao it konsiderasyon sa mga tawo hay nagapakita nga importante kana ag sa anang Ama ratong mga ginapakanaba it iba. Kon nagaalagad ka kay Jehova pero nabatyagan mo gihapon nga bukon ka it importante, dumdoma kon paalin gintratar ni Jesus ro mga tawo nga gustong magpamati kana. Paagi kara, makita mo kon mauno ka kaimportante sa panan-aw ni Jehova.
5. Ano ro sitwasyon it sangka bayi nga taga-Galilea nga nakilaea ni Jesus?
5 Owa eang nagturo si Jesus sa mga grupo it mga tawo kundi gintur-an na man ag ginbuligan ro pilang ka indibidwal. Halimbawa, habang nagawali si Jesus sa Galilea, nakilaea na ro sangka bayi nga ginatagasan it dugo sa sueod it 12 nga dag-on. (Mar. 5:25) Base sa kasugoan, bukon it malimpyo ruyong bayi ag ro bisan sin-o nga magbuyot kana hay mangin bukon man it malimpyo. Ngani indi imaw pwedeng makig-iba sa mga tawo. Dugang pa, indi man imaw makaintra sa mga selebrasyon ag sa pangpubliko nga pagsimba. (Lev. 15:19, 25) Ngani owa eang nag-antus rayang bayi dahil sa anang masakit kundi nagbatyag man imaw nga owa it pueos.—Mar. 5:26.
6. Ano ro gin-obra it bayi nga ginatagasan it dugo para magmayad imaw?
6 Gusto gid it rayang bayi nga pamayron imaw ni Jesus. Pero owa na ra ginhambae kana it direkta. Ham-an? Posible nga nahuya imaw dahil sa anang sitwasyon. O nahadlok imaw nga basi pangisgan eang imaw ni Jesus dahil indi imaw pwedeng magpaeapit sa mga tawo. Ngani ginbuytan na lang ro gayad it eambong ni Jesus, nga nagasalig nga magmayad imaw maskin raya eang ro anang obrahon. (Mar. 5:27, 28) Dahil sa anang pagtuo, nagmayad imaw. Nagpangutana rayon si Jesus kon sin-o ro nagbuyot kana, ag nag-aku kara ro bayi. Paalin imaw gintratar ni Jesus?
7. Paalin gintratar ni Jesus ro bayi nga nagaantus? (Mar. 5:34)
7 Gintratar ni Jesus ro bayi nga nagaantus nga may kabuot ag pagrespeto. Napan-uhan na nga “nagakurog sa kahadlok” ro bayi. (Mar. 5:33) Ngani, ginpakitaan na imaw it kabuot ag ginpalig-on. Gintawag na pa ngani ra nga anang “unga.” Paagi kara, owa eang ginpakita ni Jesus ro pagrespeto kana kundi ginpakita na man ro kabuot ag pagpalangga. (Basaha ro Marcos 5:34.) Raya eang ro narekord sa Biblia nga gintawag ni Jesus ro sangka bayi nga anang “unga.” Posibleng gingamit na rayang termino dahil nakita na nga nahadlok gid ro bayi. Imadyina kon paalin napaumpawan ro bayi sa ginhambae ni Jesus! Kon owa imaw ginpasalig ni Jesus, posibleng makonsensya gihapon imaw maskin pa nagmayad eon imaw. Euwas sa gusto ni Jesus nga pamayron imaw, gusto na man nga masayran it bayi nga palangga imaw it anang Ama sa eangit.
8. Ano nga mga kalisdanan ro naatubang it sangka sister nga taga-Brazil?
8 Makaron, ro pila sa mga alagad it Dyos hay may masakit man sa pisikal nga nagapabatyag kanda nga owa sanda it pueos. Si Mariaa nga sangka regular pioneer, nga taga-Brazil hay natawo nga owa it mga siki ag owa it waea nga alima. Naghambae imaw: “Pirme akong gina-bully sa eskuylahan dahil sa ang sitwasyon. May mga hayo sanda nga ginasunlog kakon nga nakasakit gid kang. Ag kon amat, ginapabatyag man it ang pamilya nga owa ako it pueos.”
9. Ano ro nakabulig kay Maria nga masayran nga importante imaw kay Jehova?
9 Ano ro nakabulig kay Maria? Kat nangin Saksi ni Jehova imaw, ginpalig-on imaw ag ginbuligan it mga igmanghod nga makita kon ano ro pagtan-aw kana ni Jehova. Naghambae imaw: “Indi gid mag-igo sa ang notebook kon isueat ko ro mga pangaean it mga igmanghod nga nagbulig kakon! Nagapasaeamat gid ako kay Jehova dahil gintaw-an na ako it mapinalanggaon nga pamilya sa sueod it kongregasyon.” Ginbuligan it mga igmanghod si Maria nga masayran nga importante imaw sa Dyos.
10. Ano ro problema nga nagpaantus kay Maria Magdalena? (Tan-awa man ro piktyur.)
10 Tan-awa kon paalin ginbuligan ni Jesus ro sambilog pa nga bayi, nga si Maria Magdalena. Ginsapian imaw it pito nga mga demonyo! (Luc. 8:2) Dahil kara, posibleng kakaiba o buko’t normal ro anang mga ginaobra, ngani ginalikawan imaw it mga tawo. Sa ruyong makaeueuoy nanang sitwasyon, siguradong nagbatyag imaw it kahadlok ag nag-isip nga owa eon it nagapalangga o makabulig kana. Ginpaguwa ni Jesus ro mga demonyo nga nagpaantus kana ag nangin matutom na imaw nga disipulo. Ano pa ro gin-obra ni Jesus para buligan si Maria Magdalena nga masayran nga importante imaw sa Dyos?
Paalin ginpasalig ni Jesus si Maria Magdalena nga importante imaw kay Jehova? (Tan-awa ro parapo 10-11)
11. Paalin ginpakita ni Jesus kay Maria Magdalena nga importante imaw sa Dyos? (Tan-awa man ro piktyur.)
11 Ginsampit ni Jesus si Maria Magdalena nga magsunod kanda sa pagwali sa mga baryo.b Bilang resulta, nabatian na ro mga pagturo ni Jesus ag nakabenepisyo gid imaw kara. Nagpakita man kana si Jesus sa adlaw mismo nga ginbanhaw imaw. Sambilog imaw sa mga disipulo nga unang gin-istorya ni Jesus sa ruyong adlaw. Ag ginpangabay imaw ni Jesus nga isugid sa anang mga apostoles nga nabanhaw eon imaw. Sa rayang mga paagi, ginpakita kana ni Jesus nga importante gid imaw kay Jehova!—Juan 20:11-18.
12. Ham-an nagbatyag si Lidia nga owa imaw it pueos?
12 Pareho kay Maria Magdalena, abu man makaron ro nagabatyag nga owa sanda it pueos. Ro sangka sister nga si Lidia, nga taga-Spain hay naghambae nga kat ginanabdos paeang imaw it anang nanay, nag-isip ra nga ipahueog imaw. Nadumdoman ni Lidia nga maskin unga pa imaw, ginapabay-an ag ginahambaean imaw it maeain ku anang nanay. Naghambae imaw: “Ro gusto ko malang kunta hay batunon ako ag palanggaon it iba. Pero matsa bukon man ako it nagakabagay nga palanggaon dahil ginpabatyag kang ku ang nanay nga owa ako it pueos.”
13. Ano ro nakabulig kay Lidia nga masayran nga importante imaw kay Jehova?
13 Kat nagpa-Bible study si Lidia, nagbag-o ro anang pagtan-aw sa anang sarili. Ro pagpangamuyo kay Jehova, pagbasa it Biblia, ag ro manami nga mga ginahambae ag ginaobra it mga igmanghod hay nakabulig kana nga masayran nga importante imaw kay Jehova. Naghambae imaw: “Pirme kakon ginahambae it ang asawa nga palangga na gid ako. Pirme na man ginapadumdom kakon ro ang manami nga mga ugali. Ag ruyon man ro ginaobra it ang mga amiga ag amigo.” May kilaea ka baea nga nagakinahang-ean it bulig para masayran na nga importante imaw kay Jehova?
TAN-AWA ING SARILI PAREHO SA PAGTAN-AW NI JEHOVA
14. Paalin ro 1 Samuel 16:7 makabulig katon nga tan-awon ro atong sarili pareho sa pagtan-aw katon ni Jehova? (Tan-awa man ro kahon nga “Ham-an Espesyal Gid kay Jehova ro Anang Katawhan?”)
14 Dumdoma nga iba ro pagtan-aw kimo ni Jehova kaysa sa pagtan-aw it mga tawo sa kalibutan. (Basaha ro 1 Samuel 16:7.) Owa ka nana ginatan-aw base eang sa ing itsura, estado sa kabuhi, o sa ing tinun-an. (Isa. 55:8, 9) Ngani imbes nga tan-awon ing sarili base sa pagtan-aw it mga tawo sa kalibutan, tinguhai nga tan-awon ing sarili base sa pagtan-aw kimo ni Jehova. Pwede mong basahon ro mga istorya sa Biblia kon paalin ginpakita ni Jehova nga importante gid kana ratong mga nagabatyag nga owa sanda it pueos, pareho nanday Elias, Noemi, ag Hana. Pwede mo mang isueat ing mga eksperyinsya nga nagapakita nga palangga ka gid ni Jehova ag importante ka kana. Dugang pa, pwede ka mang mag-research sa atong mga publikasyon it mga topiko parti sa pagpalangga kimo ni Jehova.c
15. Ham-an “espesyal gid” si Daniel kay Jehova? (Daniel 9:23)
15 Dumdoma nga espesyal ka gid kay Jehova dahil matutom ka kana. Sang beses, kat mga 90 eon ro edad ni propeta Daniel, nakabatyag imaw it grabi nga ‘kagaoy’ ag pag-euya it buot. (Dan. 9:20, 21) Paalin imaw ginpalig-on ni Jehova? Ginpadaea it Dyos ro anghel nga si Gabriel para padumdomon si Daniel nga “espesyal gid” imaw ag ginapamatian ro anang mga pangamuyo. (Basaha ro Daniel 9:23.) Ham-an espesyal gid sa Dyos si Daniel? Dahil matarung ag matutom gid imaw. (Eze. 14:14) Ginpasueat ra ni Jehova sa Biblia para palig-unon kita. (Roma 15:4) Ngani, pamatian man ni Jehova ing mga pangamuyo ag importante ka gid kana dahil ginaobra mo ro tama ag matutom ka kana.—Miq. 6:8, ftn.; Heb. 6:10.
16. Ano ro makabulig kimo nga makita nga si Jehova hay sangka mapinalanggaon nga Ama?
16 Tan-awa si Jehova bilang sangka Ama nga nagapalangga kimo. Gusto ka nanang buligan, buko’t para usuyan ka it saea. (Sal. 130:3; Mat. 7:11; Luc. 12:6, 7) Ro pagpamaeandong kara hay nakabulig sa abung tawo nga nakabatyag nga owa sanda it pueos. Ro sambilog kara hay ro sister nga si Eliana, nga taga-Spain. Nagbatyag imaw nga owa it nagapalangga kana ag owa imaw it pueos dahil sa masakit nga mga ginahambae ku anang asawa sa sueod it mga dinag-on. Naghambae imaw, “Kon mabatyagan ko nga owa ako it pueos, ginatinguhaan ko nga isipon nga ginakuekoe ako ni Jehova sa anang mga butkon ag ginapasalig sa anang pagpalangga ag proteksyon.” (Sal. 28:9) Ginapadumdom mat-a it sister nga si Lauren nga taga-South Africa ro anang sarili, “Dahil ginpapaeapit ako ni Jehova kana, ginbuligan nga mangin amigo nana, ag gingamit para buligan ro iba, sigurado ako nga importante gid ako kana ag may pueos.”—Os. 11:4.
17. Ano ro makabulig kimo nga mangin kumbinsido nga ginakahamut-an ka ni Jehova? (Salmo 5:12) (Tan-awa man ro piktyur.)
17 Mangin kumbinsido nga ginakahamut-an ka ni Jehova. (Basaha ro Salmo 5:12.) Ginkumpara ni David ro kahamuot ni Jehova sa “mabahoe nga panagang” nga nagaprotekta sa matarung nga mga tawo. Ro pagkasayod nga ginakahamut-an ka ni Jehova ag ginabuligan ka nana hay makabulig kimo nga malikawan nga magbatyag nga owa ka it pueos. Paalin mo masayran nga ginakahamut-an ka ni Jehova? Sa natun-an eon naton, ginasugid ra ni Jehova paagi sa anang Bisaea. Dugang pa, ginagamit na man ro mga elder, ro atong maeapit nga mga amigo, ag ro mga igmanghod para padumdomon kita nga importante kita kana. Ano ing obrahon kon ginakomendahan ka it iba?
Kon sayod naton nga ginakahamut-an kita ni Jehova, makabulig ra katon nga malikawan nga magbatyag nga owa kita it pueos (Tan-awa ro parapo 17)
18. Ham-an dapat mong batunon ro komendasyon it iba?
18 Batuna ro sinsero nga komendasyon it mga nakakilaea ag nagapalangga kimo. Ag isipa nga posibleng ginagamit sanda ni Jehova para buligan ka nga masayran nga ginakahamut-an ka Nana. Si Eliana nga ginsambit kaina hay naghambae: “Amat-amat ko nga natun-an nga batunon ro mga komendasyon nga ginahambae kakon it iba. Nalisdan gid ako nga magpati sa andang manami nga mga ginahambae parti kakon, pero sayod ko nga gusto ni Jehova nga patihan ko ra.” Ro mga pagtinguha it mga elder hay nakabulig gid kay Eliana nga masayran nga ginakahamut-an imaw ni Jehova. Makaron, nagaalagad imaw bilang sangka payunir ag remote volunteer sa Bethel.
19. Ham-an makasigurado ka nga espesyal ka gid kay Jehova?
19 Ginapadumdom kita ni Jesus nga importante gid kita sa atong Ama sa eangit. (Luc. 12:24) Ngani makasigurado kita nga espesyal gid kita kay Jehova. Kabay nga indi gid naton ra pagkalipatan! Ag kabay nga obrahon man naton ro atong bilog nga masarangan para buligan ro iba nga masayran kon mauno sanda kaespesyal kay Jehova!
KANTA 139 Handurawa nga Bag-o Na ang Tanan
a Gin-islan ro ibang pangaean.
b Sambilog si Maria Magdalena sa mga bayi nga nakaibahan ni Jesus sa anang pagministeryo. Gingamit it rayang mga bayi ro andang sariling kwarta para suportahan ro mga kinahang-eanon ni Jesus ag ku mga apostoles.—Mat. 27:55, 56; Luc. 8:1-3.
c Halimbawa, tan-awa ro kapitulo 24 sa libro nga Mangin Suod kay Jehova ag basaha ro mga teksto ag ro mga halimbawa sa Biblia sa idaeum it topiko nga “Pagduhaduha” sa libro nga Mga Teksto Para sa Aton Cristianong Pagkabuhi.