Mga Asawang Eaki, Padunggi ro Inyong Asawa

1. Ham-an nagtao si Jehova it regalo nga pag-asawa?

SI JEHOVA hay “bulahan [o, masadya] nga Dyos,” ag gusto na nga mangin masadya man kita. (1 Tim. 1:11) Nagtao imaw it abung regalo agud ma-enjoy naton ro kabuhi. (Sant. 1:17) Sambilog sa ruyong mga regalo hay ro pag-asawa. Kon ro eaki ag bayi hay magpakasae, nagapromisa sanda nga palanggaon, respetuhon, ag apresyahon ro kada isaea. Kon padayon nanda nga palanggaon ro kada isaea, mangin masadya gid sanda.​—Hulu. 5:18.

2. Ano ro nagakatabo sa mga mag-asawa makaron?

² Makasueobo, abung mag-asawa makaron ro owa nagtuman sa andang promisa kat ginkasae sanda. Bilang resulta, bukon sanda it masadya. Ginapakita ku report it World Health Organization nga abung asawang eaki ro nagasakit it andang asawa sa pisikal, verbal, o emosyonal. Kon may ibang tawo, manami ro pagtratar it asawang eaki sa anang asawa, pero iba ro anang ginapakita kon sanda lang sa baeay. Abu man nga mag-asawa ro naapektuhan dahil nagatan-aw it pornograpiya ro andang asawang eaki.

3. Ano ro mga rason kon ham-an ginaabuso it mga asawang eaki ro andang asawa?

³ Ham-an ginaabuso it ibang asawang eaki ro andang asawa? Posible nga nagbahoe sanda sa mapintas nga tatay, ngani para kanda normal eang ro pagpang-abuso. Ro iba hay naimpluwensyahan it andang kultura nga nagaturo it saea nga ideya nga “ro matuod nga eaki” hay dapat imaw gid pirme ro masunod. Ro iba mat-a hay owa hatur-an kon paalin kontrolon ro andang emosyon, eakip eon ro kaakig. Ro ibang mga eaki nga pirmeng nagatan-aw it pornograpiya hay nangin saea ro andang pagtan-aw sa mga bayi ag sa sex. Dugang pa, ginapakita it mga report nga mas naglala rayang mga problema sa panahon it COVID-19 nga pandemic. Syempre, rayang mga bagay hay buko’t rason para abusuhon it mga asawang eaki ro andang asawa.

4. Sa ano dapat maghaeong ro Cristyanong mga asawang eaki, ag ham-an?

⁴ Dapat maghaeong ro Cristyanong mga asawang eaki nga indi sanda maimpluwensyahan it buko’t tama nga pagtratar sa mga bayi.a Ham-an? Ro sambilog nga rason hay kon ano ing ginaisip ruyon man rayon ing ginaobra. Ginpaandaman ni apostol Pablo ro pinili nga mga Cristyano sa Roma nga “indi [sanda] magsunod sa pagginawi it mga tawo sa raya nga kalibutan.” (Roma 12:​1, 2) Kat ginsueatan sanda ni Pablo, mabuhay eon sanda nga mga Cristyano. Pero, ginapakita it sueat ni Pablo nga ro pila sa kongregasyon hay naimpluwensyahan gihapon it mga kustombre ag kaisipan it kalibutan. Ngani ginpadumdom na sanda nga bag-uhon ro andang kaisipan ag paggawi. Rayang pahanumdom hay maaplikar man sa Cristyanong mga asawang eaki makaron. Makasueobo, ro pila kanda hay naimpluwensyahan ku kaisipan it kalibutan ag ginaabuso ro andang asawa.b Ano ro gusto ni Jehova nga pagtratar it asawang eaki sa anang asawa? Makita naton ro sabat sa tema nga teksto it rayang artikulo.

5. Base sa 1 Pedro 3:​7, paalin dapat trataron it asawang eaki ro anang asawa?

⁵ Basaha ro 1 Pedro 3:7. Ginasugo ni Jehova ro mga asawang eaki nga padunggan ro andang asawa. Ro pagpadungog hay nagatukoy sa kon paalin naton ginatratar ro tawo nga atong ginarespeto. Ro asawang eaki nga nagapadungog sa anang asawa hay ginatratar imaw sa mabuot ag mapinalanggaon nga paagi. Sa rayang artikulo, talakayon naton kon paalin mapakita it asawang eaki ro pagpadungog sa anang asawa. Pero, talakayon anay naton ro mga paggawi nga owa nagapadungog sa anang asawang bayi.

ISIKWAY RO MGA PAGGAWI NGA OWA NAGAPADUNGOG SA ING ASAWA

6. Ano ro nabatyagan ni Jehova sa mga asawang eaki nga nagapanakit ku andang asawa? (Colosas 3:19)

⁶ Indi magpanakit. Akig gid si Jehova sa mga bayolente. (Sal. 11:5) Naugot man imaw sa mga asawang eaki nga nagapang-abuso sa andang asawa. (Mal. 2:16; basaha ro Colosas 3:19.) Base sa atong tema nga teksto sa 1 Pedro 3:​7, kon owa ginatratar it mayad ku asawang eaki ro anang asawa, maapektuhan ro anang relasyon sa Dyos. Posible nga indi man pagpamatian ni Jehova ro anang mga pangamuyo.

7. Base sa Efeso 4:​31, 32, anong klasi it mga hambae ro dapat likawan it mga asawang eaki? (Tan-awa man ro “Dugang nga Eksplinasyon.”)

⁷ Indi maghambae it masakit nga mga bagay. Ro ibang mga asawang eaki hay ginaabuso ro andang asawa paagi sa paghambae it masakit nga mga bagay. Naugot si Jehova sa mga maakigon, may aligutgot, nagasieinggitan, ag nagahambae it mga masakit.c (Basaha ro Efeso 4:​31, 32.) Nabatian ni Jehova ro tanan. Importante kay Jehova kon paalin ginaistorya it asawang eaki ro anang asawa maskin owa’t ibang tawo. Ro asawang eaki nga nagahambae it masakit sa anang asawa hay nagasamad bukon eang sa andang pag-asawahan, kundi pati man sa anang relasyon sa Dyos.​—Sant. 1:26.

8. Ano ro ginabatyag ni Jehova parti sa pornograpiya, ag ham-an?

⁸ Indi magtan-aw it pornograpiya. Ano ro ginabatyag ni Jehova parti sa pornograpiya? Ginakaugtan na ra. Ngani ro asawang eaki nga nagatan-aw it mahigko nga mga taean-awon hay nagasamad it anang relasyon kay Jehova, ag nagapakanaba sa anang asawa.d Gusto ni Jehova nga mangin mainunongon ro asawang eaki sa anang asawa, bukon eang it sa anang mga ginaobra kundi pati man sa anang mga ginaisip. Ginhambae ni Jesus nga ro eaki nga nagatan-aw sa ibang bayi nga may kaibog hay nakapanghilahi eon “sa anang tagipusoon.”e—Mat. 5:​28, 29.

9. Ham-an naugot si Jehova kon ginapilit it asawang eaki ro anang asawa nga mag-obra it sekswal nga mga bagay nga kontra sa anang konsensya?

⁹ Indi pagpilita ing asawa nga mag-obra it sekswal nga mga bagay nga kontra sa anang konsensya. Ginapilit it ibang asawang eaki ro andang asawa nga mag-obra it sekswal nga mga bagay nga para sa asawang bayi hay makahueoya, ag makapabatyag nga mahigko imaw o owa ginapalangga. Naugot si Jehova sa rayang makasarili ag owa’t pagpalangga nga paggawi. Gusto ni Jehova nga palanggaon ag apresyahon it asawang eaki ro anang asawa, ag respetuhon ro anang baeatyagon. (Efe. 5:​28, 29) Paalin kon ginapakanaba o ginaabuso it Cristyanong asawang eaki ro anang asawa, o nagatan-aw imaw it pornograpiya? Paalin na mabag-o ro anang kaisipan ag ginaobra?

KON PAALIN PUNDUHON RO MAEAIN NGA PAGGAWI

10. Paalin makabenepisyo ro mga asawang eaki sa halimbawa ni Jesus?

¹⁰ Ano ro makabulig sa asawang eaki nga mapundo ro anang mapang-abuso ag makahueoya nga paggawi? Pwede nang tinguhaan nga tuearon si Jesus. Maskin pa owa it asawa si Jesus, ro anang paagi it pagtratar sa anang mga disipulo hay manami nga halimbawa para sa asawang eaki kon paalin na dapat trataron ro anang asawa. (Efe. 5:25) Halimbawa, tan-awa kon ano ro matun-an it mga asawang eaki sa paagi it pagtratar ni Jesus sa anang mga apostoles ag sa paagi it anang pagpakig-istorya kanda.

11. Paalin gintratar ni Jesus ro anang mga apostoles?

¹¹ Gintratar ni Jesus ro anang mga apostoles sa mabuot ag may respeto nga paagi. Owa imaw nagamandar o masakit maghambae. Maskin anda imaw nga Ginuo ag Agaeon, owa ginpabatyag ni Jesus nga may awtoridad imaw kaysa kanda paagi sa paggamit it anang gahum. Kundi, mapainubuson imaw nga nag-alagad kanda. (Juan 13:​12-17) Ginhambae na sa anang mga disipulo: “Magtuon kamo kakon, ay ako maeugpay ag mapainuboson it tagipusoon, ag makapahuway kamo.” (Mat. 11:​28-30) Dumdoma nga si Jesus hay kalmado o mabuot nga tawo. Ro kalmado nga tawo hay buko’t maeuya. Kundi, may ikasarang imaw sa pagpugong sa anang sarili. Kon may nagpaugot kana, nagapabilin imaw nga kalmado ag ginakontrol ro anang emosyon.

12. Paalin makipag-istorya si Jesus sa iba?

¹² Ro paagi it paghambae ni Jesus hay makapaumpaw ag makapalig-on sa iba. Owa imaw naghambae it maeain sa anang mga sumoeunod. (Luc. 8:​47, 48) Maskin gin-insulto imaw it mga nagahingabot kana ag gintinguhaan nga paakigon, “owa imaw magbaeos.” (1 Ped. 2:​21-23) May beses nga naghipos lang si Jesus kaysa magsabat kanda it masakit. (Mat. 27:​12-14) Kanami gid nga halimbawa para sa Cristyanong mga asawang eaki!

13. Base sa Mateo 19:​4-6, paalin ro asawang eaki “magaiba sa anang asawa”? (Tan-awa man ro piktyur.)

¹³ Ginsugo ni Jesus ro mga asawang eaki nga mangin mainunongon sa andang asawa. Ginkutar na ro ginhambae it anang Ama nga ro asawang eaki hay dapat “magaiba sa anang asawa.” (Basaha ro Mateo 19:​4-6.) Ro Griego nga termino nga gingamit sa rayang teksto nga “magaiba” hay literal nga nagakahueogan nga “magdukot o magpilit.” Ngani, ro relasyon it mag-asawa hay dapat matibay nga matsa gindukot sandang daywa it mayad. Kon ro sambilog kanda hay nakaobra it makapasakit sa anang asawa, pareho sandang magaantus. Ro asawang eaki nga palangga gid ro anang asawa hay ginasikway ro tanan nga klasi it pornograpiya. Ginalikaw na eagi ro anang mga mata sa “pagtan-aw sa owa it pueos nga mga bagay.” (Sal. 119:37) Pareho kay Job, determinado imaw nga indi gid magtueok nga may kaibog sa maskin sin-o nga bayi.​—Job 31:1.

14. Ano ro dapat obrahon it nagapang-abusong asawang eaki para maayos ro anang relasyon kay Jehova ag sa anang asawa?

¹⁴ Ro asawang eaki nga nagaabuso sa anang asawa sa pisikal o verbal hay kinahang-ean may obrahon para maayos ro anang relasyon kay Jehova ag sa anang asawa. Ano ro mga dapat nang obrahon? Una, aminon na sa anang sarili nga may seryoso imaw nga problema. Owa it matago kay Jehova. (Sal. 44:21; Man. 12:14; Heb. 4:13) Pangaywa, punduhon na ro pag-abuso sa anang asawa ag bag-uhon ro anang paggawi. (Hulu. 28:13) Pangatlo, akuon na nga nakasaea imaw sa anang asawa ag kay Jehova, ag makit-euoy sa andang kapatawaran. (Binu. 3:19) Dapat na mang hinyuon kay Jehova nga taw-an imaw it kagustuhan nga magbag-o ag bulig nga makontrol ro anang mga ginaisip, ginahambae, ag ginaobra. (Sal. 51:​10-12; 2 Cor. 10:5; Fil. 2:13) Pang-ap-at, maghueag imaw base sa anang ginpangamuyo, ag obrahon na ro tanan para kaugtan ro tanan nga klasi it kapintas ag masakit nga hambae. (Sal. 97:10) Panglima, kinahang-ean na nga magpabulig eagi sa mga elder sa kongregasyon. (Sant. 5:​14-16) Pang-an-um, maobra imaw it plano para malikawan nga makaobra it uman it rayang saea nga mga bagay. Ro asawang eaki nga nagatan-aw it pornograpiya hay dapat raya man ro anang obrahon. Pakamayron gid ni Jehova ro anang mga pagtinguha nga bag-uhon ro anang paggawi. (Sal. 37:5) Pero bukon eang it ruyon ro dapat obrahon it asawang eaki para mapundo ro mga bagay nga nagapasakit sa anang asawa. Kinahang-ean na mang tun-an kon paalin ipakita ro pagpadungog sa anang asawa. Paalin na ra maobra?

KON PAALIN PADUNGGAN ING ASAWA

15. Paalin ipakita it asawang eaki ro anang pagpalangga sa anang asawa?

¹⁵ Ipakita ing pagpalangga. Ro pila nga mga brother nga masadya sa andang pag-asawa hay ginasigurado nga may maobra sanda kada adlaw para ipakita sa andang asawa kon mauno nanda sanda kapalangga. (1 Juan 3:18) Pwedeng ipakita it asawang eaki ro anang pagpalangga sa anang asawa paagi sa simpleng mga bagay, pareho it pagkupkop kana o pagbuyot sa anang alima. Pwede na man imaw i-text o i-chat nga “I miss you” o pangutan-on it “Kamusta ing adlaw?” Kon amat, pwede na mang sueatan it card ro anang asawa para ihambae kon mauno na imaw kapalangga. O pwede nang taw-an it bueak. Kon obrahon ra it asawang eaki, ginapadunggan na ro anang asawa, ag magabakud ro andang pag-asawahan.

16. Ham-an dapat dayawon it asawang eaki ro anang asawa?

¹⁶ Ihambae kana nga naapresyar mo imaw. Ro asawang eaki nga ginapadunggan ro anang asawa hay ginapabaskog ag ginapalig-on imaw. Ro sambato nga paagi nga mapakita na ra hay ro pagpasaeamat sa tanan nga ginaobra it anang asawa para suportahan imaw. (Col. 3:15) Kon sinsero nga ginadayaw it asawang eaki ro anang asawa, nagapasadya ra kana. Mabatyagan na ro seguridad, pagpalangga, ag pagpadungog.​—Hulu. 31:28.

17. Paalin ipakita it asawang eaki nga ginarespeto na ro anang asawa?

¹⁷ Mangin mabuot ag may respeto. Ro asawang eaki nga palangga ro anang asawa hay ginataw-an imaw it importansya ag ginaapresyar. Ginatan-aw na imaw bilang sangka maeahaeon nga regalo halin kay Jehova. (Hulu. 18:22; 31:10) Bilang resulta, ginatratar na imaw it mabuot ag may respeto, eakip eon sa sekswal ag pribadong parte it andang pag-asawa. Owa na imaw ginapilit nga mag-obra it sekswal nga mga ueobrahon nga makapabatyag kana nga ginaabuso imaw, bukon it komportable, o nagakontra sa anang konsensya.f Ginatinguhaan man it asawang eaki nga mangin malimpyo ro anang konsensya sa atubang ni Jehova.​—Binu. 24:16.

18. Ano dapat ro determinadong obrahon it mga asawang eaki? (Tan-awa man ro kahon nga “Ap-at nga Paagi Para Mangin Matinahuron nga Asawang Eaki.”)

¹⁸ Mga asawang eaki, makasigurado kamo nga nakikita ag naapresyar ni Jehova ro inyong mga pagtinguha para padunggan ro inyong asawa sa tanan nyong ginahambae ag ginaobra. Mangin determinado nga padunggan ro inyong asawa paagi sa indi pag-obra it mga bagay nga makasakit kana, ag paagi sa pagiging mabuot, may respeto, ag mapinalanggaon kana. Sa pag-obra kara, ginapakita nyo nga importante ag palangga nyo ro inyong asawa. Padunggi ing asawa agud maprotektahan mo ing pinakaimportanteng relasyon—ing relasyon kay Jehova.​—Sal. 25:14.