Mag-obra it mga Desisyon nga Makapasadya kay Jehova

1. Ano ro kinahang-ean natong obrahon kada adlaw?

KADA adlaw, kinahang-ean natong mag-obra it mga desisyon. Ro iba hay madali malang, pareho sa kon ano ro kan-on sa pamahaw o kon anong oras matueog. Pero may mga bagay nga malisud desisyunan. Pwede ra nga makaapekto sa atong pang-eawas, sa atong kasadya, sa atong mga pinalangga, o sa atong pagsimba. Gusto natong makabenepisyo sa atong mga desisyon ag ro atong pamilya. Eabaw sa tanan, gusto natong mapasadya si Jehova sa atong mga desisyon.​—Roma 12:​1, 2.

2. Ano ro atong obrahon para makaobra it mayad nga mga desisyon?

² Makaobra ka it mayad nga desisyon (1) kon sayuron mo ro mga detalye, (2) kon sayuron mo ro pagtan-aw ni Jehova sa sangka bagay, ag (3) kon timbang-timbangon mo ro mga opsyon. Pagatalakayon sa rayang artikulo rayang tatlong bagay nga dapat natong obrahon, ag makabulig man ra katon kon paalin masanay ro atong ikasarang sa pag-eubot.​—Hulu. 2:11.

SAYURA RO MGA DETALYE

3. Ham-an kinahang-ean mo sayuron ro mga detalye bago mag-obra it desisyon? Magtao it ilustrasyon.

³ Ro una nga paagi para makaobra kita it mayad nga desisyon hay ro paghisayod sa mga detalye. Ham-an importante ra? Imadyina ro sangka pasyente nga nagpa-check up sa doktor parti sa anang malala nga sakit. Taw-an eagi baea imaw it bueong ku doktor maskin owa na pa ra ha-check up o hapangutana parti sa anang sakit? Syempre indi. Makaobra ka man it mayad nga mga desisyon kon sayuron mo anay ro mga detalye nga maaplikar sa ing sitwasyon. Paalin mo ra maobra?

4. Base sa Hulubaton 18:​13, ano ing obrahon para masayran ro mga detalye? (Tan-awa man ro piktyur.)

⁴ Pwede mong masayran ro mga detalye paagi sa pagpangutana. Halimbawa, gin-imbitahan ka sa sangka sosyal nga pagtieipon. Ma-attend ka baea? Kon bukon mo’t kilaea ro host o owa ka kasayod sa mga pagaobrahon igto, pwede kang magpangutana pareho it: “Siin ag hin-uno pagahiwaton rayang pagtieipon? Mauno’t abu ro maga-attend? Sin-o ro organizer kara? Sin-o ro mga ma-attend? Ano ro pagaobrahon igto? May aeak baea nga iserbi?” Ro mga sabat sa rayang mga pangutana hay makabulig kimo nga makaobra it mayad nga desisyon.​—Basaha ro Hulubaton 18:13.

5. Ano ing obrahon kon masayran mo eon ro mga detalye?

⁵ Pagkatapos mong masayran ro mga detalye, isipa it mayad kon ano ro mangin sitwasyon igto. Halimbawa, paalin kon nasayran mo nga ro mga ma-attend hay owa nagasunod sa mga prinsipyo it Biblia o may mga aeak nga iserbi igto nga pagusto ka eang sa pag-inom? Nakikita mo baea nga rayang pagtieipon hay posibleng mangin pawala nga pagsilinadya? (1 Ped. 4:3) O paalin kon ro iskedyul it pagtieipon hay pareho man sa iskedyul it miting sa kongregasyon o sa pagministeryo? Kon nakita mo eon ro kabilugan nga sitwasyon, mas madali kimo nga makaobra it mayad nga desisyon. Pero may una ka pang dapat obrahon. Sayod mo eon kon ano ro mangin sitwasyon; pero ano baea kara ro ginabatyag ni Jehova?​—Hulu. 2:6.

SAYURA KON ANO RO KAISIPAN NI JEHOVA

6. Base sa Santiago 1:​5, ham-an dapat kita mangayo it bulig kay Jehova?

⁶ Mangayo kay Jehova it bulig nga maintindihan ro anang kaisipan. Nagpromisa si Jehova nga taw-an na kita it kaaeam nga masayran kon ro sangka desisyon hay makapasadya kana. Ginatao na rayang kaaeam it “maalwan ag nagatao nga owa it aligutgot sa tanan.”​—Basaha ro Santiago 1:5.

7. Paalin mo masayran ro kaisipan ni Jehova sa sangka bagay? Magtao it ilustrasyon.

⁷ Kon nangayo ka it bulig kay Jehova, pamatii it mayad ro anang sabat. Sa pag-ilustrar: Kon nagtaeang ka sa sangka lugar, pwede kang mangayo it bulig sa taga-igto. Pero mapanaw ka baea eagi bago pa imaw makasabat? Syempre indi. Pamatian mo’t mayad ro anang mga instruksyon. Pareho karon, pagkatapos mong mangayo it kaaeam kay Jehova, tinguhai nga masayran ro anang sabat paagi sa pagtuon kon ano nga mga kasugoan ag prinsipyo sa Biblia ro maaplikar sa ing sitwasyon. Halimbawa, kon magdesisyon ka kon ma-attend o indi sa sosyal nga pagtieipon nga ginsambit kaina, pwede mong sayuron kon ano ro ginahambae it Biblia parti sa pawala nga pagsilinadya, maeain nga mga kaibahan, ag ro pag-una ku intereses it Ginharian bago sa ing personal nga mga kagustuhan.​—Mat. 6:33; Roma 13:13; 1 Cor. 15:33.

8. Ano ing pwedeng obrahon para makita ro impormasyon nga imong ginausoy? (Tan-awa man ro piktyur.)

⁸ Pero, may mga panahon nga kinahang-ean mo it bulig para makita ro impormasyon nga imong ginausoy. Pwede ka makabuoe it suhistyon halin sa eksperyinsyadong brother o sister. Pero, makabenepisyo ka man kon ikaw mismo ro mag-research. Abu kang mabuoe nga impormasyon sa atong mga gamit sa pagtuon, pareho it Giya sa Pagtuon Para sa mga Saksi ni Jehova ag Mga Teksto Para sa Aton Cristianong Pagkabuhi. Tandai nga ing goal hay makaobra it desisyon nga makapasadya kay Jehova.

9. Paalin naton masigurado nga ro atong desisyon hay makapasadya kay Jehova? (Efeso 5:17)

⁹ Paalin naton masigurado nga ro atong desisyon hay makapasadya kay Jehova? Una, dapat kilaeahon naton imaw it mayad. Nagahambae ro Biblia: “Ro paghisayod sa Isaea nga Eabing Baeaan hay nagatao it pag-eubot.” (Hulu. 9:10) Huo, ro matuod nga pag-eubot hay halin sa pagkasayod it mga ugali ni Jehova, sa anang katuyuan, ag sa kon ano ro anang nailaan o owa nailaan. Pangutan-a ing sarili, ‘Base sa akong nasayran parti kay Jehova, ano nga desisyon ang pwedeng obrahon para mapasadya imaw?’—Basaha ro Efeso 5:17.

10. Ham-an mas importante ro mga prinsipyo sa Biblia kaysa sa tradisyon it pamilya o kultura sa atong lugar?

¹⁰ Para mapasadya si Jehova, kinahang-ean natong mag-obra it mga bagay nga kon amat makapadismaya sa mga tawo nga maeapit katon. Halimbawa, ro pila nga mga ginikanan nga may manami nga intensyon hay posibleng piliton ro andang unga nga bayi nga magpakasae sa sangka manggaranon, maskin buko’t mabakud ro anang espiritwalidad. Matuod, gusto nandang mangin komportable ro kabuhi it andang unga, pero mabuligan baea imaw kara nga magbakud ro anang relasyon kay Jehova? Ano ro pagtan-aw kara Jehova? Makita naton ro sabat sa Mateo 6:33. Ginapalig-on kara ro mga Cristyano nga padayon nga ‘unahon ro pag-usoy ku Ginharian.’ Maskin ginapadunggan naton ro atong mga ginikanan ag ginarespeto ro mga tawo sa atong komunidad, ro pinakaimportante katon hay mapasadya si Jehova.

TIMBANG-TIMBANGA RO MGA OPSYON

11. Base sa Filipos 1:​9, 10, ano ro makabulig kimo nga matimbang-timbang ro mga opsyon nga imong pilion?

¹¹ Kon masayran mo eon ro mga prinsipyo sa Biblia nga may eabot sa ing desisyon, kinahang-ean mong isipon it mayad kon alin nga opsyon ing pilion. (Basaha ro Filipos 1:​9, 10) Ro pag-eubot hay makabulig kimo nga maimadyin ro posibleng mangin resulta sa kada bagay nga imong obrahon. Kon amat, madali eang magdesisyon. Pero buko’t tanan nga desisyon hay maeumo eang obrahon. Makabulig kimo ro pag-eubot nga makaobra it mayad nga mga desisyon maskin sa komplikado nga mga sitwasyon.

12-13. Paalin makabulig kimo ro pag-eubot para makaobra it mayad nga desisyon parti sa trabaho?

¹² Imadyina rayang sitwasyon. Nagausoy ka it trabaho para suportahan ing pamilya. May daywang trabaho nga pwede mong pilian. Ginaisip mo ro tanan nga mga detalye pareho sa kon anong klasi nga trabaho, kon ano ro iskedyul, kon mauno’t eayo ro byahe, ag iba pa. Rayang mga trabaho hay bukon man it maeain sa mga Cristyano. Posibleng mas pilion mo ro sambato dahil mas gusto mo ro trabaho o mas mataas kara ro sweldo. Pero may iba ka pang dapat sayuron bago mag-obra it desisyon.

¹³ Halimbawa, raya baeang mga trabaho hay pwedeng makaapekto sa ing pag-attend sa miting it kongregasyon? Mabawasan baea kara ro oras nga kinahang-ean mo para madipara ing pamilya sa emosyonal ag espiritwal nandang mga kinahang-eanon? Makabulig kimo rayang mga pangutana nga unahon ro “eabing mahaega [o, importante] nga bagay”—ing pagsimba ag ro mga kinahang-eanon it ing pamilya—kaysa sa materyal nga mga bagay. Makaobra ka rayon it desisyon nga pakamayron ni Jehova.

14. Paalin ro pag-eubot ag pagpakita it pagpalangga makabulig katon nga indi mapasandad ro iba?

¹⁴ Makabulig man katon ro pag-eubot para isipon kon ro atong desisyon hay makaapekto sa iba agud indi sanda masandad. (Fil. 1:10) Importante ra kon nagaobra kita it personal nga mga desisyon pareho sa atong pang-eambong ag pang-ayos. Halimbawa, basi may gusto kita nga estilo it eambong o pag-ayos. Pero paalin kon masandad kara ro atong mga igmanghod ag ro iba? Makabulig katon ro pag-eubot nga respetuhon ro andang baeatyagon. Pahueagon kita it atong pagpalangga nga unahon ro kamaeayran “it [atong] isigkatawo” ag mangin maugdang. (1 Cor. 10:​23, 24, 32; 1 Tim. 2:​9, 10) Makaobra rayon kita it desisyon nga nagapakita it atong pagpalangga ag pagrespeto sa iba.

15. Ano ing kinahang-ean obrahon bago mag-obra it importanteng desisyon?

¹⁵ Kon nagaobra ka it importante nga desisyon, isipa kon paalin mo ra obrahon. Gintur-an kita ni Jesus nga ‘painu-inuhon anay naton ro bili.’ (Luc. 14:28) Ngani isipa kon mauno’t abu nga oras, pagkabutang, ag kusog ro dapat mong itao para maobra ruyong desisyon. Sa ibang sitwasyon, pwede mong istoryahon ing pamilya kon paalin makabulig ro kada myembro para suportahan ing desisyon. Ham-an importante ro makarayang plano? Posible nga makabulig ra kimo nga i-adjust ing gin-obrang desisyon kon kinahang-ean o may mas praktikal pa nga opsyon nga pwede mong pilion. Ag kon iiba mo ro mga myembro it ing pamilya ag pamatian ro andang mga ginahambae, mas ganahan sanda nga buligan ka para mangin madinaeag-on ing desisyon.​—Hulu. 15:22.

MAG-OBRA IT DESISYON NGA MAGAMADINAEAG-ON

16. Ano ro mga bagay nga makabulig kimo para mangin madinaeag-on ing desisyon? (Tan-awa man ro kahon nga “Kon Paalin Makaobra it Mayad nga mga Desisyon.”)

¹⁶ Kon ginsunod mo ro mga ginsambit kaina, handa ka eon nga mag-obra it mayad nga desisyon. Habuoe mo eon ro tanan nga detalye ag gin-usisa ro mga prinsipyo nga makabulig kimo nga makaobra it mayad nga desisyon nga makapasadya kay Jehova. Pangabaya man si Jehova nga buligan ka nga mangin madinaeag-on ing desisyon.

17. Ano ro panguna nga bagay para makaobra it mayad nga mga desisyon?

¹⁷ Maskin nangin madinaeag-on ing mga haobrang desisyon dati, tandai nga ro pangunang bagay para makaobra it mayad nga mga desisyon hay ro pagsalig buko’t sa ing sariling kaaeam o eksperyinsya, kundi sa kaaeam nga halin kay Jehova. Imaw eang ro makatao katon it matuod nga paghisayod, pag-intindi, ag pag-eubot kon siin ruyon tanan hay importante nga parte it kaaeam. (Hulu. 2:​1-5) Mabuligan ka ni Jehova nga makaobra it mga desisyon nga makapasadya kana.​—Sal. 23:​2, 3.