Ham-an Importante Gid kay Jesus ro Pangaean ni Jehova?

1-2. (a) Ano ro gin-obra ni Jesus ku gabii bago imaw mamatay? (b) Ano nga mga pangutana ro atong pagatalakayon sa rayang artikulo?

KU HWEBES it gabii it Nisan 14, 33 C.E., ginselebrar ni Jesus ro Paihapon ku Ginuo kaibahan sa anang mga apostoles. Sayod na nga sa indi magbuhay, traiduron imaw ni Judas, makaeksperyinsya imaw it grabi nga pag-antus, ag pagapatyon imaw ku anang mga kaaway. Ngani pagkatapos it ihapon, naghambae imaw it makapalig-on nga mga bagay sa anang mga apostoles. Ag bago sanda tanan nagpanaw, sinsero nga nangamuyo si Jesus. Mabasa naton rayang pangamuyo sa Juan kapitulo 17.

² Sa rayang artikulo, pagatalakayon naton ro pila nga mga bagay nga atong matun-an sa pangamuyo ni Jesus. Base sa anang pangamuyo, ano ro ginakabaeak-an ni Jesus bago imaw mamatay? Ano ro importante kana kat iya pa imaw sa eugta? Sayuron naton ro mga sabat sa rayang mga pangutana.

“GINPAKILAEA KO IKAW KANDA”

3. Ano ro ginhambae ni Jesus parti sa pangaean ni Jehova, ag ano ro anang buot hambaeon kara? (Juan 17:​6, 26)

³ Sa anang pangamuyo, ginhambae ni Jesus: “Ginpakilaea ko ikaw kanda.” Ro matuod, daywang beses na nga ginsambit nga ginpakilaea na ro pangaean ni Jehova sa anang disipulo. (Basaha ro Juan 17:​6, 26.) Ano ro anang buot hambaeon kara? Ginsugid na baea sa anang mga disipulo nga ro pangaean it Dyos hay Jehova? Mga Judio ro mga disipulo ni Jesus, ngani sayod eon nanda nga ruyon ro pangaean it Dyos. Mabasa rayang pangaean it linibo nga beses sa Hebreong Kasueatan. Ngani, owa ginatukoy ni Jesus ro personal nga pangaean it Dyos, kundi ginatukoy na kon ano ro ginarepresentar kara. Ginbuligan na ro anang mga disipulo nga mas makilaea nanda si Jehova, eakip kara ro Anang mga katuyuan, mga ueobrahon, ag mga ugali, nga kon siin si Jesus eang ro insaktong makasugid kara.

4-5. (a) Paalin ro pangaean it sangka tawo hay mangin mas importante katon? Magtao it halimbawa. (b) Paalin nangin mas importante ro pangaean ni Jehova sa mga disipulo ni Jesus?

⁴ Halimbawa, may sangka elder sa inyong kongregasyon nga ro pangaean hay David ag imaw man hay sangka doktor. Mabuhay mo eon imaw nga kilaea. Pero sang adlaw, nabutang sa peligro ing kabuhi. Gindaea ka sa ospital kon siin nagatrabaho ruyong brother, ag imaw ro doktor nga nagbueong kimo para mabuhi ka. Makaron, mas importante eon kimo rayang brother. Ag kon mabatian mo ro anang pangaean, nagapasaeamat ka gid dahil sa anang gin-obra para kimo. Si David man gihapon ro elder nga kilaea mo, pero bukon eang it ruyon, imaw man ro doktor nga nag-euwas sa ing kabuhi.

⁵ Pareho karon, sayod eon it mga disipulo ni Jesus ro pangaean ni Jehova. Pero ruyong pangaean hay nangin mas importante kanda dahil ginbuligan sanda ni Jesus. Ham-an nahambae naton ron? Dahil ginpakita ni Jesus ro ugali it anang Ama sa tanan nanang ginahambae ag ginaobra. Ngani kat gin-obserbahan it mga disipulo ro paagi it pagturo ni Jesus ag kon paalin na gintratar ro iba, mas nakilaea nanda it mayad si Jehova.​—Juan 14:9; 17:3.

RO “IMONG NGAEAN NGA GINTAO MO KAKON”

6. Ano ro buot hambaeon ni Jesus kat ginhambae na nga gintao kana ni Jehova ro anang pangaean? (Juan 17:​11, 12)

⁶ Sa pangamuyo ni Jesus para sa anang mga disipulo, naghambae imaw: “Ginbantayan ko sanda paagi sa gahum ku imong ngaean nga gintao mo kakon.” (Basaha ro Juan 17:​11, 12.) Buot hambaeon baea ni Jesus nga tawgon eon imaw nga Jehova? Bukon. Sa pangamuyo ni Jesus, gintukoy na ro pangaean ni Jehova nga “imong ngaean.” Nagapakita ra nga ro pangaean ni Jehova hay owa nangin pangaean ni Jesus. Ngani, ano ro buot hambaeon ni Jesus kat ginhambae na nga gintao kana it Dyos ro anang pangaean? Una, imaw ro representante ag Manoghambae ni Jehova. Nag-agto imaw sa eugta ag nag-obra it mga milagro paagi sa pangaean it anang Ama. (Juan 5:43; 10:25) Dugang pa, ro pangaean nga Jesus hay nagakahueogan nga “Si Jehova ro Kaeuwasan.” Ngani, ro pangaean ni Jesus hay naangot sa pangaean ni Jehova.

7. Ham-an makahambae si Jesus para kay Jehova? Magtao it halimbawa.

⁷ Halimbawa, ro presidente hay pwedeng magpadaea it sangka representante nga manoghambae para kana. Ngani may pareho imaw nga awtoridad sa presidente kon maghambae imaw. Pareho karon, may awtoridad man si Jesus nga maghambae para kay Jehova, dahil imaw ro ginpadaea ni Jehova bilang anang representante.​—Mat. 21:9; Luc. 13:35.

8. Paalin ro pangaean ni Jehova hay “una” kay Jesus bago pa imaw nag-agto sa eugta? (Exodo 23:​20, 21)

⁸ Sa Biblia, ginatawag si Jesus nga “ro Bisaea” dahil imaw ro gingamit ni Jehova para isugid sa mga anghel ag sa mga tawo kon ano ro gusto ni Jehova nga masayran nanda ag dapat obrahon. (Juan 1:​1-3) Posibleng si Jesus ro anghel nga ginpadaea ni Jehova para diparahon ro mga Israelinhon kat igto sanda sa disyerto. Ginhambae ni Jehova sa mga Israelinhon kon ham-an dapat nandang tumanon ruyong anghel: “Dahil una kana ro akong pangaean.”a (Basaha ro Exodo 23:​20, 21.) Ro pangaean ni Jehova hay “una” kay Jesus dahil imaw ro representante ni Jehova ag imaw ro panguna nga nagaapin ag nagapakabaeaan sa pangaean it anang Ama.

“AMA, HIMAYAA RO IMONG NGAEAN!”

9. Mauno kaimportante kay Jesus ro pangaean ni Jehova? Ieksplikar.

⁹ Sa gintalakay eon naton, maskin bago pa mag-agto si Jesus sa eugta, importante gid para kana ro pangaean ni Jehova. Ag kat iya imaw sa eugta, ginpakita na ra sa tanan nanang gin-obra! Sa katapusan it anang ministeryo, ginpangabay na si Jehova: “Ama, himayaa ro imong ngaean!” Rayon, nagsabat ro anang Ama paagi sa mabaskog nga limog halin sa eangit: “Ginhimaya ko eon raya, ag akong himayaon it uman.”​—Juan 12:28.

10-11. (a) Paalin ginhimaya ni Jesus ro pangaean ni Jehova? (Tan-awa man ro piktyur.) (b) Ham-an kinahang-ean pakabaeaanon ag ibindikar ro pangaean ni Jehova?

¹⁰ Ginhimaya man ni Jesus ro pangaean it anang Ama. Paalin? Ro sambilog nga paagi hay ro pagsugid sa iba it manami nga mga ugali ag ginaobra it anang Ama. Pero bukon eang it ruyon, kinahang-ean na mang pakabaeaanon ag ibindikar ro pangaean ni Jehova.b Ginpakita ni Jesus kon mauno ra kaimportante kat ginturo na ro modelo nga pangamuyo sa anang mga disipulo. Ginhambae na: “Ama namon nga una sa eangit, dayawon [o, pakabaeaanon] ro imong ngaean.”​—Mat. 6:9.

¹¹ Ham-an kinahang-ean pakabaeaanon ag ibindikar ro pangaean ni Jehova? Dahil nagsugid it kapurilan si Satanas parti kay Jehova nga Dyos igto sa hardin it Eden. Ginhambae na nga purilon kuno si Jehova ag may ginatago Imaw nga mayad nga mga bagay kanday Adan ag Eba. (Gen. 3:​1-5) Ginhambae na man nga saea ro paagi ni Jehova sa pag-obra it mga bagay. Rayang mga akusasyon ni Satanas hay nagsamad sa reputasyon o pangaean ni Jehova. Ku ulihi, sa panahon ni Job, ginhambae ni Satanas nga nagaalagad eang ro mga tawo kay Jehova dahil sa mayad nga mga bagay nga andang nababaton Kana. Ginhambae na man nga kon makaeksperyinsya sanda it mga kalisdanan, mapundo sanda sa pag-alagad kay Jehova dahil bukon man gid nanda imaw it palangga. (Job 1:​9-11; 2:4) Ngani kinahang-ean it panahon para mapamatud-an kon sin-o gid man ro purilon, si Jehova o si Satanas.

“HAUM AKO SA PAGTAO IT AKONG KABUHI”

12. Ano ro handa nga obrahon ni Jesus dahil importante kana ro pangaean ni Jehova?

¹² Dahil palangga ni Jesus si Jehova, handa nang obrahon ro tanan para mapakabaeaan ag mabindikar ro pangaean ni Jehova. Ginhambae na: “Haum ako sa pagtao it akong kabuhi.” (Juan 10:​17, 18) Ngani, handa imaw nga mamatay para sa pangaean ni Jehova.c Ro unang perpekto nga mga tawo nga sanday Adan ag Eba hay nagpati kay Satanas ag nagrebelde kay Jehova. Sa kabaliskaran, handa si Jesus nga mag-agto sa eugta ag pamatud-an ro anang pagpalangga kay Jehova. Ginpakita na ra paagi sa pagtuman kay Jehova sa tanan nanang gin-obra ag ginhambae. (Heb. 4:15; 5:​7-10) Nagpabilin imaw nga matutom hasta sa anang kamatayon sa poste it pag-antus. (Heb. 12:2) Paagi kara, ginpamatud-an na nga palangga na si Jehova ag ro Anang pangaean.

13. Ham-an si Jesus ro nagakabagay gid nga magpamatuod nga purilon si Satanas? (Tan-awa man ro piktyur.)

¹³ Sa bilog nga kabuhi ni Jesus, ginpamatud-an na nga tama si Jehova, ag purilon si Satanas! (Juan 8:44) Owa eon it iba nga mas nakakilaea kay Jehova kundi si Jesus eang. Kon may tama gid man sa mga akusasyon ni Satanas kontra kay Jehova, sayod dapat ra ni Jesus. Pero determinado gid si Jesus nga apinan ro pangaean ni Jehova. Maskin kat owa imaw ginprotektahan ni Jehova, handa gihapon imaw nga mamatay ag magpabilin nga matutom kaysa nga magrebelde sa anang mapinalanggaon nga Ama.​—Mat. 27:46.d

“NATAPOS KO EON RO BUEOHATON NGA GINTAO MO KAKON”

14. Paalin ginpremyuhan ni Jehova ro katutom ni Jesus?

¹⁴ Sa anang pangamuyo ku gabii bago imaw mamatay, naghambae si Jesus: “Natapos ko eon ro bueohaton nga gintao mo kakon.” Nagsalig imaw nga premyuhan ni Jehova ro anang katutom. (Juan 17:​4, 5) Tama gid ro desisyon ni Jesus nga magsalig sa anang Ama. Owa imaw ginpabay-an ni Jehova nga magpabilin sa eubnganan. (Binu. 2:​23, 24) Ginbanhaw na si Jesus ag gintaw-an it pinakamataas nga posisyon sa eangit. (Fil. 2:​8, 9) Owa magbuhay, naggahum si Jesus bilang Hari sa Ginharian it Dyos. Ano ro pagaobrahon it ruyong Ginharian? Ro masunod nga parte it anang pangamuyo hay nagasugid katon: “Umabot ro imong Ginharian. Matuman [Jehova] ro imong pagbuot, iya sa eugta pareho man sa eangit.”​—Mat. 6:10.

15. Ano pa gid ro pagaobrahon ni Jesus?

¹⁵ Sa indi magbuhay, magapakig-away si Jesus kontra sa mga kaaway it Dyos ag dueaon na ro mga maeain sa Armagedon. (Pah. 16:​14, 16; 19:​11-16) Rayon, ihaboy na si Satanas sa “kaidadaeman,” kon siin pagaprisuhon imaw ag indi makaobra it maskin alin. (Pah. 20:​1-3) Sa sueod it Sanglibo nga Dag-on nga Paghari ni Jesus, ibalik na ro kalinong sa eugta, buligan na ro mga tawo nga mangin perpekto, banhawon na ro mga patay, ag obrahon nang paraiso ro bilog nga eugta. Matuman eon ro katuyuan ni Jehova!—Pah. 21:​1-4.

16. Ano ro mangin kabuhi pagkatapos it Sanglibo nga Dag-on nga Paghari ni Jesus?

¹⁶ Ano ro mangin kabuhi pagkatapos it Sanglibo nga Dag-on nga Paghari ni Jesus? Maduea eon ro saea, mga masakit o diperensya sa eawas, ag ro paggueang. Indi eon kinahang-ean it mga tawo nga magpangayo it kapatawaran sa andang mga saea paagi sa pangtubos, ag indi eon man nanda kinahang-ean it mga saserdote para mangin mayad ro andang relasyon kay Jehova. Ag “ro katapusan nga kaaway nga pagadag-on [o, pagadueaon] ruyon ro kamatayon.” Habanhaw eon ro mga patay ag perpekto eon ro tanan nga tawo.​—1 Cor. 15:​25, 26.

17-18. (a) Ano pa ro matabo pagkatapos it Sanglibo nga Dag-on nga Paghari ni Jesus? (b) Ano ro pagaobrahon ni Jesus kon matapos eon ro anang paggahum? (1 Corinto 15:​24, 28) (Tan-awa man ro piktyur.)

¹⁷ Ano pa ro matabo pagkatapos it Sanglibo nga Dag-on nga Paghari ni Jesus? May manami gid nga matabo sa ruyong panahon. Matapos eon ro isyu parti sa pagpakabaeaan it pangaean ni Jehova. Paalin? Sa hardin it Eden, gin-akusahan ni Satanas si Jehova nga purilon ag mapintas kuno ro anang paggahum. Umpisa karon, ro mga nag-alagad kay Jehova hay pauman-uman nga nagpamatuod nga ro anang paggahum ro pinakamayad. Ngani pagkatapos it Sanglibo nga Dag-on nga Paghari ni Jesus, mabindikar eon gid ro reputasyon ni Jehova. Mapamatud-an eon ni Jehova nga mapinalanggaon gid imaw nga Ama sa eangit.

¹⁸ Pagkatapos it Sanglibo nga Dag-on nga Paghari ni Jesus, mapamatud-an nga saea ro mga akusasyon ni Satanas kay Jehova. Ano ro pagaobrahon ni Jesus kon matapos eon ro anang paggahum? Tuearon na baea si Satanas ag magrebelde man kay Jehova? Indi gid! (Basaha ro 1 Corinto 15:​24, 28.) Ibalik ni Jesus ro Ginharian sa anang Ama ag magapasakop imaw sa anang paggahum. Buko’t pareho kay Satanas, handa gid si Jesus nga itao ro tanan dahil palangga na si Jehova.

19. Ano ro atong natun-an sa rayang artikulo parti kay Jesus?

¹⁹ Handa gid si Jehova nga itao ro Anang pangaean kay Jesus! Ginpamatud-an ni Jesus nga imaw ro perpektong representante it anang Ama. Ngani, mauno kaimportante kay Jesus ro pangaean ni Jehova? Raya ro pinakaimportante sa anang kabuhi. Handa imaw nga mamatay para sa ruyong pangaean, ag handa man imaw nga ibalik ro tanan kay Jehova pagkatapos it anang Sanglibo nga Dag-on nga Paghari. Paalin naton matuead si Jesus? Pagatalakayon naton sa masunod nga artikulo ro sabat sa ruyong pangutana.