Mangin Mabuot Kon Nagasugid it Kamatuoran

1. Ano ro dapat natong obrahon para mangin parte it pamilya ni Jehova?

KON may makilaea kita nga pareho naton nga Saksi ni Jehova, ro una natong gustong masayran kana hay kon paalin na nasayran ro kamatuoran parti kay Jehova. Ro iba hay nagasabat nga “nagbahoe sanda sa kamatuoran.” Ro iba mat-a hay posibleng magsabat nga “bag-o eang sanda sa kamatuoran.” Ruyon ro atong sabat dahil ginpasugtan naton nga mag-impluwensya ro kamatuoran ku Bisaea it Dyos sa atong kabuhi. Ham-an? Dahil sayod naton nga mangin parte eang kita it pamilya ni Jehova kon pamatud-an naton nga palangga naton ro kamatuoran ag nagakabuhi kita base kara. Ginapakita naton ra paagi sa pagiging honest sa atong mga ginahambae ag ginaobra.—Sal. 15:1-3.

2. (a) Ano ro nasayran it mga tawo parti kay Jesus? (b) Ano ro mangin reaksyon it mga tawo sa kamatuoran nga ginturo ni Jesus?

² Kamatuoran gid pirme ro ginahambae ni Jesus. Nasayran it anang mga kaaway nga nagahambae imaw it matuod maskin pa owa sanda naila sa anang ginahambae. (Mat. 22:16) Parti sa epekto it mga kamatuoran nga ginturo ni Jesus kanda, naghambae imaw: “Nag-abot ako para magpaaway ku unga nga eaeaki kontra sa anang ama, ku unga nga babayi kontra sa anang ina, ku panugangan nga babayi kontra sa anang umagad nga babayi.” (Mat. 10:35) Owa naila si Jesus nga mangin negatibo ro pagbaton it mga tawo sa anang mensahe nga ginadaea pati man ku anang mga sumoeunod, pero sayod na nga matabo gid ra. (Mat. 23:37) Sayod na nga iba-iba ro mangin reaksyon it mga tawo sa anang mensahe. Ro iba hay manamian kara pero ro iba hay maakig.—2 Tes. 2:9-11.

3. Ano ro atong pagatalakayon sa rayang artikulo?

³ Pareho kay Jesus, ginatinguhaan naton nga maghambae it matuod sa tanan nga panahon maskin pa owa kara naila ro iba. Ag naga-preaching kita ag nagaturo it kamatuoran sa Biblia maskin posibleng maakig ro iba sa atong mga ginahambae. Nagakahueogan baea ra nga indi eon naton dapat pag-isipon kon paalin ag kon hin-uno naton ihambae ro kamatuoran? Bukon gid! Sa rayang artikulo, pagatalakayon anay naton ro sabat sa rayang panguna nga pangutana: Siin naton makita ro kamatuoran? Rayon, sabton man naton ro pangutana nga naangot kara: Ham-an, paalin, ag hin-uno naton dapat isugid ro kamatuoran? Ro sabat sa rayang mga pangutana hay makabulig katon nga mapauswag ro atong ikasarang sa paghambae it kamatuoran nga may kabuot, ruyon ro paghambae it matinahuron ag sa tama nga panahon.

SIIN NATON MAKITA RO KAMATUORAN?

4. Ham-an mahambae naton nga si Jehova ro Ginahalinan it kamatuoran?

⁴ Si Jehova ro Ginahalinan it kamatuoran. Ro tanan nanang ginahambae hay kamatuoran. Halimbawa, ro anang mga ginasugid parti sa tama ag saea hay matuod. (Sal. 19:9; 119:142, 151) Ro tanan man nanang ginahambae parti sa paeaabuton hay matabo gid. (Isa. 55:10, 11) Ag pirme na nga ginatuman ro anang mga promisa. (Num. 23:19) Ro matuod, imposible gid nga magpinuril si Jehova! (Heb. 6:18) Dahil kara, gintawag imaw nga “ro Dyos it kamatuoran.”—Sal. 31:5.

5. Ham-an buko’t malisud usuyon “ro Dyos it kamatuoran”? Ieksplikar. (Binuhatan 17:27)

⁵ Nagahambae ro ibang tawo nga malisud usuyon si Jehova, “ro Dyos it kamatuoran.” Pero saea gid sanda dahil ginapakita it tanan nga tinuga nga may Dyos gid. (Roma 1:20) Kat gin-istorya ni apostol Pablo ro sangka grupo it maaeam nga mga Griego sa Atenas, ginhambae na nga gusto it Dyos nga ‘usuyon naton imaw’ ag “bukon [imaw] it maeayo sa kada isaea katon.” (Basaha ro Binuhatan 17:27.) Ro matuod, ginapapaeapit ni Jehova kana ro mapainubuson nga mga tawo nga nagausoy it kamatuoran.—Juan 6:44.

6. Ano ro pila nga mga kamatuoran nga una sa Biblia, ag ham-an nagapasaeamat ka nga nasayran mo ra?

⁶ Ro sambilog sa mga paagi para makita naton si Jehova hay ro pagtuon sa Biblia. Ro mga eaki nga nagsueat kara hay gingiyahan ku baeaan nga espiritu it Dyos. (2 Ped. 1:20, 21) Ngani ro tanan nga una sa Biblia hay kamatuoran ag masaligan naton. Halimbawa, makasalig kita nga matuod ro ginahambae kara parti sa ginhalinan it uniberso ag it kabuhi iya sa eugta. (Gen. 1:1, 26) Mapatihan naton ro ginahambae kara parti sa kon ham-an nagakasaea kita ag kon ham-an may pag-antus ag kamatayon. (Roma 5:12; 6:23) Makasalig gid kita sa ginahambae kara nga gamiton ni Jehova ro anang Unga para dueaon ro tanan nga gin-obra ni Satanas, ro “ama it tanan nga kapurilan.” (Juan 8:44; Roma 16:20) Ag makasalig man kita sa promisa it Biblia nga dueaon ni Jesus ro mga maeain, banhawon ro mga patay, obrahong paraiso ro eugta, ag buligan kita nga mangin perpekto. (Juan 11:25, 26; 1 Juan 3:8) Mabahoe gid nga pribilehiyo ro gintao katon ni Jehova! Ginturo na katon ro kamatuoran, ag gintaw-an na kita it tsansa nga maturo man ra sa iba.—Mat. 28:19, 20.

HAM-AN GINASUGID NATON RO KAMATUORAN?

7-8. Importante baea ro atong motibo kon ginasugid naton ro kamatuoran? Magtao it halimbawa. (Marcos 3:11, 12) (Tan-awa man ro piktyur.)

⁷ Sa ginsambit kaina, dapat maghambae kita it matuod kon gusto naton nga mangin parte it pamilya ni Jehova. Pero euwas sa pagiging honest, may dapat pa kitang obrahon para mapasadya imaw. Importante kay Jehova ro atong motibo kon ham-an ginasugid naton ro kamatuoran. Halimbawa, tan-awa ro natabo kat nagministeryo si Jesus iya sa eugta. (Basaha ro Marcos 3:11, 12.) Habang nagawali si Jesus maeapit sa Dagat it Galilea, abung tawo ro nagtipon maeapit kana. Ro pila kanda hay ginsapian it mga demonyo ag naghapa sa atubang ni Jesus ag nagsinggit: “Ikaw ro Unga it Dyos!” Ham-an naghambae it kamatuoran ro mga demonyo parti kay Jesus? Posible nga gusto nanda nga magsalig kanda ro mga tawo ag papunduhon sanda sa pag-alagad kay Jehova. Matuod man ro ginhambae it mga demonyo, pero makasarili ro andang motibo. Sayod ni Jesus ro andang motibo ag owa gid imaw naila kara. Ro matuod, ginhambaean sanda ni Jesus nga indi magwali parti kana.

⁸ Ano ro atong matun-an kara? Importante gid kay Jehova ro atong motibo kon ginasugid naton ro kamatuoran. Ngani ro aton dapat nga motibo sa pagturo it kamatuoran sa iba hay ro atong pagpalangga kay Jehova. Ag kon makabaton man kita it mga pagdayaw, ginatao naton ra kay Jehova buko’t sa atong sarili.—Mat. 5:16; ikumpara ro Binuhatan 14:12-15.

9. Ano ro dapat natong likawan, ag ham-an?

⁹ Tan-awa ro sambilog pang sitwasyon nga kinahang-ean natong likawan hay ro pagpadayaw-dayaw sa atong sarili. Imadyina nga may sangka elder nga nagsalig katon it kumpidensyal nga impormasyon ag ginsugid naton ra sa iba. Kon masayran rayon it atong mga ginsugiran nga matuod ro atong ginhambae kanda, posibleng magdayaw sanda katon ag mag-isip nga abu pa ro atong nasayran nga kumpidensyal nga mga impormasyon. Posibleng magbilib gid sanda katon, pero indi naton mapasadya ro Dyos. (Hulu. 11:13) Ham-an? Dahil euwas sa ginsugid naton ro kumpidensyal nga mga bagay, saea man ro atong motibo sa pagsugid kara.

PAALIN NATON ISUGID RO KAMATUORAN?

10. Ano ro buot hambaeon it “mayad-ayad” nga hambae? (Colosas 4:6)

¹⁰ Basaha ro Colosas 4:6. Ginpadumdom ni apostol Pablo ro mga Cristyano sa Colosas nga dapat “mayad-ayad permi” ro andang ginahambae. Ano ro buot hambaeon kara? Ro Griego nga ekspresyon nga gingamit kara hay nagakahueogan nga ro atong mga ginahambae hay dapat makabulig sa iba, mabuot, ag makapalig-on.

11-12. Ham-an dapat maghaeong kita sa pagturo it kamatuoran sa iba? Magtao it halimbawa. (Tan-awa man ro piktyur.)

¹¹ Dapat natong sundon ro eaygay ni Pablo nga mangin mabuot kon nagaturo it kamatuoran sa iba. Ginakumpara it Biblia ro mga kamatuoran nga una kara sa mataeum nga espada nga makabueag it atong kaeag ag espiritu. Kon katon pa, mapakita kara ro atong matuod nga pagkatawo ag motibo. (Heb. 4:12) Pero kon indi naton paggamiton it mayad ro Biblia, pwedeng makasakit kita it baeatyagon it iba o pwedeng magresulta ra it pagbinais. Paalin ron posibleng matabo?

¹² Halimbawa, sa atong pagministeryo, posibleng may maistorya kita nga sangka sinsero nga eaki nga pirmeng nagapangamuyo sa mga imahen, ag naila imaw magselebrar it Krismas ag Easter kaibahan ro anang pamilya. Rayon, ginpakita naton kana gamit ro Biblia nga saea ro pagpangamuyo sa mga imahen ag pamatud-an kana nga ro Krismas ag Easter hay saea ag owa ginaturo it Biblia. (Isa. 44:14-20; 2 Cor. 6:14-17) Kon obrahon eagi naton ra sa una natong pag-istorya kana, masugid naton ro kamatuoran pero owa naton ginagamit it mayad ro Bisaea it Dyos.

13. Paalin naton matimplahan it asin ro atong mga ginahambae?

¹³ Ginhambae man ni Pablo nga dapat timplahan naton it asin ro atong mga ginahambae. Owa na ginatukoy nga dapat natong ibahon ro kamatuoran o taguon ra. Kundi, ginapalig-on na kita nga maggamit it “natimplahan” nga hambae agud masugid naton ro kamatuoran sa paagi nga manami sa ‘panlasa’ it nagapamati. (Job 12:11) Bukon ra it maeumo obrahon. Kon sa literal nga pagkaon, posibleng isipon naton nga dahil nanamian kita sa sangka pagkaon, manamian man kara ro iba. Pareho kara, posibleng isipon man naton nga ro atong paagi it paghambae hay mayad sa pamatian it tanan. Pero bukon ron it matuod. Halimbawa, sa ibang kultura, ro mga tawo hay prangka sa pagsugid it andang opinyon maskin ro andang kaistorya hay mas magueang kanda. Pero sa ibang kultura, owa it pagtahod ruyong paagi it paghambae. Ginhambae ni Pablo nga dapat “kaantiguhan [kita] magsabat it nagakaigo sa tanan nga mga tawo.” Nagakahueogan ra nga dapat timplahan naton ro atong mga ginahambae bukon it base sa atong panlasa o kultura, kundi base sa panlasa it nagapamati katon.

HIN-UNO NATON ISUGID RO KAMATUORAN?

14. Kat iya si Jesus sa eugta, ginturo na baea sa anang mga disipulo ro tanan nang nasayran? Ieksplikar.

¹⁴ Mabuot pirme si Jesus kon nagaistorya sa anang mga sumoeunod, ag gintur-an na sanda it abung mga bagay. (Mar. 6:34) Pero abu pa ro kinahang-ean nandang matun-an. Owa ginturo ni Jesus kanda ro tanan nang nasayran. Sayod na kon ano eang ro kaya nandang maintindihan. Sayod na man nga bukon pa it rato ro tama nga panahon para masayran nanda ro pila nga mga kamatuoran. Ro matuod, ginhambae na kanda nga indi pa nanda ra maintindihan. (Juan 16:12) Ano ro ginaturo kara katon?

15. Dapat baea nga ituro eagi naton sa atong mga Bible study ro tanan natong nasayran? Ieksplikar. (Hulubaton 25:11) (Tan-awa man ro piktyur.)

¹⁵ Ginapakita it halimbawa ni Jesus nga dahil sayod naton ro kamatuoran, owa ra nagakahueogan nga ituro eagi naton sa atong mga Bible study ro tanan natong nasayran. Paalin naton matuead ro halimbawa ni Jesus? Dapat natong isipon ro sitwasyon it mga tawo. Isipa it uman ro eaki nga naila magselebrar it Krismas ag Easter kaibahan ku anang pamilya. Sayod naton nga rayang mga selebrasyon hay may pagano nga ginhalinan ag owa nailaan it Dyos. Pero isipa nga gin-umpisahan mo ro pag-Bible study sa ruyong eaki mga sang domingo o daywang domingo bago ro Krismas. Mapakita baea naton ro kabuot sa paghambae kon ituro eagi naton kana ro ginahambae it Biblia parti sa pagano nga mga selebrasyon ag paabuton nga punduhon na eagi ro pagselebrar it Krismas? Matuod, ro pila nga mga Bible study hay ginaaplikar eagi ro andang mga natun-an sa Biblia. Pero, ro iba hay nagakinahang-ean pa it panahon para mabag-o ro andang kaisipan ag mga ginaobra. Mabuligan naton ro atong mga Bible study nga makaobra it mga pagbag-o kon isugid naton kanda ro kinahang-ean nandang masayran sa tama nga panahon, ruyon ro panahon nga kaya eon nanda ra nga maintindihan.—Basaha ro Hulubaton 25:11.

16. Paalin naton mabuligan ro atong mga Bible study nga ‘magkabuhi suno sa kamatuoran’?

¹⁶ Sangkiri eang ro mga bagay nga makapasadya katon kaysa sa pagbulig sa iba nga masayran ro kamatuoran parti kay Jehova. Mabuligan naton sanda nga ‘magkabuhi suno sa kamatuoran’ kon obrahon naton rayang mga bagay: Padayon nga mangin mayad nga halimbawa kanda. (3 Juan 3, 4) Siguraduha nga ro imong paagi it pagkabuhi hay nagapamatuod nga nagapati ka sa mga promisa it Dyos nga una sa Biblia. Isugid ro kamatuoran nga may tama nga motibo. Maghambae it mabuot nga nagagamit it manami nga mga pamisaea sa tama nga panahon kon nagaturo it kamatuoran sa Biblia. Ag itao kay Jehova ro pagdayaw nga imong nabaton. Kon obrahon mo ra, ginapamatud-an mo nga nagaalagad ka kay Jehova, ro Dyos it kamatuoran.