በአገልግሎት ረገድ ክህሎታችንን ማዳበር—ጥሩ የአገልግሎት ጓደኛ ሁኑ

አስፈላጊ የሆነው ለምንድን ነው? በምንሰብክበት ወቅት የአገልግሎት ጓደኛ መኖሩ ጠቃሚ እንደሆነ ኢየሱስ ተገንዝቦ ነበር። በመሆኑም 70ዎቹን ለስብከት ሲልካቸው ሁለት ሁለት አድርጎ መድቧቸዋል። (ሉቃስ 10:1) አንድ የአገልግሎት ጓደኛ፣ አብሮት የሚያገለግለው አስፋፊ አስቸጋሪ ሁኔታ ሲያጋጥመው ወይም ለቤቱ ባለቤት ምን መልስ መስጠት እንዳለበት እርግጠኛ በማይሆንበት ጊዜ ሊረዳው ይችላል። (መክ. 4:9, 10) በተጨማሪም በወንጌላዊነቱ ሥራ ይበልጥ ውጤታማ እንዲሆን ተሞክሮውን ሊያካፍለው ወይም አልፎ አልፎ ጠቃሚ ሐሳቦችን ሊነግረው ይችላል። (ምሳሌ 27:17) እንዲሁም ከአንዱ ቤት ወደ ሌላው ሲሄዱ የሚያንጽ ጭውውት በማድረግ ሊያበረታታው ይችላል።—ፊልጵ. 4:8

ይህን ማድረግ የሚቻለው እንዴት ነው?

የአገልግሎት ጓደኛችሁ ምሥክርነት ሲሰጥ በጥሞና አዳምጡ። (ያዕ. 1:19) ጥቅስ ሲነበብ የራሳችሁን መጽሐፍ ቅዱስ አውጥታችሁ ተከታተሉ። እንዲህ ማድረጋችሁ አስፈላጊ በሚሆንበት ጊዜ በቀላሉ እርዳታ ለመስጠት ያስችላችኋል።
በውይይቱ ላይ ሐሳብ መስጠት ይኖርባችሁ እንደሆነና እንዳልሆነ እንዲሁም መቼ ጣልቃ መግባት እንዳለባችሁ በምትወስኑበት ጊዜ ሁኔታዎችን በሚገባ ማመዛዘን ይኖርባችኋል። (ምሳሌ 25:11 የ1980 ትርጉም) በአንድ የመጽሐፍ ቅዱስ ጥናት ላይ ከተገኛችሁ፣ አልፎ አልፎ ሐሳብ መስጠታችሁ ጠቃሚ እንደሚሆን ግልጽ ነው። ይሁንና ከቤት ወደ ቤት ስታገለግሉ የአገልግሎት ጓደኛችሁ የእሱ ተራ ሆኖ በሚያነጋግርበት ጊዜ ጣልቃ እንዳትገቡበት ይፈልግ ይሆናል። እርግጥ ነው፣ አዲስ አስፋፊ ከሆነ ወይም ደግሞ ለቀረበለት ጥያቄ አሊያም ለተቃውሞ መልስ መስጠት ካቃተው የእናንተን እርዳታ እንደሚፈልግ ጥርጥር የለውም። ያም ቢሆን አንድ አስፋፊ ከቤት ወደ ቤት ያገኘውን ሰው ሲያነጋግር፣ ተመላልሶ መጠየቅ ሲያደርግ ወይም ጥናት ሲመራ አብራችሁት በምትሆኑበት ጊዜ ጣልቃ መግባት፣ ውይይቱን መቆጣጠር ወይም ደግሞ ወደ ሌላ ርዕሰ ጉዳይ መግባት የለባችሁም።
ተሞክሯችሁን አካፍሉ። አብሯችሁ የሚያገለግለው አስፋፊ በአገልግሎት ይበልጥ ውጤታማ እንዲሆን አንዳንድ ጊዜ ምክር መስጠታችሁ ጥሩ እንደሆነ ከተሰማችሁ ይህን ከማድረግ ወደኋላ አትበሉ። (ምሳሌ 3:27) ምክር ለመስጠት አመቺ እንደሆነ በሚሰማችሁ ጊዜ እንዲህ በማለት ሐሳባችሁን መጀመር ትችላላችሁ፦ “እንዴት ነበር ውይይቱ?” ወይም “አንድ ሐሳብ ብጠቁምህ ቅር ይልሃል?” አሊያም “እኔ የምጠቀምበትን አንድ ዘዴ ልጠቁምህ?” አንድ አስፋፊ አልፎ አልፎ ምክር ስንሰጠው በደስታ ሊቀበለን ቢችልም ሁሌ ስህተቱን እየለቀምን የምንነግረው ከሆነ ተስፋ ሊቆርጥ እንደሚችል አትዘንጉ።

በዚህ ወር እንዲህ ለማድረግ ሞክሩ፦

አገልግሎት ከጨረሳችሁ በኋላ የአገልግሎት ጓደኛችሁ የተናገረውን ወይም ያደረገውን ነገር ጠቅሳችሁ እንዴት ጥሩ ረዳት እንደሆነላችሁ ግለጹለት።