በአገልግሎት ረገድ ክህሎታችንን ማዳበር—ለሰዎች በግለሰብ ደረጃ አሳቢነት ማሳየት

አስፈላጊ የሆነው ለምንድን ነው? ኢየሱስ የእያንዳንዱን ሰው ሁኔታ ግምት ውስጥ ያስገባ ነበር፤ እንዲሁም በፍቅር ተነሳስቶ በግለሰብ ደረጃ አሳቢነት ያሳያቸው ነበር። ለምሳሌ ያህል፣ ደንቆሮ የሆነን አንድ ሰው በፈወሰበት ወቅት ሰውየው እንደተሸማቀቀ ሳያስተውል አልቀረም፤ በመሆኑም ከሕዝቡ ነጥሎ ከወሰደው በኋላ ለብቻው ሆኖ ፈወሰው። (ማር. 7:31-35) በተጨማሪም ደቀ መዛሙርቱ ያለባቸውን የአቅም ገደብ በመገንዘብና ከአቅማቸው በላይ ብዙ መረጃ ባለማዥጎድጎድ ለእነሱ ያለውን አሳቢነት አሳይቷል። (ዮሐ. 16:12) ኢየሱስ ወደ ሰማይ ከሄደ በኋላም ለሰዎች በግለሰብ ደረጃ አሳቢነት ያሳይ ነበር። (2 ጢሞ. 4:17) እኛም የክርስቶስ ተከታዮች እንደ መሆናችን መጠን እሱን መምሰል እንፈልጋለን። (1 ጴጥ. 2:21፤ 1 ዮሐ. 3:16, 18) ከዚህም በተጨማሪ በአገልግሎታችን ውጤታማ የምንሆነው ለምናነጋግረው ሰው አሳቢነት የምናሳይ እንዲሁም ያለበትን ሁኔታ፣ ፍላጎቱንና የሚያሳስቡትን ነገሮች ግምት ውስጥ የምናስገባ ከሆነ ነው። የምናነጋግረው ሰው፣ ቤቱ የመጣነው እንዲሁ አንድ መልእክት ለማድረስ ወይም ጽሑፍ ትተን ለመሄድ ብቻ ሳይሆን ለእሱ በግለሰብ ደረጃ ስለምናስብ እንደሆነ ከተገነዘበ እኛን ለማዳመጥ ይበልጥ ፈቃደኛ ሊሆን ይችላል።

ይህን ማድረግ የሚቻለው እንዴት ነው?

በሚገባ ተዘጋጁ። ዘና በሉ፤ ፈገግ ብላችሁ ወዳጃዊ በሆነ መንገድ አነጋግሩት።
አስተዋይ ሁኑ። ልጆች እንዳሉት የሚጠቁሙ ነገሮች አሉ? አትክልት መንከባከብ ይወዳል? የቤት እንስሳት አሉት? ሃይማኖቱ ምን እንደሆነ የሚጠቁም ነገር አለ? ምናልባትም ካስተዋላችሁት ሁኔታ ጋር በሚስማማ መልኩ አቀራረባችሁን ማስተካከል ያስፈልጋችሁ ይሆናል።
አመለካከቱን እንዲገልጽ ጠይቁት፤ ሐሳቡን ሲገልጽ ደግሞ ሳታቋርጡት በጥሞና አዳምጡት። እያዳመጣችሁት መሆኑን ለማሳየት ዓይን ዓይኑን እዩት። ሐሳቡን ለመግለጽ ፈቃደኛ በመሆኑ እንዲሁም ሌላ እንዲመሰገን የሚያደርግ ነገር ካገኛችሁ ከልባችሁ አመስግኑት። ክርክር ውስጥ አትግቡ።
አቀራረባችሁን እንደ ሁኔታው ለውጡ። አስፈላጊ ከሆነ መግቢያችሁን በመለወጥ እሱን ባሳሰበው ጉዳይ ላይ ተነጋገሩ። ትራክቶቻችን፣ ብሮሹሮቻችንና መጽሔቶቻችን የተለያዩ ጉዳዮችን ስለሚዳስሱ ይህን ማድረግ የምናስበውን ያህል ከባድ አይደለም። ወደ ቤቱ የመጣችሁት ግለሰቡ በማይመቸው ጊዜ ለምሳሌ ሥራ ላይ እያለ ከሆነ ሁኔታውን እንደተረዳችሁለት ግለጹ፤ እንዲሁም መግቢያችሁን አጭር አድርጉ።

በዚህ ወር እንዲህ ለማድረግ ሞክሩ፦

የምታነጋግሩት ሰው የሚያነሳውን ሐሳብ ግምት ውስጥ በማስገባት አቀራረባችሁን እንዴት ማስተካከል እንደምትችሉ የቤተሰብ አምልኮ በምታደርጉበት ወቅት ወይም በአገልግሎት ላይ እያላችሁ ተለማመዱ።
ወንድሞች፣ የመስክ አገልግሎት ስምሪት ስብሰባ ሲመሩ በግለሰብ ደረጃ አሳቢነት ማሳየት ስለሚቻልባቸው መንገዶች በውይይት መልክ ማቅረብ ወይም ይህን የሚያሳይ ሠርቶ ማሳያ እንዲቀርብ ማድረግ ይችላሉ።