በአገልግሎት ረገድ ክህሎታችንን ማዳበር—አዲሶችን ማሠልጠን

አስፈላጊ የሆነው ለምንድን ነው? በቅርቡ ኢየሱስን መከተል የጀመሩ አዳዲስ ደቀ መዛሙርት እሱ ‘ያዘዘውን ሁሉ’ መጠበቅ ይኖርባቸዋል፤ ይህ ደግሞ ለሌሎች እውነትን ማስተማርን ይጨምራል። (ማቴ. 28:19, 20) በርካታ አዳዲስ ደቀ መዛሙርት በቲኦክራሲያዊ የአገልግሎት ትምህርት ቤት ክፍል ማቅረብ እንዲሁም መደበኛ ባልሆነ መንገድ ለዘመዶቻቸውና ለጓደኞቻቸው መመሥከር ጀምረዋል። ይሁንና ለተማሩት ነገር ያላቸው አድናቆት እየጨመረ ሲመጣና ይሖዋ ሁሉም ሰው ምሥራቹን እንዲሰማ እንደሚፈልግ ሲያውቁ በመስክ አገልግሎት መካፈል እንደሚፈልጉ ይናገራሉ። (ሮም 10:13, 14) አዲሶች ያልተጠመቁ አስፋፊዎች ሆነው እንዲያገለግሉ ሲፈቀድላቸው ጥሩ ሥልጠና ማግኘታቸው መንፈሳዊ እድገት ለማድረግ የሚያስችላቸውን ይህን ኃላፊነት በሚወጡበት ጊዜ የመተማመን ስሜት እንዲኖራቸው ይረዳቸዋል።—ሉቃስ 6:40

ይህን ማድረግ የሚቻለው እንዴት ነው?

አዲሱ አስፋፊ ለስብከትም ሆነ ለማስተማር የሚያስፈልጉትን ጽሑፎች እንዲያገኝ እርዱት። የአገልግሎት ቦርሳችሁን ያደራጃችሁበትን መንገድ አሳዩት፤ እንዲሁም እያንዳንዱን ጽሑፍ የያዛችሁት ለምን እንደሆነ ግለጹለት።
ከመንግሥት አገልግሎታችን ላይ አንድ የአቀራረብ ናሙና መርጣችሁ አብራችሁ ተለማመዱ። አዲሱ አስፋፊ የመግቢያውን ሐሳብ በራሱ አባባል እንዲናገር አበረታቱት። በአገልግሎት ትምህርት ቤት መጽሐፍ ገጽ 82 ላይ ከሚገኙት መቼቶች መካከል ለክልላችሁ ተስማሚ የሆኑትን መርጣችሁ ተለማመዷቸው። አለባበሳችንና አጋጌጣችን ልከኛ መሆኑ ምን ያህል አስፈላጊ እንደሆነ ጎላ አድርጋችሁ ግለጹለት።—2 ቆሮ. 6:3, 4
የምትሰጡት ሥልጠና ቀጣይነት ያለው ይሁን። ለአዲሱ አስፋፊ የአገልግሎት ክልል ካርድ አሳዩት፤ እንዲሁም ከቤት ወደ ቤት መመዝገቢያ ቅጹን እንዴት እንደሚጠቀምበት አስረዱት። ፍላጎት ያሳዩ ሰዎችን በማስታወሻ ላይ እንዴት እንደሚመዘግብ አሳዩት። በተጨማሪም jw.orgን እና ለሰዎች ሁሉ የሚሆን ምሥራች (እንግሊዝኛ) የተባለውን ቡክሌት ለአገልግሎት መጠቀም የሚችለው እንዴት እንደሆነ አሠልጥኑት። ፍላጎት ያሳዩ ሰዎችን ተከታትሎ መርዳት የሚችለው እንዴት እንደሆነም አስተምሩት።—1 ቆሮ. 3:6
በትዕግሥት ያዙት እንዲሁም አመስግኑት። (ምሳሌ 25:11) ጥሩ ምሳሌ ሁኑ። የምታሳዩት ቅንዓትና ልባዊ አሳቢነት ለብዙ ዓመታት የሚዘልቅ በጎ ተጽዕኖ ሊያሳድርበት ይችላል።

በዚህ ወር እንዲህ ለማድረግ ሞክሩ፦

ከጥናታችሁ ጋር ከቤት ወደ ቤት አገልግሉ፤ ተመላልሶ መጠየቅ ስታደርጉ ወይም ጥናት ስታስጠኑ ይዛችሁት ሂዱ። ጥናት ከሌላችሁ ደግሞ ብዙም ተሞክሮ ከሌላቸው አስፋፊዎች ጋር አብራችሁ አገልግሉ።