በአገልግሎት ረገድ ክህሎታችንን ማዳበር—የመጽሐፍ ቅዱስ ትምህርት የተባለውን መጽሐፍ ማበርከት

አስፈላጊ የሆነው ለምንድን ነው? የመጽሐፍ ቅዱስ ትምህርት የተባለው መጽሐፍ ሰዎችን ለማስተማር የምንጠቀምበት ዋነኛ መሣሪያ ነው። ይሁን እንጂ በዚህ መጽሐፍ ተጠቅመን አንድን ሰው ከማስተማራችን በፊት መጽሐፉን ልንሰጠው ይገባል። በመሆኑም ሁላችንም የመጽሐፍ ቅዱስ ትምህርት የተባለውን መጽሐፍ በማበርከት ረገድ ውጤታማ ለመሆን መጣር አለብን። (ምሳሌ 22:29) መጽሐፉን ማበርከት የሚቻልባቸው የተለያዩ ዘዴዎች አሉ፤ አስፋፊዎች ለእነሱ ውጤታማ ሆነው ያገኟቸውን ዘዴዎች መጠቀም ይኖርባቸዋል።

ይህን ማድረግ የሚቻለው እንዴት ነው?

የግለሰቡን ፍላጎት ሊቀሰቅስ የሚችል ጥያቄ ጠይቁ፤ ጥያቄው ውይይቱን በመጽሐፉ ላይ ወደሚገኝ አንድ ምዕራፍ የሚመራ ይሁን። በእያንዳንዱ ምዕራፍ መግቢያ ላይ ካሉት ጥያቄዎች አንዱን መጠቀምም ትችላላችሁ። የግለሰቡን መልስ ካዳመጣችሁ በኋላ ካነሳችሁት ነጥብ ጋር የሚስማማ የመጽሐፍ ቅዱስ ጥቅስ አንብቡለት፤ ከዚያም ስለ ጉዳዩ የሚያብራራውን አንቀጽ ልታሳዩት፣ ጊዜ ካላችሁ ደግሞ በአጭሩ ልታወያዩት ትችላላችሁ።
ሌላኛው አማራጭ ደግሞ በመግቢያው ላይ የሚገኙትን ገጾች ተጠቅሞ የግለሰቡን ፍላጎት መቀስቀስ ነው፤ ከዚያም መጽሐፍ ቅዱስ ስለ ጉዳዩ የሚናገረው ሐሳብ የተብራራበትን ቦታ ከመጽሐፉ ላይ አሳዩት። ለምሳሌ ያህል፣ በቅርቡ የተፈጸመን አንድ አሳዛኝ ዜና ከጠቀሳችሁለት በኋላ በገጽ 3 ላይ ያሉትን ጥያቄዎች ልታሳዩት ትችላላችሁ፤ ከዚያም ብዙ ሰዎች የእነዚህን ጥያቄዎች መልስ ማወቅ እንደሚፈልጉ ንገሩት። ወይም ደግሞ በአካባቢው ለሚኖሩት ሰዎች ወደፊት የተሻለ ጊዜ እንደሚመጣ እየተናገራችሁ እንደሆነ ግለጹለት። ከዚያም በገጽ 4 እና 5 ላይ የሚገኙትን ሥዕሎች አሳዩትና “እዚህ ላይ ከተጠቀሱት ተስፋዎች መካከል የትኛው ሲፈጸም ማየት ይፈልጋሉ?” በማለት ጠይቁት። ከዚህም ሌላ ሰዎች በሕይወታቸው ውስጥ ለሚያሳስቧቸው ጥያቄዎች መልስ ማግኘት ስለሚችሉበት መንገድ አጭር ውይይት እያደረጋችሁ እንደነበር መናገር ትችላላችሁ። ከዚያም በገጽ 6 መጨረሻ ላይ የሚገኙትን ጥያቄዎች ለምታነጋግሩት ሰው ካሳያችሁት በኋላ የየትኛውን ጥያቄ መልስ ማወቅ እንደሚፈልግ ጠይቁት።
ቀጥተኛ ግብዣ በማቅረብ የመጽሐፍ ቅዱስ ጥናት አስጀምሩ። እንዲህ ማለት ትችላላችሁ፦ “በዚህ አካባቢ ለሚኖሩ ሰዎች መጽሐፍ ቅዱስን ለመማር የሚረዳ መጽሐፍ እያሳየናቸው ነበር። ይህን መጽሐፍ ከዚህ በፊት አይተውት ያውቃሉ? [ሐሳቡን እንዲገልጽ ዕድል ስጡት።] ጥቂት ደቂቃዎች ካሉዎት በራስዎ መጽሐፍ ቅዱስ ተጠቅመው ይህን መጽሐፍ ማጥናት የሚችሉት እንዴት እንደሆነ ላሳይዎት እችላለሁ።”

በዚህ ወር እንዲህ ለማድረግ ሞክሩ፦

ይህን ማድረግ የምትችሉት እንዴት እንደሆነ በቤተሰብ አምልኮ ፕሮግራማችሁ ወቅት ተለማመዱ።
አገልግሎት ስትወጡ ምን ለማለት እንዳሰባችሁ ከሌሎች አስፋፊዎች ጋር ተነጋገሩ። (ምሳሌ 27:17) መግቢያችሁ ውጤታማ እንዳልሆነ ካስተዋላችሁ ቀይሩት።