በአገልግሎት ረገድ ክህሎታችንን ማዳበር—ሌላ ቋንቋ ለሚናገር ሰው መመሥከር

አስፈላጊ የሆነው ለምንድን ነው? ይሖዋ ‘በየትኛውም ብሔር’ ያሉ ሰዎች መንፈሳዊ ደህንነት ያሳስበዋል። (ሥራ 10:34, 35) ኢየሱስ ምሥራቹ “ለብሔራት ሁሉ” እንዲሁም “በመላው ምድር” እንደሚሰበክ መናገሩ ይህን ያሳያል። (ማቴ. 24:14) ዘካርያስ “ከብሔራት ቋንቋዎች ሁሉ የተውጣጡ” ሰዎች ለምሥራቹ ጥሩ ምላሽ እንደሚሰጡ ተንብዮአል። (ዘካ. 8:23) ሐዋርያው ዮሐንስ በተመለከተው ራእይ መሠረት ደግሞ ከታላቁ መከራ የሚተርፉት ሰዎች “ከሁሉም ብሔራት፣ ነገዶች፣ ሕዝቦችና ቋንቋዎች የተውጣጡ” ናቸው። (ራእይ 7:9, 13, 14) ከላይ የተጠቀሱት ሐሳቦች በግልጽ እንደሚያሳዩት በክልላችን ውስጥ ላሉ ሌላ ቋንቋ የሚናገሩ ሰዎች ምሥክርነት ለመስጠት ጥረት ማድረግ ይኖርብናል።

ይህን ማድረግ የሚቻለው እንዴት ነው?

ዝግጁ ሁን። በቦርሳህ ውስጥ ለሰዎች ሁሉ የሚሆን ምሥራች (እንግሊዝኛ) የተባለውን ቡክሌት ያዝ። በቡክሌቱ መግቢያ ላይ በሚገኘው “ሌላ ቋንቋ የሚናገሩ ሰዎችን መርዳት የሚቻለው እንዴት ነው?” በሚለው ርዕስ ሥር የተጠቀሱትን መመሪያዎች ተመልከት። በክልላችሁ ውስጥ ልታገኛቸው የምትችላቸውን ሌላ ቋንቋ የሚናገሩ ሰዎች አስቀድመህ በማሰብ ከjw.org ላይ በቋንቋቸው የተዘጋጀ ቪዲዮ ወይም ጽሑፍ አውርደህ ተንቀሳቃሽ ኤሌክትሮኒክ መሣሪያህ ላይ ጫን። ጄደብሊው ላንግዌጅ የተሰኘውን የቋንቋ መማሪያ አፕሊኬሽን ተጠቅመህ አንዳንድ ሐረጎችን ለመማር ሞክር። በሌላ ቋንቋ የሚመሩ ጉባኤዎች በክልላችሁ የሚያገለግሉ ከሆነ ከቤት ወደ ቤት ስታገለግል መያዝ ያለብህ የአንተ ጉባኤ በሚመራበት ቋንቋ የተዘጋጁ ጽሑፎችን ብቻ ነው። ይሁንና የተለያዩ ቋንቋዎች በሚነገሩባቸው አካባቢዎች በሌሎች የምሥክርነት ዘርፎች የምትካፈል ከሆነ የምታገኛቸው ሰዎች ሊናገሯቸው በሚችሉ ቋንቋዎች የተዘጋጁ ጽሑፎችን ያዝ።
ሌላ ቋንቋ የሚናገር ሰው ካጋጠመህ ለግለሰቡ በቋንቋው “ስለ አምላክ ታላቅ ሥራ” ለመናገር ጥረት አድርግ። (ሥራ 2:11) jw.org ላይ በቋንቋው የሚዘጋጁ ተጨማሪ መረጃዎችን ማግኘት የሚችለው እንዴት እንደሆነ አሳየው። ግለሰቡ ፍላጎት ካሳየ እባካችሁ ተከታትላችሁ እርዱት (S-43) የተባለውን ቅጽ ወዲያውኑ ሞልተህ ለጉባኤያችሁ ጸሐፊ ስጠው። ግለሰቡ የእሱን ቋንቋ ከሚናገሩ አስፋፊዎች ጋር እስኪገናኝ ድረስ ከእሱ ጋር ግንኙነት ማድረግህን አታቋርጥ።

በዚህ ወር እንዲህ ለማድረግ ሞክሩ፦

በቤተሰብ አምልኳችሁ ወቅት ሌላ ቋንቋ ለሚናገር ሰው መመሥከር የምትችሉት እንዴት እንደሆነ ተለማመዱ።