Adam mè Îfu Mikpaka Ibot Inyi Awaji

Usen ge, mgbọ Îfu okupbe ọmọ gaalek, ulu mè iyaka ire ijijinu ge otutumu inyi ọmọ ibe: ‘Ire atikọ ibe ke Awaji ikaweek ibe enyi erie mfut uti geege onan̄a me emen uko yi ni?’ Îfu obebe: ‘Eji mekọt irie mfut onan̄a me lek uti geelek me emen uko yi ilọ me lek ge. Ire eji irie mfut onana me lek uti ya, eji mekwaan̄.’ Ulu ya onenitumu ibe: ‘Me atikọ, enyi kpebekwaan̄, usen geelek enyi eriebe mfut uti ya, enyi mekup kubọk Awaji.’ Eya ire atikọ ni? In̄-in̄, ire ataak. Ire, Îfu ichieek me lek. Ike Îfu okpọkpọk ikikpọ mfut ya, ikeya si ke ikpọkpọk ikiweek irerie. Îfu irie mfut ya mè inyi Adam usini me lek. Adam iriọọn̄ ibe ke ema mekwu ire ema ekpaka ibot inyi Awaji, ire, irie mfut ya si.

Ike mgbọ ojebe me usen ya, Jioba ogọgọọk Adam mè Îfu ikpa usem. Ido ema mkpọ orọrọ ema ekpakabe ibot inyi ọmọ. Îfu ofefieek ulu ikọ, Adam si ofefieek Îfu ikọ. Bak lek ibe ke Adam mè Îfu kpesiki ibot inyi Awaji, Awaji orerieen̄ ema isibi me emen uko ya. Awaji ototo ebi osat mè oge akọn̄ okimumen ukan̄ me oniin̄ ekije inin̄ uko ya inyi ema ekagwu ikom inin̄ emen uko ya.

Jioba otutumu ibe ke ogwu okakan̄ ataak inyi Îfu mobọkọ osusut si. Ikachubọk ire ulu otumu usem inyi Îfu. Jioba ikarom ulu ibe ikitumu usem. Ire ijo ogwu osat ge orọ ibe ulu ya itumu usem. Irọ eyi isasa ifiaan̄ Îfu. Ogwu osat ya ire ogwu ekigwen Setan, mè ire si Yọk. Me mgbọ okinu me isi, Jioba mofiat Setan inyi ikayaka ikifiaan̄ ebi ene ibe ekerọ ijo inu.